Adilabad News: అడవిలో 7 కిలోమీటర్లు బైక్ పై ప్రయాణించిన ఆదిలాబాద్ ఎస్పీ, ఎందుకో తెలుసా..?
ఆదిలాబాద్ జిల్లా బీంపూర్ మండలంలోని మారుమూల గ్రామాలైన టెకిడి రాంపూర్, గుబిడి, భగవాన్ పూర్, కరంజీ గ్రామాలను బైకు మీద సందర్శించి ప్రజలతో పోలీసు మీకోసం కార్యక్రమాలను నిర్వహించారు.
Adilabad SP ride a bike for 7 kilometers in forest | ఆదిలాబాద్ జిల్లా ఎస్పీ అఖిల్ మహాజన్ అడవిలో ఓ గ్రామానికి వెళుతూ ఏడు కిలోమీటర్లు బైక్ పై ప్రయాణించారు. ఎస్పీ స్వయంగా బైక్ నడుపుతూ ఏడు కిలోమీటర్లు అడవిలో ప్రయాణించారు. బీంపూర్ మండలంలోని మారుమూల గ్రామాలైన గుబిడి, టెకిడి రాంపూర్, కరంజీ, భగవాన్ పూర్ గ్రామాలను సందర్శించి ప్రజలతో పోలీసు మీకోసం కార్యక్రమాలను నిర్వహించారు. అడవిలో అత్యంత మారుమూల గ్రామమైన భగవాన్ పూర్ కు 7కిలోమీటర్ల దూరం బైక్ పై ప్రయాణించి గ్రామానికి చేరుకున్నారు. ఎస్పీ స్వయంగా బైక్ నడుపుతూ అడవిలో ప్రయాణించడం అందరిని ఆసక్తి కలిగించింది. అనంతరం గ్రామంలో పోలీసులు మీకోసం కార్యక్రమంలో భాగంగా గ్రామస్తులతో కలిసి మాట్లాడారు.
గంజాయి జోలికెళ్తే కేసులు, ప్రభుత్వ పథకాలు బంద్
ఆదిలాబాద్ జిల్లా పోలీసులు ప్రజలలో మమేకమై ప్రజలకు అత్యంత చేరవై పోలీసు సేవలను అందించడానికి నిరంతరం కృషి చేస్తున్నారని జిల్లా ఎస్పీ అఖిల్ మహాజన్ తెలిపారు. యువతకు కల్పించిన ఉపాధి అవకాశాలను అందిపుచ్చుకొని గ్రామ పేరును కీర్తి ప్రతిష్టలను పెంపొందించాలని ఎస్పి అఖిల్ మహజన్ అన్నారు. అదేవిధంగా గ్రామాలలో మాదకద్రవ్యాలకు దూరం ఉండేలా, ఎలాంటి గంజాయిని పండించకూడదని, ఎవరూ సేవించకూడదని తెలిపారు. చట్ట వ్యతిరేకంగా గంజాయిని పండించిన వారిపై కేసులు నమోదు చేస్తూ ప్రభుత్వ పథకాలు రాకుండా జిల్లా యంత్రాంగానికి సిఫార్సు చేయబడుతుందని తెలిపారు.
జిల్లా కేంద్రంలో జాబ్ మేళా
నిరుద్యోగ యువతీ యువకులకు త్వరలోనే ఆదిలాబాద్ జిల్లా కేంద్రంలో జాబ్ మేళాను నిర్వహించడం జరుగుతుంది. ఎక్కువ సంఖ్యలో యువత పాల్గొని ఉద్యోగాలు సాధించి.. వచ్చిన ప్రదేశంలో ఉద్యోగాల నిర్వహించాలని సూచించారు. అదేవిధంగా యువత క్రీడారంగంలోనూ అభివృద్ధి చెందాలని నాలుగు గ్రామాలలో వాలీబాల్ కిట్లు, క్రికెట్ కిట్లను అందజేసి క్రీడారంగంలో అభివృద్ధి చెందాలని ఆకాంక్షించారు. చిన్నపిల్లలకు చదువు ఒక ప్రాధాన్యతను తెలియజేసి ప్రతి ఒక్కరూ చదువుకునేలా తల్లిదండ్రులు ప్రోత్సహించాలని తెలిపారు. చదువు వల్ల భవిష్యత్తు మారుతుందని, ఉజ్వల భవిష్యత్తు సాధించవచ్చని తెలిపారు.
వాట్సాప్ నెంబర్కు సమాచారం అందించండి
ప్రభుత్వ ప్రైవేటు ఉద్యోగాలు సాధించి గ్రామ అభివృద్ధికి తోడ్పడాలని ఎస్పీ సూచించారు. ఈ సరిహద్దు గ్రామం మహారాష్ట్రతో అనుసంధానంతో ఉన్నందున ఎలాంటి అసాంఘిక కార్యకలాపాలు జరగకుండా, ఎలాంటి సమాచారం అయినా సరే తన వద్ద ఉండే ప్రత్యేకంగా నిర్వహించబడుతున్న 8712659973 అనే నెంబర్ కు వాట్సప్ ద్వారా తెలియజేయాలని, సమాచారం అందించిన వారి వివరాలు గోప్యంగా ఉంచబడతాయని తెలిపారు.
మహిళలకు అండగా నిలుస్తున్న షీ టీమ్స్
ఆదిలాబాద్ జిల్లాలో షీ టీం బృందం మహిళలకు అండగా ఉందని, మహిళల వేధింపుల పట్ల కళాశాలలో, పాఠశాలలో, విద్యార్థినిలకు ఎలాంటి సమస్యలున్న షీ టీం బృందాలకు తెలియజేయాలని సూచించారు. షీ టీం నెంబర్ 8712659953 కు సంప్రదించాలని తెలిపారు. ఈ కార్యక్రమంలో ఆదిలాబాద్ డిఎస్పి ఎల్. జీవన్ రెడ్డి, జైనథ్ సిఐ డి.సాయినాథ్, బీంపూర్ ఎస్సై పీర్ సింగ్ నాయక్, గ్రామ పెద్దలు,పోలీస్ సిబ్బంది తదితరులు పాల్గొన్నారు.
టాప్ హెడ్ లైన్స్
ట్రెండింగ్ వార్తలు
