Eleti Maheshwar Reddy: నావల్లే ఇబ్బందులు అంటే చెప్పండి, పార్టీని వీడతాను ?: కాంగ్రెస్ నేత ఫైర్

Eleti Maheshwar Reddy: ఏఐసీసీ నేతకు పీసీసీ షోకాజ్ నోటీసులు ఇవ్వడం ఏంటని కాంగ్రెస్ నేత ఎలేటి మహేశ్వర్ రెడ్డి అన్నారు. తనకు షోకాజ్ నోటీసులు ఇచ్చే అధికారం మీకెక్కడిదని ప్రశ్నించారు. తాను పార్టీని వీడాలంటే ఒక్క నిమిషం పట్టదని.. కానీ తనకు ఆ ఆలోచన ఎప్పుడూ రాలేదన్నారు. సీఎం కేసీఆర్ ఇచ్చిన ఆఫర్ ను కూడా తాను తిరస్కరించానని చెప్పుకొచ్చారు. ఎన్ని ఇబ్బందులు పెట్టినా బాధ పడలేదని అన్నారు. ఎక్కడో సోషల్ మీడియాలో, టీవీల్లో వార్తలు వస్తే తనపై షోకాజ్ ఇస్తారా అని ప్రశ్నించారు.

నావల్లే ఇబ్బందులు అంటే చెప్పండి, పార్టీని వీడతాను ? 
తన వల్ల ఏమైనా ఇబ్బందులు ఉంటే చెప్పండని, పార్టీ నుంచి వెళ్లిపోతానని అన్నారు. పార్టీలు మారే వారు తనపై ఆరోపణలు చేస్తారా అని మండిపడ్డారు ఎలేటి మహేశ్వర్ రెడ్డి. మచ్చ లేని మనిషిని, ఆస్తులు అమ్ముకొని రాజకీయాలు చేశారన్నారు. నా మీద కోపం ఉంటే చెప్పండి కానీ ఇలా అవమానిస్తారా అని ప్రశ్నించారు. తన మీద పగ పట్టారని.. తనను పార్టీ నుండి పంపించడానికి కుట్ర పన్నుతున్నారని ఆరోపించారు. పార్టీ మీద పట్టుకోసం పార్టీనే కబ్జా చేస్తామంటే మీ ఇష్టం అని అన్నారు.

మరోవైపు పీసీసీ చీఫ్ రేవంత్ రెడ్డితో నిన్ననే మాట్లాడానని ఎలేటి మహేశ్వర్ రెడ్డి వెల్లడించారు. కాంగ్రెస్ లో గ్రూపులు సహజం అని, బీజేపీ నాయకుల్ని నేరుగా కలిసిన వారికి ఎలాంటి నోటీసులు ఎందుకు ఇవ్వలేదో చెప్పాలన్నారు. అలాగే తనకు షోకాజ్ నోటీసులు ఎందుకు ఇచ్చారో చెప్పాలని అడిగారు.