MLC Candidates: తెలుగు రాష్ట్రాల ఎమ్మెల్సీ ఎన్నికలకు బీజేపీ అభ్యర్థుల ఖరారు

తెలంగాణలో మహబూబ్ నగర్ - రంగారెడ్డి - హైదరాబాద్ స్థానానికి ఎ వెంకట నారాయణ రెడ్డిని బీజేపీ అధిష్ఠానం ఎంపిక చేసింది. 

ప్రతీకాత్మక చిత్రం

తెలుగు రాష్ట్రాల్లో త్వరలో జరగనున్న ఎమ్మెల్సీ ఎన్నికలకు సంబంధించి బీజేపీ అధిష్ఠానం అభ్యర్థుల పేర్లను ప్రకటించింది. ఏపీలో ఎన్నికలు జరగనున్న మూడు ఎమ్మెల్సీ స్థానాలకు, తెలంగాణ ఒక స్థానానికి అభ్యర్థులను బీజేపీ విడుదల చేసింది. 

ఏపీలో ప్రకాశం - నెల్లూరు - చిత్తూరు గ్రాడ్యుయేట్ ఎమ్మెల్సీ స్థానానికి సన్నారెడ్డి దయాకర్ రెడ్డిని ఖరారు చేశారు. కడప - అనంతపురం - కర్నూలు గ్రాడ్యుయేట్ స్థానానికి నాగరూరు రాఘవేంద్రను ఎంపిక చేశారు. శ్రీకాకుళం - విజయనగరం - విశాఖపట్నం గ్రాడ్యుయేట్ ఎమ్మెల్సీ స్థానానికి పీవీఎన్ మాధన్‌ను ఎంపిక చేశారు.

తెలంగాణలో మహబూబ్ నగర్ - రంగారెడ్డి - హైదరాబాద్ స్థానానికి ఎ వెంకట నారాయణ రెడ్డిని ఎంపిక చేసింది. 

ఫిబ్రవరి 16న ఎన్నికలకు నోటిఫికేషన్

ఎమ్మెల్సీ ఎన్నికలకు సంబంధించి ఇప్పటికే షెడ్యూల్ విడుదల అయిన సంగతి తెలిసిందే. ఫిబ్రవరి 16న నోటిఫికేషన్ వెలువడనుండగా, నామినేషన్లకు చివరి తేదీ ఫిబ్రవరి 23 గా ఉంది. మార్చి 13న పోలింగ్, మార్చి 16న కౌంటింగ్ ఉండనుంది. 

స్థానిక సంస్థల నియోజకవర్గాల్లో ఏపీ నుంచి అనంతపురం, కడప, నెల్లూరు, పశ్చిమ గోదావరి, తూర్పు గోదావరి, శ్రీకాకుళం, చిత్తూరు, కర్నూలు, తెలంగాణ నుంచి హైదరాబాద్ స్థానిక సంస్థల నియోజకవర్గం ఉన్నాయి. 

పదవీకాలం ముగుస్తున్న ఎమ్మెల్సీలు వీరే
1. యండపల్లి శ్రీనివాసులు రెడ్డి (ప్రకాశం-నెల్లూరు-చిత్తూరు పట్టభద్రుల నియోజకవర్గం)

2. గోపాల్ రెడ్డి వెన్నపూస (కడప-అనంతపురం-కర్నూలు పట్టభద్రుల నియోజకవర్గం)

3. పీవీఎన్ మాధవ్ (శ్రీకాకుళం - విజయనగరం - విశాఖపట్నం పట్టభద్రుల నియోజకవర్గం)

4. వి. బాలసుబ్రహ్మణ్యం (ప్రకాశం-నెల్లూరు-చిత్తూరు ఉపాధ్యాయుల నియోజకవర్గం)

5. కత్తి నరసింహా రెడ్డి (కడప-అనంతపురం-కర్నూలు ఉపాధ్యాయుల నియోజకవర్గం)

6. కాటేపల్లి జనార్థన్ రెడ్డి (మహబూబ్‌నగర్ - రంగారెడ్డి - హైదరాబాద్ ఉపాధ్యాయుల నియోజకవర్గం)