Hamas Leader Killed In Israel Attack | హమాస్ కీలక నేతను మట్టుబెట్టిన ఇజ్రాయేల్ | ABP Desam

ఇజ్రాయేల్ హమాస్‌ని పూర్తిగా అంతం చేసేంత వరకూ వదిలేలా లేదు. ఈ మధ్యే సౌత్ గాజాలో హమాస్ చీఫ్ సిన్వర్‌ని మట్టుబెట్టింది. ఆ తరవాత కూడా గాజాలో హమాస్ స్థావరాలపై దాడులు కొనసాగిస్తోంది. ఈ క్రమంలోనే మరో హమాస్ కీలక నేతనీ చంపేసింది. ఇజ్ అల్ దిన్ కసబ్‌ని మట్టుబెట్టినట్టు ప్రకటించింది. ఈ దాడికి సంబంధించిన ఓ వీడియోనీ విడుదల చేసింది. నవంబర్ 1వ తేదీన గగనతలం నుంచి కసబ్ ప్రయాణిస్తున్న కార్‌పై బాంబు విసిరింది ఇజ్రాయేల్ ఆర్మీ. సౌత్ గాజాలోని ఖాన్ యూనిస్ ప్రాంతంలో ఈ అటాక్‌ చేసింది. ఈ ఘటనలో అల్ దిన్ కసబ్ అక్కడికక్కడే ప్రాణాలు కోల్పోయాడని ఇజ్రాయేల్ ప్రకటించింది. ఈ వీడియో సోషల్ మీడియాలో వైరల్ అవుతోంది. అటు గాజా స్ట్రిప్‌పైనా ఇజ్రాయేల్ దాడులు కొనసాగుతున్నాయి. 24 గంటల్లో ఈ ప్రాంతంలో 50 మందికి పైగా ప్రాణాలు కోల్పోయారు. గతేడాది అక్టోబర్ 7న మొదలైన యుద్ధం రోజురోజుకీ తీవ్రతరమవుతోంది.