Samsung Galaxy A23: శాంసంగ్ బడ్జెట్ ఫోన్లు వచ్చేశాయ్ - ధర రూ.15 వేలలోనే - ఫీచర్లు ఎలా ఉన్నాయంటే?

ప్రముఖ స్మార్ట్ ఫోన్ బ్రాండ్ శాంసంగ్ తన గెలాక్సీ ఏ-సిరీస్‌లో కొత్త ఫోన్లు లాంచ్ చేసింది. అవే శాంసంగ్ గెలాక్సీ ఏ13, ఏ23 స్మార్ట్ ఫోన్లు.

శాంసంగ్ గెలాక్సీ ఏ13, ఏ23 స్మార్ట్ ఫోన్లు లాంచ్ అయ్యాయి. (Image Credits: Samsung)

Samsung New Phones: శాంసంగ్ తన గెలాక్సీ ఏ-సిరీస్‌లో రెండు కొత్త ఫోన్లను లాంచ్ చేసింది. అవే శాంసంగ్ గెలాక్సీ ఏ13, శాంసంగ్ గెలాక్సీ ఏ23. వీటిలో 6.6 అంగుళాల ఫుల్ హెచ్‌డీ+ టీఎఫ్‌టీ డిస్‌ప్లేను అందించారు. రెండు ఫోన్లలోనూ 5000 ఎంఏహెచ్ బ్యాటరీ అందుబాటులో ఉంది. ఈ రెండు ఫోన్ల ఫీచర్లూ దాదాపు ఒకేలా ఉన్నాయి. ఈ ఫోన్లు ప్రస్తుతానికి యూరోప్‌లో మాత్రమే అందుబాటులో ఉన్నాయి.

శాంసంగ్ గెలాక్సీ ఏ13, ఏ23 ధర
ఈ రెండు ఫోన్ల ధరలను కంపెనీ అధికారికంగా ప్రకటించలేదు. అయితే జీఎస్ఎంఎరీనా వెబ్‌సైట్ ప్రకారం... శాంసంగ్ గెలాక్సీ ఏ13 స్మార్ట్ ఫోన్‌లో 4 జీబీ ర్యామ్ + 64 జీబీ స్టోరేజ్ వేరియంట్ ధర 190 యూరోలుగా (సుమారు రూ.15,800) ఉండనుంది. ఇక 4 జీబీ ర్యామ్ + 128 జీబీ స్టోరేజ్ వేరియంట్ ధర 210 యూరోలుగా (సుమారు రూ.17,500) నిర్ణయించనున్నారు. ఈ ఫోన్లు మనదేశంలో లాంచ్ అయితే వీటి ధర రూ.12 వేలలోపే ఉండే అవకాశం ఉంది.

శాంసంగ్ గెలాక్సీ ఏ13 స్పెసిఫికేషన్లు
ఆండ్రాయిడ్ 12 ఆధారిత వన్‌యూఐ 4.1 ఆపరేటింగ్ సిస్టంపై ఈ ఫోన్ పనిచేయనుంది. ఇందులో 6.6 అంగుళాల టీఎఫ్‌టీ ఇన్‌ఫినిటీ-వి డిస్‌ప్లే ఉండనుంది. కార్నింగ్ గొరిల్లా గ్లాస్ 5 ప్రొటెక్షన్ కూడా ఇందులో ఉంది. శాంసంగ్ దీని ప్రాసెసర్‌ను ఇంకా తెలపలేదు కానీ... ఎక్సినోస్ 850 చిప్‌సెట్ అయ్యే అవకాశం ఉంది. 6 జీబీ వరకు ర్యామ్, 128 జీబీ వరకు స్టోరేజ్ ఇందులో ఉండనుంది.

ఫోన్ వెనకవైపు నాలుగు కెమెరాలు అందించారు. వీటిలో ప్రధాన కెమెరా సామర్థ్యం 50 మెగాపిక్సెల్ కాగా... దీంతోపాటు 5 మెగాపిక్సెల్ అల్ట్రా వైడ్ యాంగిల్ లెన్స్, 2 మెగాపిక్సెల్ మాక్రో సెన్సార్, 2 మెగాపిక్సెల్ డెప్త్ సెన్సార్ కూడా ఉండనున్నాయి. సెల్ఫీలు, వీడియో కాల్స్ కోసం ముందువైపు 8 మెగాపిక్సెల్ కెమెరా ఉండనుంది.

దీని బ్యాటరీ సామర్థ్యం 5000 ఎంఏహెచ్‌గా ఉండనుంది. 25W ఫాస్ట్ చార్జింగ్‌ను ఇది సపోర్ట్ చేయనుంది. ఫోన్ పక్కభాగంలో ఫింగర్ ప్రింట్ సెన్సార్ అందించారు. దీని మందం 0.88 సెంటీమీటర్లు గానూ, బరువు 195 గ్రాములుగానూ ఉండనుంది. బ్లాక్, బ్లూ, పీచ్, వైట్ రంగుల్లో ఈ ఫోన్ లాంచ్ అయింది.

శాంసంగ్ గెలాక్సీ ఏ23 స్పెసిఫికేషన్లు
ఈ ఫోన్ ఫీచర్లన్నీ దాదాపు శాంసంగ్ గెలాక్సీ ఏ23 తరహాలోనే ఉండనున్నాయి. అయితే ప్రాసెసర్ విషయంలో తేడా ఉండనుంది. శాంసంగ్ గెలాక్సీ ఏ23 ప్రాసెసర్ వివరాలను కంపెనీ ఇంకా ప్రకటించలేదు. ఇందులో 8 జీబీ వరకు ర్యామ్, 128 జీబీ వరకు స్టోరేజ్ ఉండనుంది.