Redmi 10A: 6 జీబీ ర్యామ్, 128 జీబీ స్టోరేజ్ ఫోన్ రూ.10 వేలలోపే - రెడ్‌మీ కొత్త బడ్జెట్ మొబైల్‌ చూశారా?

రెడ్‌మీ 10ఏ స్మార్ట్ ఫోన్ చైనాలో లాంచ్ అయింది. ఇందులో 6.53 అంగుళాల డిస్‌ప్లే, మీడియాటెక్ హీలియో జీ25 ప్రాసెసర్, వెనకవైపు 13 మెగాపిక్సెల్ కెమెరా, 5000 ఎంఏహెచ్ బ్యాటరీ వంటి ఫీచర్లు ఉన్నాయి. ఈ ఫోన్ ప్రస్తుతానికి చైనాలో మాత్రమే అందుబాటులో ఉంది. మనదేశంలో ఎప్పుడు లాంచ్ కానుందో తెలియరాలేదు.

రెడ్‌మీ 10ఏ ధర
ఇందులో మూడు వేరియంట్లు అందుబాటులో ఉన్నాయి. వీటిలో ప్రారంభ వేరియంట్ అయిన 4 జీబీ ర్యామ్ + 64 జీబీ స్టోరేజ్ వేరియంట్ ధర 649 యువాన్లుగా (సుమారు రూ.7,740) ఉంది. ఇక 4 జీబీ ర్యామ్ + 128 జీబీ స్టోరేజ్ వేరియంట్ ధర 799 యువాన్లుగా (సుమారు రూ.9,500) నిర్ణయించారు. టాప్ ఎండ్ వేరియంట్ అయిన 6 జీబీ ర్యామ్ + 128 జీబీ స్టోరేజ్ మోడల్ ధర 899 యువాన్లుగా (సుమారు రూ.10,700) ఉంది. మూన్ లైట్ సిల్వర్, స్మోక్ బ్లూ, షాడో బ్లాక్ రంగుల్లో దీన్ని కొనుగోలు చేయవచ్చు.

రెడ్‌మీ 10ఏ స్పెసిఫికేషన్లు
ఇందులో 6.53 అంగుళాల వాటర్ డ్రాప్ నాచ్ తరహా డిస్‌ప్లేను అందించారు. దీని పీక్ బ్రైట్‌నెస్ 400 నిట్స్‌గానూ, యాస్పెక్ట్ రేషియో 20:9గానూ ఉంది. మీడియాటెక్ హీలియో జీ25 ప్రాసెసర్‌పై ఈ ఫోన్ పనిచేయనుంది. 6 జీబీ వరకు ర్యామ్, 128 జీబీ వరకు స్టోరేజ్ ఇందులో అందించారు. స్టోరేజ్‌ను మైక్రో ఎస్‌డీ కార్డు ద్వారా 512 జీబీ వరకు పెంచుకోవచ్చు.

ఇక కెమెరాల విషయానికి వస్తే... ఇందులో 13 మెగాపిక్సెల్ కెమెరాను అందించారు. సెల్ఫీలు, వీడియో కాల్స్ కోసం ముందువైపు 5 మెగాపిక్సెల్ కెమెరా ఉంది. పంచ్ హోల్ కటౌట్‌లో దీన్ని అందించారు. ఆండ్రాయిడ్ 11 ఆధారిత ఎంఐయూఐ 12.5 ఆపరేటింగ్ సిస్టంపై ఈ ఫోన్ పని చేయనుంది.

4జీ, వైఫై, బ్లూటూత్ వీ5.0, జీపీఎస్, బైదు, మైక్రో యూఎస్‌బీ పోర్టు, 3.5 ఎంఎం హెడ్ ఫోన్ జాక్ వంటి కనెక్టివిటీ ఫీచర్లు ఇందులో ఉన్నాయి. ఫింగర్ ప్రింట్ సెన్సార్‌ను ఫోన్ వెనకవైపు అందించారు. దీని మందం 0.9 సెంటీమీటర్లు కాగా... బరువు 194 గ్రాములుగా ఉంది.

Also Read: యాపిల్ అత్యంత చవకైన 5జీ ఫోన్ వచ్చేసింది - లేటెస్ట్ ప్రాసెసర్‌తో - ధర ఎంతంటే?

Also Read: కొత్త ఐప్యాడ్ వచ్చేసింది - అన్నీ లేటెస్ట్ ఫీచర్లే - ధర ఎంతంటే?