Madhapur Drugs Case: మళ్లీ డ్రగ్స్ కేసులో నవదీప్, ప్రస్తుతం పరారీలో - కీలక వివరాలు చెప్పిన సీపీ

అప్పట్లో ఎక్సైజ్ తో పాటు ఈడీ విచారణకు కూడా హీరో నవదీప్ హాజరయ్యారు. తాజాగా మాదాపూర్ డ్రగ్స్ కేసులో నవదీప్ పేరు ఉండడం సంచలనం రేకెత్తిస్తోంది.

ప్రతీకాత్మక చిత్రం

డ్రగ్స్ కేసులో మరోసారి హీరో నవదీప్ చిక్కుకున్నారు. నవదీప్ డ్రగ్స్ సేవించినట్లుగా హైదరాబాద్ పోలీసులు వెల్లడించారు. నవదీప్ స్నేహితుడు రాంచంద్ ను నార్కోటిక్ పోలీసులు అరెస్ట్ చేశారు. ఆ రాంచంద్ నుంచి సేకరించిన సమాచారం ప్రకారం.. నవదీప్ ను కన్స్యూమర్ గా పోలీసులు తేల్చారు. గతంలో సంచలనం రేపిన టాలీవుడ్ డ్రగ్స్ కేసులో కూడా నవదీప్ పేరు ఉన్న సంగతి తెలిసిందే.

అప్పట్లో ఎక్సైజ్ తో పాటు ఈడీ విచారణకు కూడా హీరో నవదీప్ హాజరయ్యారు. తాజాగా మాదాపూర్ డ్రగ్స్ కేసులో నవదీప్ పేరు ఉండడం సంచలనం రేకెత్తిస్తోంది. ప్రస్తుతం నవదీప్ పరారీలో ఉన్నట్టుగా హైదరాబాద్ సీపీ వెల్లడించారు. అలాగే ఇదే కేసులో మాజీ ఎంపీ కుమారుడు దేవరకొండ సురేష్‌ను అరెస్ట్ చేశామని సీపీ సీవీ ఆనంద్ వెల్లడించారు. ఇదే విషయం మీద కమిషనర్ సీపీ ఆనంద్ మాట్లాడుతూ.. "ప్రస్తుతానికి నవదీప్ కానీ అతని కుటుంబం కాని అందుబాటులో లేదని, ఫోన్స్ స్విచ్ ఆఫ్ చేసుకుని కుటుంబంతో సహా పరారయ్యారు’’ అని తెలిపారు.

ఈ విషయంపై హీరో నవదీప్ తన సోషల్ మీడియా వేదికగా స్పందించారు. ఈ మేరకు నవదీప్ ట్వీట్ చేస్తూ.. "అది  నేను కాదు జెంటిల్మెన్, నేను ఇక్కడే ఉన్నాను. దయచేసి క్లారిటీ తెచ్చుకోండి, థాంక్స్" అంటూ తన ట్వీట్ లో పేర్కొన్నారు. ఆ తర్వాత నవదీప్ మీడియాతో మాట్లాడుతూ.. తాను ఎక్కడికి పారిపోలేదని, హైదరాబాదులోని ఉన్నానని, డ్రగ్స్ కేసులో తనకు ఎలాంటి సంబంధం లేదని తెలిపాడు. తాను కూడా ప్రెస్ మీట్ చూశానని కమిషనర్ హీరో నవదీప్ అని ఎక్కడా మెన్షన్ చేయలేదని, అతను వేరే నవదీప్ అయి ఉంటాడని పేర్కొన్నాడు.

నవదీప్ ప్రస్తుతం తన సెకండ్ ఇన్నింగ్స్ లో సినిమాలు, వెబ్ సిరీస్ లు చేస్తూ బిజీగా ఉన్నాడు. ఇటీవల నవదీప్ లీడ్ రోల్ లో నటించిన 'న్యూసెన్స్' అనే వెబ్ సిరీస్ కి మంచి రెస్పాన్స్ వచ్చింది. హీరోయిన్ బిందు మాధవి ఈ వెబ్ సిరీస్ లో మరో ఇంపార్టెంట్ రోల్ ప్లే చేసింది. అగ్ర నిర్మాణ సంస్థ పీపుల్స్ మీడియా ఫ్యాక్టరీ పై టీజీ విశ్వప్రసాద్ నిర్మించిన ఈ వెబ్ సిరీస్ ఆహా ఓటీటీలో ప్రసారమైంది. త్వరలోనే  సీజన్ 2 కూడా రాబోతోంది.

ఈ వెబ్ సిరీస్ తో పాటు 'లవ్ మౌళి' అనే సినిమాలో నటిస్తున్నారు నవదీప్. ఈ సినిమాలో నవదీప్ మేకోవర్ చూసి అందరూ షాక్ అయ్యారు. ఇప్పటికే విడుదలైన ఫస్ట్ లుక్ కి మంచి రెస్పాన్స్ వచ్చింది  అవనీంద్ర అనే నూతన దర్శకుడు తెరకెక్కిస్తున్న ఈ సినిమా మ్యూజికల్ ప్రమోషన్స్ ని వినాయక చవితి సందర్భంగా సెప్టెంబర్ 15 స్టార్ట్ చేయబోతున్నారు. ఈ మేరకు ఆ రోజు సినిమా నుంచి ఫస్ట్ లిరికల్ సాంగ్ విడుదల చేయబోతున్నారు. ఇప్పటికే 'The Anthem Of Love Mouli' అనే పేరుతో సాంగ్  ప్రోమోని విడుదల చేశారు. గోవింద్ వసంత కంపోజ్ చేసిన ఈ పాటకి అనంత శ్రీరామ్ సాహిత్యం అందించారు .