పోలీసులతో నిందితుడి ఫ్రెండ్‌షిప్‌- అంధురాలి హత్య కేసులో కొత్త కోణం!

ఆంధ్రప్రదేశ్‌లో హైసెక్యూరిటి జోన్ అది. ఏపీలో ఎక్కడా లేని పోలీస్ భద్రత అక్కడే ఉంటుంది. కానీ అత్యంత కిరాతకంగా అంధురాలి హత్య జరిగిపోయింది. దీంతో పోలీసులపై తీవ్ర స్థాయిలో విమర్శలు వెల్లువెత్తుతున్నాయి. 

పోలీసులతో నిందితుడి ఫ్రెండ్‌షిప్‌- అంధురాలి హత్య కేసులో కొత్త కోణం!

తాడేపల్లి ప్రాంతంలో అత్యంత ఘోరమైన హత్య జరిగింది. ఆంధ్రప్రదేశ్ ముఖ్యమంత్రి వైస్ జగన్ మోహన్ రెడ్డి క్యాంప్ కార్యాలయానికి అత్యంత సమీపంలో అంధురాలిని హత్య చేశాడు నిందితుడు రాజు. దీంతో పోలీసుల పని తీరుపై ఇప్పుడు సర్వత్రా చర్చ జరుగుతోంది. అత్యంత కట్టుదిట్టమైన పోలీసు నిఘా ఉండే ప్రాంతంలోనే అంధురాలై బాలిక హత్యకు గురైంది. నిందితుడు పట్టపగలు ఇంట్లోకి వెళ్లి అత్యంత కీరాతకంగా హత్యకు పాల్పడ్డాడు. దీంతో ప్రతిపక్షాలు పోలీసులు, ప్రభుత్వం వైఫల్యంపై విమర్శలు గుప్పిస్తున్నాయి. 

ప్రతిపక్ష నేతగా ఉన్న చంద్రబాబు తాడేపల్లి పోలీస్ స్టేషన్ పరిధిలోనే నివాసం ఉంటున్నారు. అంటే ఇద్దరు కీలక నేతలు ఒకే పోలీస్ స్టేషన్ పరిధిలో ఉంటున్నా ఇలాంటి ఆరోపణలు రావటంపై సర్వత్రా చర్చనీయాశంగా మారింది.

సీఎం నివాసానికి సమీపంలో ఘటన...

ఏపీలో రాజకీయం ఎప్పుడు ఎలాంటి మలుపులు తిరుగుతాయో తెలియదు. తాజాగా సీఎం నివాసానికి కూతవేటు దూరంలోనే రాణి అనే అంధురాలి హత్య వ్యవహరం తీవ్ర దుమారాన్ని రాజేస్తోంది. పోలీసులు నిర్లక్ష్యం వలనే ఒక నిండు ప్రాణం బలి అయ్యింది అని స్థానికులు ఆరోపిస్తున్నారు. గతంలో కూడా పెనుమాక, కుంచనపల్లికి చెందిన ఇద్దరు చదువుకునే విద్యార్థులను డ్రగ్స్ కేసులో హైదరాబాద్ పోలీసులు అరెస్టు చేసి తీసుకెళ్లిన విషయాన్ని స్థానికులు ప్రస్తావిస్తున్నారు. హైదరాబాద్ పోలీసులు వచ్చి తీసుకెళ్లే వరకు కూడా తాడేపల్లి పోలీసులు నిద్రావస్థలో ఉన్నారా అనే విమర్శలను తాడేపల్లి పోలీసులు ఎదుర్కోవాల్సి వచ్చింది. తాడేపల్లి పోలీసులు నిఘా లోపించడం వలనే హైదరాబాద్ పోలీసులు చర్యలు తీసుకున్నారా అంటూ రాజకీయంగా విమర్శలు కూడా వ్యక్తం అయ్యాయి.

స్టేషన్ పరిధిలో సిబ్బంది ఫుల్ అయినా 

తాడేపల్లి పోలీసు స్టేషన్‌లో ఇద్దరు సీఐలు, నలుగురు ఎస్సైలు ఉన్నప్పటికీ నిఘా లోపాలు తలెత్తుతున్నాయి. ముఖ్యమంత్రి నివాసం వద్ద జరిగిన ఈ ఘటనతో తాడేపల్లిలో నిఘా వైఫ్యలం ఎంత ఉందో అర్థం చేసుకోవచ్చని రాజకీయ పార్టీలు విమర్శలు చేస్తున్నాయి. నిఘా వర్గాలు సైతం సరిగ్గా పని చేయడం లేదు అనే ఆరోపణలు వినిపిస్తున్నాయి. గంజాయి, రౌడీ షీటర్లపై నిఘా లేకపోవటంతోనే ఈ ఘటన జరిగిందని స్థానికులు అభిప్రాయం వ్యక్తం చేస్తున్నారు. తాడేపల్లి స్టేషన్‌లోని పోలీసులు, నిఘా వర్గాలు ఏళ్ల తరబడి ఒకే చోట విధులు నిర్వహించడంతో ఇలాంటి దారుణాలు జరుగుతున్నాయనే విమర్శ కూడా ఉంది. 

నిందితుడితో పోలీసులకు ఫ్రెండ్ షిప్..

అంధురాలు హత్య కేసులో నిందుతుడు కుక్కల రాజుకు కొందరు పోలీసులతో స్నేహా సంబంధాలు ఉన్నాయనే ఆరోపణలు వ్యక్తం అవుతున్నాయి. దీంతో పోలీసులు కుక్కల రాజు మీద ఎన్నిసార్లు ఫిర్యాదు చేసిన పట్టించుకోలేదనే విమర్శలు కూడా ఉన్నాయి. పొలీసుల భయం ఉంటే నిందితుడు రాజు ఈ హత్యకు పాల్పడి ఉండే వాడు కాదని స్థానికులు చెబుతున్నారు.

వీవీఐపీ జోన్‌లో పోలీసులపై ఒత్తిడి...

తాడేపల్లి పోలీస్ స్టేసన్ ఇప్పుడు వీవీఐపీ జోన్‌లో ఉంది. తాడేపల్లి పోలీస్ స్టేషన్‌లో పని చేసే సిబ్బందితోపాటుగా, అదనంగా వందల సంఖ్యలో పోలీసులు నిత్యం విధులు నిర్వర్తిస్తారు. అయితే వారంతా కేవలం వీవీఐపీ సేవలోనే ఉంటారు. స్థానికంగా శాంతి భద్రతల వ్యవహరం కానీ, ట్రాఫిక్ సమస్య కానీ, ఎదైనా అనుకోని ఘటన జరిగినా ఎదుర్కోవటానికి కానీ కనీసం ప్రయత్నించరు. దీంతో వీఐపీ జోన్‌లో ఏది జరిగినా పోలీసులపై ఒత్తిడి పెద్ద ఎత్తున పెరిగిపోతుంది.