Bolarum Arms Theft: రిటైర్డ్ ఆర్మీ అధికారి ఇంట్లోనే ఆయుధాలు - పక్కాగా చోరీ - సంచలన వివరాలు వెల్లడించిన డీజీపీ
Army Weapons Stolen Recovered: బొల్లారం ఆర్మీ ఆయుధాల చోరీ కేసును ఛేదించిన పోలీసులు. ఆయుధాల స్వాధీనం చేసుకున్నారు. చోరీ ఎలా జరిగిందో డీజీపీ వివరించారు.
Bolarum Madras Regiment Arms Case: సికింద్రాబాద్ బొల్లారంలోని 20 మద్రాస్ రెజిమెంట్ ఆర్మీ ఆర్మరీలో ఆయుధాలు, భారీగా బుల్లెట్లు మాయమైన కేసును తెలంగాణ పోలీసులు, మిలటరీ ఇంటెలిజెన్స్ , ఎన్‌ఐఏ సంయుక్తంగా ఛేదించాయి. దేశవ్యాప్తంగా తీవ్ర కలకలం రేపిన ఈ హై-ప్రొఫైల్ కేసు పురోగతిపై తెలంగాణ డీజీపీ ప్రెస్ మీట్ నిర్వహించి, దర్యాప్తు వివరాలను మీడియాకు వెల్లడించారు. గత 10 రోజులుగా సాగిన ఉత్కంఠకు తెరదించుతూ, చోరీకి గురైన ఆయుధాలను రికవరీ చేయడంతో పాటు ఈ దందాల వెనుక ఉన్న ఇంటి దొంగల స్కెచ్‌ను పూర్తి ఆధారాలతో బయటపెట్టారు.
ఈ కేసుకు సంబంధించిన దర్యాప్తు వివరాలను వెల్లడిస్తూ, ఇది బయటి వ్యక్తులు వచ్చి ఒకే రోజులో చేసిన చోరీ కాదని, ఆర్మీ క్యాంప్‌లోని అంతర్గత సిబ్బంది పక్కా ప్లాన్ ప్రకారం మూడు నెలలుగా దశలవారీగా చేసిన అక్రమ తరలింపు అని డీజీపీ స్పష్టం చేశారు. ఆర్మరీ లోపల భద్రతా లోపాలను ఆసరాగా చేసుకుని, రాత్రి వేళల్లో సీసీటీవీ కెమెరాలను ఆపివేయడం ద్వారా ఆయుధాలను బయటకు దాటించారని విచారణలో తేలింది. దర్యాప్తు బృందాలు పక్కా ఆధారాలతో మాజీ ఆర్మీ ఉద్యోగి సహా అంతర్గత భాగస్వాములను అదుపులోకి తీసుకుని ప్రశ్నించడంతో ఈ భారీ కుట్ర కోణం వెలుగులోకి వచ్చిందని తెలిపారు.
మహబూబ్‌నగర్ పరిధిలోని ఒక మాజీ ఆర్మీ ఉద్యోగి నివాసంతో పాటు పరిసర ప్రాంతాల్లో నిర్వహించిన ప్రత్యేక సోదాల్లో మాయమైన ఆయుధాలను, మందుగుండు సామగ్రిని టాస్క్‌ఫోర్స్ , స్థానిక పోలీసులు స్వాధీనం చేసుకున్నారని డీజీపీ వెల్లడించారు. 4 ఏకే-47 అసాల్ట్ రైఫిళ్లు, ఇన్సాస్ రైఫిళ్లు, 9mm పిస్టళ్లు, నైట్ విజన్ పరికరాలు , 2,000కు పైగా లైవ్ బుల్లెట్లతో పాటు మ్యాగజైన్లను భద్రతా దళాలు సీజ్ చేసినట్లు పేర్కొన్నారు. ఆయుధాల సేకరణ వెనుక ఏవైనా తీవ్రవాద నెట్‌వర్క్‌లు, గ్యాంగ్‌స్టర్ ముఠాల ప్రమేయం ఉందా అనే కోణంలో ఇంకా లోతైన విచారణ సాగుతోందన్నారు.
ఆర్మీ డిపో భద్రతలో చోటుచేసుకున్న సాంకేతిక, పర్యవేక్షణ వైఫల్యాలను డీజీపీ ప్రత్యేకంగా ప్రస్తావించారు. రాత్రి వేళల్లో ఆర్మరీ పరిసరాల్లో సీసీ కెమెరాలు ఆఫ్‌ కావడం, భద్రతా అలారాలు పనిచేయకపోవడం వెనుక లోపలి అధికారుల ప్రమేయం స్పష్టంగా కనిపిస్తోందన్నారు. కేవలం వర్షం పడిన రాత్రి తాళాలు పగలగొట్టి బయటి దొంగలు దోచుకెళ్లారనేలా డ్రామా ఆడారని, అయితే ఫొరెన్సిక్ , సైంటిఫిక్ ఆధారాల సాయంతో ఆ నాటకాన్ని పోలీసులు పటాపంచలు చేశారని డీజీపీ వివరించారు.
ఆయుధాలు సురక్షితంగా రికవరీ కావడంతో నగర పౌరులు ఎలాంటి భయాందోళనలకు గురికావాల్సిన అవసరం లేదని డీజీపీ భరోసా ఇచ్చారు. ఈ చోరీ ఘటనతో సెక్యూరిటీ నెపంతో మూసివేసిన కెంటోన్మెంట్ రోడ్ల రవాణా పునరుద్ధరణకు, సివిల్ ట్రాఫిక్ ఇబ్బందుల పరిష్కారానికి ఆర్మీ ఉన్నతాధికారులతో మాట్లాడుతున్నామని చెప్పారు. దేశ భద్రతకే ముప్పుగా మారిన ఈ కేసుకు సంబంధించి బాధ్యులైన ఎంతటివారినైనా వదిలిపెట్టేది లేదని, భారతీయ న్యాయ సంహిత, ఆర్మ్స్ యాక్ట్ కింద కఠిన చట్టపరమైన చర్యలు ఉంటాయని డీజీపీ స్పష్టం చేశారు.
టాప్ హెడ్ లైన్స్
ట్రెండింగ్ వార్తలు
