Hyderabad: బైక్‌ నడుపుతూనే యువకుడి లైంగిక దాడి! చావుబతుకుల మధ్య యువతి

లైంగిక దాడి గమనించి తప్పించుకొనే క్రమంలో యువతి కింద పడిపోయి ప్రాణాల మీదకు తెచ్చుకుంది. ప్రస్తుతం ఆమె పరిస్థితి విషమంగా ఉందని డాక్టర్లు చెప్పారు.

ప్రతీకాత్మక చిత్రం

హైదరాబాద్‌లో ఓ ఆకతాయి యువతిపై లైంగిక దాడికి పాల్పడ్డాడు. అది కూడా బైక్ పై ఉండగా, యువతిని తానే బైక్ ఎక్కించుకొని, నడుపుతూనే లైంగిక దాడి చేశాడు. నగరంలోని తార్నాకలో ఈ ఘటన జరిగింది. లైంగిక దాడి గమనించి యువతి బైక్ దిగే క్రమంలో కింద పడిపోయి ప్రాణాల మీదకు తెచ్చుకుంది. ప్రస్తుతం ఆమె పరిస్థితి విషమంగా ఉందని డాక్టర్లు చెప్పారు. అయితే, ఈ ఘటన కొద్ది వారాల క్రితం అర్ధరాత్రి 11 గంటల సమయంలో జరగ్గా ఆలస్యంగా వెలుగు చూసింది.

పోలీసులు, స్థానికులు వెల్లడించిన వివరాల ప్రకారం.. హైదరాబాద్ లోని తార్నాకలో నివాసం ఉంటున్న ఆర్తి అనే యువతి పాల డబ్బా తేవడం కోసం బయటికి వెళ్లింది. దగ్గర్లోని షాపు మూసేసి ఉండడం వల్ల ఆమె దూరం వెళ్లాల్సి వచ్చింది. ఆటో కోసం రోడ్డు మీద ఎదురుచూస్తూ ఉండగా, ఇంతలో ఓ యువకుడు బైక్‌పై అటుగా వచ్చాడు. దగ్గర్లోని మెడికల్ షాప్ గురించి అతణ్ని ఆరా తీయగా, కొంచెం ముందుకెళ్తే ఉందని చెప్పాడు. కావాలంటే అక్కడిదాకా లిఫ్ట్ ఇస్తానని చెప్పి బైక్‌ ఎక్కించుకున్నాడు. అతడ్ని నమ్మి యువతి బైక్ ఎక్కింది.

కొంచెం దూరం వెళ్లాక స్థానిక సల్మాన్ అనే హోటల్ దగ్గర యువతిపై చేతులు వేస్తూ లైంగిక దాడికి ప్రయత్నించాడు. తన రూంకి రావాలని అసభ్యంగా మాట్లాడాడు. ఆమె భయపడిపోయి తప్పించుకునే ప్రయత్నం చేయగా, బైక్‌ పైనుంచి రోడ్డుపైకి దూకేసింది. సరిగ్గా అదే సమయంలో వెనుక నుంచి వచ్చిన టిప్పర్ లారీ ఆమె మీదుగా నుంచి వెళ్లింది. ఈ ప్రమాదంలో ఆర్తికి తీవ్ర గాయాలు అయ్యాయి. అరుపులు వేయడంతో విషయం గమనించిన స్థానికులు వెంటనే ఆర్తిని గాంధీ ఆస్పత్రికి తీసుకొని వెళ్లారు.

ప్రస్తుతం గాంధీ ఆస్పత్రిలో చికిత్స పొందుతుండగా, ఆమె పరిస్థితి విషమంగా ఉందని డాక్టర్లు చెప్పారు. ఇంకా యువతి స్పృహలోకి రాలేదని చెప్పారు. ఆర్తి తల్లిదండ్రులు స్పందిస్తూ.. తమ బిడ్డకు న్యాయం చేయాలని పోలీసులు, ప్రభుత్వాన్ని వేడుకున్నారు. తన కుమార్తెను జాగ్రత్తగా చూసుకోవాలని డాక్టర్లను బతిమాలారు. ఇంకా యువతి స్పృహలో లేకపోవడంతో ఎలాంటి వివరాలు తెలియరాలేదు. మరోవైపు ఈ ఘటనపై కేసు నమోదు చేసుకున్న ఉస్మానియా వర్సిటీ ఏరియా పోలీసులు నిందితుడిని అదుపులోకి తీసుకున్నారు.