AP News In LOksabha : పోలవరం పూర్తి కాదు - హోదా రాదు ! పార్లమెంట్‌లో ఏపీకి గట్టి షాకిచ్చిన కేంద్రం !

AP News In Parlament : ఆంధ్రప్రదేశ్‌కు సంబంధించిన రెండు కీలక అంశాలపై పార్లమెంట్‌లో  కేంద్రం క్లారిటీ ఇచ్చింది. ఈ రెండు అంశాల్లో ఒకటి ఏపీ జీవనాడిగా పేరున్న పోలవరం.. మరొకటి ఏపీలో ప్రతి జిల్లా హైదరాబాద్ అవుతుందని ప్రతిపక్షంలో ఉన్నప్పుడు సీఎం జగన్ చెప్పిన ప్రత్యేకహోదా. అయితే ఈ రెండింటి విషయంలోనూ కేంద్రం పాజిటివ్‌గా స్పందించలేదు. 

పోలవరం గడువులోపు పూర్తి కావడం కష్టమే !

 నిర్ణీత గడువులోగా పోలవరం పూర్తి కావడం కష్టమని కేంద్ర ప్రభుత్వం స్పష్టం చేసింది. ఈ మేరకు పోలవరం ప్రాజెక్టు నిర్మాణం, ఖర్చు, జాప్యంపై రాజ్యసభలో వైఎస్ఆర్‌సీపీ ఎంపీ  సుభాష్ చంద్రబోస్  ప్రశ్న అడిగారు. దీనికి  కేంద్ర జల్‌శక్తిశాఖ సహాయ మంత్రి బిశ్వేశ్వర్‌ తుడు సమాధానం ఇచ్చారు. పోలవరం నిర్మాణంలో జాప్యం జరుగుతోందా అని   ఎంపీ ప్రశ్నించగా.. షెడ్యూల్‌ ప్రకారం 2024 మార్చి నాటికి పూర్తి కావాల్సి ఉందని కేంద్ర మంత్రి తెలిపారు. కానీ, వివిధ కారణాల దృష్ట్యా ఈ గడువులోగా ప్రాజెక్టు పూర్తి కావడం కష్టమని స్పష్టం చేశారు.

పోలవరానికి ఇవ్వాల్సింది రూ. 2,441  కోట్లు మాత్రమే !

2019 నుంచి ఇప్పటి వరకు 6461.88 కోట్లు ఏపీ ప్రభుత్వానికి విడుదల చేయడం జరిగిందని, 2013-14 అంచనాల ప్రకారం రూ. 29,027.95 కోట్లు ఉండగా, 2017-18 అంచనాల ప్రకారం రూ. 47,725.74 కోట్లు అయిందని బిశ్వేశ్వర్ తుడు అన్నారు. 2019 నుంచి ఇప్పటి వరకు పోలవరం ప్రాజెక్టు కోసం రూ. 6,461.88 కోట్లు కేంద్ర ప్రభుత్వం విడుదల చేసిందని చెప్పారు. 2016లో కేంద్ర ఆర్థిక శాఖ ఆమోదం మేరకు 100 శాతం ఇరిగేషన్ కాంపోనెంట్ నిధులను కేంద్రం తిరిగి చెల్లిస్తుందని.. ఈ మేరకు కేంద్ర ప్రభుత్వం చెల్లించాల్సిన మొత్తం రూ. 15,667.90 కోట్లు అన్నారు. ఇందులో ఇప్పటికే రూ. 13,226.04 కోట్లు చెల్లించామని, ఇంకా మిగిలిన బ్యాలెన్స్ నిధులు రూ. 2,441  కోట్లు మాత్రమేనని కేంద్రమంత్రి స్పష్టం చేశారు. 

ప్రత్యేకహోదా ప్రశ్నే లేదన్న కేంద్రం ! 

ప్రత్యేకహోదా అంశంపైనా సుభాష్ చంద్రబోస్ ప్రశ్న వేశారు. దీనికి  కేంద్ర మంత్రి రావు ఇంద్రజిత్ సింగ్ లిఖితపూర్వకంగా సమాధానం ఇచ్చారు. గతంలో జాతీయ అభివృద్ధి మండలి కొన్ని రాష్ట్రాలకు ప్రత్యేక హోదా కల్పించింది. కానీ ఆర్థిక సంఘం సిఫార్సుల మేరకే 2015-20 మధ్య రాష్ట్రాలకు పంచే పన్నుల వాటాను 32 శాతం నుంచి 42శాతానికి కేంద్రం పెంచింది. దీనికి కొనసాగింపుగా 15వ ఆర్థిక సంఘం కూడా 41శాతం పన్నుల వాటాకు సిఫార్సు చేసింది. నిధుల పంపిణీ ద్వారా వీలైనంత మేరకు ప్రతి రాష్ట్రానికి వనరులు అందించేందుకు కేంద్రం ప్రయత్నం చేస్తోంది. నిధుల పంపిణీ తరువాత కూడా వనరుల లోటు ఉండే రాష్ట్రాలకు.. రెవెన్యూ లోటు పూడ్చేందుకు గ్రాంట్స్ అందిస్తోందని అందుకే ప్రత్యేకహోదాను ఇప్పుడు ఎవరికీ కల్పించడం లేదని కేంద్రం తెలిపింది.

ఒకే రోజు వైఎస్ఆర్‌సీపీ ఎంపీ .. రెండు ఏపీ కీలక సమస్యలకు.. నిరాశజనకమైన మాధానాలు ప్రశ్నాల ద్వారా చెప్పించారు.