Fire Cracker Lorry Catches Fire: హైటెన్షన్ వైర్లు తగిలి పేలిన టపాసులు, లారీ దగ్ధం.. రంగారెడ్డి జిల్లాలో ఘటన

హై టెన్షన్ వైర్లు తగిలి టపాసుల లారీ దగ్ధమైంది. రంగారెడ్డి జిల్లా కొత్తూరు పెంజర్ల నుంచి మాణిక్యంగూడ రోడ్ శివారులో ఈ ప్రమాదం జరిగింది.

హైటెన్షన్ వైర్లు తగిలి బాణసంచా లారీ దగ్ధం

Source : Abp desam

కొత్తూరు: రంగారెడ్డి జిల్లా కొత్తూరు మండలంలో శనివారం మధ్యాహ్నం భారీ అగ్నిప్రమాదం చోటుచేసుకుంది. తమిళనాడులోని శివకాశి నుంచి బాణసంచా లోడుతో హైదరాబాద్ వెళ్తున్న ఒక లారీ, పెంజర్ల గ్రామ శివారులో ప్రమాదానికి గురైంది. త్వరగా చేరుకోవాలనే ఉద్దేశంతో డ్రైవర్ మెయిన్ రోడ్ కాకుండా ఎలాంటి ట్రాఫిక్ లేని రూరల్ ఏరియా నుంచి లారీని నడిపాడు. ఈ క్రమంలో శంషాబాద్ - కొత్తూరు మధ్య ఉన్న 132 కేవీ హైటెన్షన్ విద్యుత్తు తీగలు లారీకి తగలడంతో ఒక్కసారిగా నిప్పురవ్వలు ఎగసిపడ్డాయి.

ప్రమాదాన్ని గమనించని డ్రైవర్ లారీని మరికొంత దూరం ముందుకు తీసుకెళ్లగా, లోపల ఉన్న టపాసులు పేలడం ప్రారంభమైంది. పెద్ద ఎత్తున శబ్దాలు వస్తుండటంతో అప్రమత్తమైన డ్రైవర్, క్లీనర్ వెంటనే లారీని నిలిపివేసి కిందకు దూకి ప్రాణాలు కాపాడుకున్నారు. కానీ కొన్ని క్షణాల్లోనే మంటలు లారీ మొత్తానికి వ్యాపించాయి. టపాసులు పేలుతున్న ధాటికి సమీప గ్రామస్తులు తీవ్ర భయాందోళనలకు గురయ్యారు. సమాచారం అందుకున్న అగ్నిమాపక సిబ్బంది, పోలీసులు ఘటనా స్థలానికి చేరుకుని మంటలను అదుపులోకి తెచ్చారు. అప్పటికే జరగాల్సిన నష్టం జరిగిపోయింది. ఈ ప్రమాదంలో టపాసులు కొంత సమయం పేలుతూనే ఉండటంతో మంటలు చెలరేగి లారీ పూర్తిగా దగ్ధమైంది.

సామర్లకోట (కాకినాడ జిల్లా) భారీ పేలుడు విషాదం

ఫిబ్రవరి 28, 2026న కాకినాడ జిల్లా సామర్లకోట మండలం వెట్లపాలెం గ్రామ శివారులో ఉన్న 'సూర్యశ్రీ ఫైర్ వర్క్స్' బాణసంచా తయారీ కేంద్రంలో అత్యంత భీకరమైన పేలుడు సంభవించింది. మధ్యాహ్నం సుమారు 2 గంటల సమయంలో కార్మికులు బాణసంచా తయారీలో నిమగ్నమై ఉండగా, ఒక కెమికల్ డ్రమ్ములో రేగిన నిప్పురవ్వల కారణంగా ఈ ప్రమాదం జరిగినట్లు ప్రాథమికంగా నిర్ధారించారు. ఈ పేలుడు ధాటికి 21 మంది కార్మికులు (ఎక్కువగా మహిళలు) అక్కడికక్కడే సజీవ దహనమయ్యారు. పేలుడు తీవ్రత ఎంతలా ఉందంటే, మృతదేహాల భాగాలు దాదాపు కొన్ని మీటర్ల దూరంలోని పొలాల్లో చెల్లాచెదురుగా పడిపోయాయి. ఈ శబ్దం 5 కిలోమీటర్ల దూరం వరకు వినిపించిందని, సమీపంలోని ఒక ప్రైవేట్ స్కూల్ భవనం స్లాబ్‌కు కూడా పగుళ్లు వచ్చాయని స్థానికులు తెలిపారు. ముఖ్యమంత్రి చంద్రబాబు, హోం మంత్రి వంగలపూడి అనిత, మంత్రి కందుల దుర్గేష్ ఘటనా స్థలాన్ని సందర్శించి బాధితులకు అండగా ఉంటామని హామీ ఇచ్చారు. ఏపీ ప్రభుత్వం మృతుల కుటుంబాలకు రూ.20 లక్షల పరిహారం ప్రకటించింది.

మరిన్ని చదవండి

సమోసాలు కనిపిస్తే ఆగిపోయే వారి కోసమే ఈ న్యూస్! ఆ టేస్ట్ రెసిపీ గుట్టు రట్టు చేసిన పోలీసులు!

కరీంనగర్‌ టూటౌన్‌ ఎస్సై చంద్రశేఖర్‌ సూసైడ్‌- ఐదు రోజుల క్రితమే భార్య ఆత్మహత్య