Hot Oil on Face: అక్క ముఖంపై సలసల కాగే నూనె పోసేసిన చెల్లి, అర్ధరాత్రి అంతా నిద్రిస్తుండగా - కారణం ఏంటంటే

Kamareddy: అర్ధ రాత్రి అక్క చాందినీ నిద్రపోయి ఉండగా, చెల్లెలు నూనెను వేడి చేసి ఆమె ముఖంపై పోసింది. దీంతో ముఖంపై ఆ నూనె పడిన ప్రదేశం మొత్తం కాలిపోయింది.

ప్రతీకాత్మక చిత్రం (Picture Credit: pixabay.com)

Kamareddy News:

తోడబుట్టిన అక్క పట్ల ఓ చెల్లెలు అత్యంత కిరాతకంగా వ్యవహరించిన ఘటన కామారెడ్డి జిల్లాలో జరిగింది. ఆ యువతి ఇలా విచక్షణ లేకుండా ప్రవర్తించిన తీరు ఆ ప్రాంతంలో తీవ్ర చర్చనీయాంశం అయింది. అక్క ముఖంపై సొంత చెల్లెలు సల సల కాగుతున్న వేడి నూనె పోసింది. కామారెడ్డి జిల్లా కేంద్రంలోని అశోక్ నగర్ కాలనీలో జరిగింది. తాను దగ్గరగా ఉంటున్న అదే వ్యక్తితో తన అక్క కూడా సన్నిహితంగా ఉండడం గమనించి ఆమె ఓర్వలేకపోయింది. ఆ ఉక్రోషం తట్టుకోలేకనే చెల్లెలు తన అక్కపై ఈ అఘాయిత్యానికి పాల్పడినట్లుగా తెలుస్తోంది. 

అర్ధ రాత్రి అక్క చాందినీ నిద్రపోయి ఉండగా, చెల్లెలు నూనెను వేడి చేసి ఆమె ముఖంపై పోసింది. దీంతో ముఖంపై ఆ నూనె పడిన ప్రదేశం మొత్తం కాలిపోయింది. వేడి నూనె బాధకు తట్టుకోలేక చాందినీ గట్టిగా కేకలు వేయడంతో కుటుంబ సభ్యులు ఉలిక్కిపడి నిద్రలేచారు. కంగారు పడ్డ వారు వెంటనే ఆమెను ఆస్పత్రికి తరలించారు. వైద్యులు చికిత్స ప్రారంభించారు. ప్రస్తుతం ఆమె పరిస్థితి విషమంగా ఉందని డాక్టర్లు తెలిపారు. ఈ ఘటనపై పోలీసులకు సమాచారం అందడంతో నిందితురాలిపై కేసు నమోదు చేసినట్లుగా పోలీసులు తెలిపారు. అక్క పట్ల కనీస మానవత్వం లేకుండా ప్రవర్తించిన చెల్లెలి తీరుపై కుటుంబ సభ్యులు కన్నీరుమున్నీరయ్యారు.

ముంబయిలోనూ ఇలాంటి ఘటనే..
రెండు రోజుల క్రితం మహరాష్ట్రలోని ముంబయిలోనూ ఇలాంటి ఘటనే జరిగింది. ఇద్దరు చిరువ్యాపారుల మధ్య గొడవ ఓ బాలిక ప్రాణాల మీదకు తెచ్చింది. ముంబయి సబర్బన్ కుర్లాలో ఇద్దరు పావ్ భాజి వ్యాపారులు ఇంటి విషయంలో ఘర్షణ పడ్డారు. ఒకరిపై మరొకరు తీవ్రంగా తిట్టుకుంటూ వేడి వేడి నూనెను విసురుకున్నారు. అదే సమయంలో ఆ దుకాణానికి వచ్చిన 8 సంవత్సరాల బాలికపై ఆ వేడి నూనె పడటంతో ముఖమంతా కాలిపోయింది. ఛాతీ కూడా పూర్తిగా కాలిపోవడంతో చికిత్స కోసం వెంటనే ఆసుపత్రికి తరలించారు. 

వసీం ఖలీల్ అన్సారీ, ముస్తకీమ్ హమీక్‌ అన్సారీ మధ్య గొడవ మరింత పెద్దది కావడంతో ఖలీల్‌ కడాయితో కొట్టాడు. అందుకు ప్రతిగా హమీక్ అన్సారీ ఖలీల్ అన్సారీపై కళాయిలో ఉన్న వేడి వేడి నూనెను విసిరికొట్టాడు. అదే సమయంలో పావ్ బాజీ కొనుక్కునేందుకు షాపు దగ్గరకు వచ్చిన 8 సంవత్సరాల అఫ్సీన్‌ షేక్‌ అనే బాలిక ముఖంపై నూనె పడింది. అంతే కళాయిలోని కాలిపోతున్న నూనె చిన్నారిపై పడటంతో గట్టిగా ఏడుస్తూ కేకలు పెట్టింది. బాలికతో పాటు ఆమె వెంట వచ్చిన 76 సంవత్సరాల మున్వర్ అలీకి స్వల్ప గాయాలయ్యాయి. స్థానికులు వెంటనే బాలికను ఆసుపత్రికి తరలించారు.