Har Ghar Tiranga : ఏపీలో ఘనంగా హర్ ఘర్ తిరంగా, 1.62 కోట్ల జాతీయ పతాకాల ఆవిష్కరణకు ప్లాన్ - సీఎం జగన్

Har Ghar Tiranga : దేశానికి స్వాతంత్ర్యం వచ్చి 75 ఏళ్లు గడుస్తున్న సందర్భంగా హర్ ఘర్ తిరంగా(ప్రతి ఇంటిపై జాతీయ జెండా) కార్యక్రమాన్ని నిర్వహిస్తున్నారు. ఏపీలో ఈ కార్యక్రమాన్ని విజయవంతం చేస్తామని సీఎం జగన్ తెలిపారు.

కేంద్ర హోంమంత్రి అమిత్ షా వీడియో కాన్ఫరెన్స్

Har Ghar Tiranga : వివిధ రాష్ట్రాల ముఖ్యమంత్రులతో  కేంద్ర హోంమంత్రి అమిత్‌షా న్యూదిల్లీ నుంచి వీడియో కాన్ఫరెన్స్ నిర్వహించారు. ఆజాదీ కా అమృత్‌ మహాత్సవ్‌ సందర్భంగా ‘‘హర్‌ ఘర్‌ తిరంగా’’ కార్యక్రమంపై వీడియో కాన్ఫరెన్స్ నిర్వహించారు. తాడేప‌ల్లిలోని క్యాంప్ కార్యాలయం నుంచి వీడియో కాన్ఫరెన్స్ ద్వారా సీఎం జ‌గ‌న్ ఈ కార్యక్రమంలో పాల్గొన్నారు. దేశానికి స్వాతంత్య్రం వచ్చి 75 సంవత్సరాలు పూర్తవుతున్న సందర్భంగా ఘనంగా హర్‌ ఘర్‌ తిరంగా కార్యక్రమంపై ఈ సమావేశంలో చర్చ జ‌రిగింది. ఏపీలో హర్‌ ఘర్‌ తిరంగా కార్యక్రమాన్ని ఘనంగా నిర్వహిస్తామని, దేశభక్తిని, జాతీయ భావాన్ని పెంపొందించేలా పలు కార్యక్రమాలు రూపకల్పన, ఆగష్టు 13 నుంచి 15 వరకు హర్‌ ఘర్‌ తిరంగా కార్యక్రమం, 1.62 కోట్ల జాతీయ పతాకాల ఆవిష్కరణకు ప్లాన్ చేస్తున్నామ‌ని సీఎం జ‌గ‌న్ అన్నారు. 

ఘనంగా హర్ ఘర్ తిరంగా 

వీడియో కాన్ఫరెన్స్‌లో సీఎం జగన్ మాట్లాడుతూ.. దేశానికి స్వాతంత్య్రం వచ్చి 75 సంవత్సరాలు పూర్తికావొస్తున్న సందర్భంగా హర్‌ ఘర్‌ తిరంగా కార్యక్రమం ద్వారా పౌరుల్లో దేశభక్తి భావనను పెంపొందించడానికి ఏపీ ప్రభుత్వం కృతనిశ్చయంతో ఉందన్నారు. ఈ కార్యక్రమాన్ని దిగ్విజయం చేయడానికి రాష్ట్ర ప్రభుత్వం అనేక చర్యలు తీసుకుందని తెలిపారు. పలు ప్రభుత్వ విభాగాలతో ఇప్పటికే సమీక్ష కూడా నిర్వహించామన్నారు.  ఈ కార్యక్రమం గురించి ప్రజలకు వివరించేందుకు ప్రచార కార్యక్రమాలు నిర్వహించామన్నారు.  పత్రికల్లో ప్రకటనలు, హోర్డింగ్స్, పలు గీతాలు రూపొందించామని సీఎం జగన్ తెలిపారు. ప్రజల్లో చైతన్యం కలిగించేందుకు సినిమా హాళ్లలో సంక్షిప్త చిత్రాలను ప్రదర్శించామన్నారు. ర్యాలీలు, సైకిల్‌ర్యాలీలు ఏర్పాటుచేసినట్లు తెలిపారు. పోస్టర్లతో పాటు పలు కథనాలు కూడా ప్రచురించామన్నారు. 

ప్రతి ఇంటిపై జాతీయ జెండా  

" రాష్ట్రంలో పరిశ్రమలతో పాటు అన్ని సంస్థలు, దుకాణాలు, వాణిజ్య సముదాయాలపై జాతీయ పతాకాన్ని ఎగురవేసేలా ప్రజల్ని చైతన్య పరిచాం. సీఎస్‌ఆర్‌ కార్యక్రమంలో భాగంగా వారి ఉద్యోగులకు  జాతీయ పతాకాన్ని పంపిణీ చేయాలని నిర్ధేశించాం. ప్రభుత్వ కార్యాలయాల వద్ద అధికారులు జాతీయ జెండాను ఆవిష్కరించాలని చెప్పాం. అదే విధంగా ప్రభుత్వ ఉద్యోగులు వారి నివాసాలపై జెండాలు ఎగురవేయాలని చెప్పాం. 5.24 లక్షల రేషన్‌ దుకాణాలు, 15 వేల గ్రామ, వార్డు సచివాలయాల్లో జాతీయ పతాకాన్ని ఎగురవేస్తున్నారు. అంగన్‌వాడీ వర్కర్లు, ఆశావర్కర్లు కూడా వారి కార్యాలయాల్లో జాతీయ జెండాలను ఎగురవేస్తారు. 1.20 లక్షల గ్రామ, వార్డు సచివాలయాల సిబ్బంది, 2.60 లక్షల మంది వాలంటీర్లు కూడా జాతీయ జెండాలను పంపిణీ చేసి ఈ కార్యక్రమంలో భాగస్వామ్యులవుతారు. 1.62 కోట్ల జాతీయ పతాకాలను ప్రతి ఇంటికీ పంపిణీ చేస్తారు. ప్రతి ఇంటిపైనా, సంస్థ పైనా జాతీయ పతాకాన్ని ఎగరవేయడం ద్వారా హర్‌ ఘర్‌ తిరంగా కార్యక్రమాన్ని విజయవంతం చేస్తాం. "

--సీఎం జగన్