Nellore News: సోమశిలకు భారీగా వరద నీరు.. ఒక గేటు ఎత్తి నీటి విడుదల

సోమశిల గేట్లు ఎత్తి నీరు విడుదల చేశారు. ఈ కార్యక్రమంలో మంత్రి గౌతమ్‌రెడ్డి, ఎమ్మెల్యేలు ఆనం రాంనారాయణరెడ్డి, కాకాణి పాల్గొన్నారు. గత మూడు రోజులుగా కురిసిన వర్షాలకు పెన్నా నది పోటెత్తి... సోమశిలకు భారీగా వరద నీరు చేరింది. అందుకే ఒక గేటు ఎత్తి నీరు విడుదల చేశారు. సోమశిల ప్రాజెక్ట్ ఆప్రాన్ మరమ్మతులపై మంత్రి మేకపాటి గౌతమ్ రెడ్డి స్పందించారు. డ్యామ్ గేట్లు ఎత్తి నీటిని కిందకు వదిలిన అనంతరం ఆయన మీడియాతో మాట్లాడారు. మరమ్మతు పనులు త్వరలో మొదలు పెడతామని స్పష్టం చేశారు. సోమశిల ప్రాజెక్ట్ ఆప్రాన్ మరమ్మతు పనులు వీలైనంత త్వరలో మొదలు పెడతామని చెప్పారు మంత్రి మేకపాటి గౌతమ్ రెడ్డి. గతంలో వరుసగా మూడు సార్లు వరద నీటిని కిందకు విడుదల చేయాల్సి రావడంతో డౌన్ స్ట్రీమ్ ఆప్రాన్ ధ్వంసమైందని, దాని మరమ్మతులకోసం నిపుణుల కమిటీ వచ్చి పరిశీలించి వెళ్లిందని చెప్పారు. ఆప్రాన్ ధ్వంసమైనంత మాత్రాన సోమశిల డ్యామ్ కి నష్టం వాటిల్లే అవకాశమేమీ లేదని అన్నారు.