Samsung Galaxy A13: రూ.15 వేలలోపే శాంసంగ్ కొత్త ఫోన్ - త్వరలో లాంచ్ - ఎలా ఉందో చూసేయండి!

ప్రముఖ స్మార్ట్ ఫోన్ బ్రాండ్ శాంసంగ్ తన గెలాక్సీ ఏ13 స్మార్ట్ ఫోన్ త్వరలో లాంచ్ చేయనున్నట్లు తెలుస్తోంది.

శాంసంగ్ గెలాక్సీ ఏ13 స్మార్ట్ ఫోన్ మనదేశంలో త్వరలో లాంచ్ కానుంది. (Image Credits: Samsung)

శాంసంగ్ గెలాక్సీ ఏ13 స్మార్ట్ ఫోన్ త్వరలో మనదేశంలో లాంచ్ కానున్నట్లు తెలుస్తోంది. శాంసంగ్ గెలాక్సీ ఏ23, ఎం33 స్మార్ట్ ఫోన్లతో పాటు ఈ ఫోన్ మార్కెట్లో లాంచ్ అయింది. అయితే మనదేశంలో ఈ ఫోన్ ఎప్పుడు లాంచ్ కానుందో తెలియరాలేదు. ఈ ఫోన్ ధరలు ఇప్పుడు ఆన్‌లైన్‌లో లీకయ్యాయి.

శాంసంగ్ గెలాక్సీ ఏ13 ధర
ప్రముఖ టిప్‌స్టర్ ముకుల్ శర్మ దీనికి సంబంధించిన ధరలను లీక్ చేశారు. దీని ప్రకారం ఇందులో మూడు వేరియంట్లు ఉండనున్నాయి. వీటిలో 4 జీబీ ర్యామ్ + 64 జీబీ స్టోరేజ్ వేరియంట్ ధర రూ.14,999 కాగా... 4 జీబీ ర్యామ్ + 128 జీబీ స్టోరేజ్ వేరియంట్ ధర రూ.15,999గానూ, 6 జీబీ ర్యామ్ + 128 జీబీ స్టోరేజ్ వేరియంట్ ధర రూ.17,499గా ఉండనుంది. బ్లాక్, బ్లూ, పీచ్, వైట్ రంగుల్లో ఈ ఫోన్ కొనుగోలు చేయవచ్చు.

శాంసంగ్ గెలాక్సీ ఏ13 స్పెసిఫికేషన్లు (అంచనా)
ఆండ్రాయిడ్ 12 ఆధారిత వన్‌యూఐ 4.1 ఆపరేటింగ్ సిస్టంపై ఈ ఫోన్ పనిచేయనుంది. ఇందులో 6.6 అంగుళాల టీఎఫ్‌టీ ఇన్‌ఫినిటీ-వి డిస్‌ప్లే ఉండనుంది. కార్నింగ్ గొరిల్లా గ్లాస్ 5 ప్రొటెక్షన్ కూడా ఇందులో ఉంది. శాంసంగ్ దీని ప్రాసెసర్‌ను ఇంకా తెలపలేదు కానీ... ఎక్సినోస్ 850 చిప్‌సెట్ అయ్యే అవకాశం ఉంది. 6 జీబీ వరకు ర్యామ్, 128 జీబీ వరకు స్టోరేజ్ ఇందులో ఉండనుంది.

ఫోన్ వెనకవైపు నాలుగు కెమెరాలు అందించారు. వీటిలో ప్రధాన కెమెరా సామర్థ్యం 50 మెగాపిక్సెల్ కాగా... దీంతోపాటు 5 మెగాపిక్సెల్ అల్ట్రా వైడ్ యాంగిల్ లెన్స్, 2 మెగాపిక్సెల్ మాక్రో సెన్సార్, 2 మెగాపిక్సెల్ డెప్త్ సెన్సార్ కూడా ఉండనున్నాయి. సెల్ఫీలు, వీడియో కాల్స్ కోసం ముందువైపు 8 మెగాపిక్సెల్ కెమెరా ఉండనుంది.

దీని బ్యాటరీ సామర్థ్యం 5000 ఎంఏహెచ్‌గా ఉండనుంది. 25W ఫాస్ట్ చార్జింగ్‌ను ఇది సపోర్ట్ చేయనుంది. ఫోన్ పక్కభాగంలో ఫింగర్ ప్రింట్ సెన్సార్ అందించారు. దీని మందం 0.88 సెంటీమీటర్లు గానూ, బరువు 195 గ్రాములుగానూ ఉండనుంది. బ్లాక్, బ్లూ, పీచ్, వైట్ రంగుల్లో ఈ ఫోన్ లాంచ్ అయింది.