Realme C67 5G Sale: రియల్‌మీ సీ67 5జీ సేల్ ప్రారంభం - రూ.14 వేలలోపే 5జీ, 50 మెగాపిక్సెల్ కెమెరా!

Realme C67 5G: రియల్‌మీ సీ67 5జీ స్మార్ట్ ఫోన్ సేల్ మనదేశంలో ప్రారంభం అయింది.

రియల్‌మీ సీ67 5జీ సేల్ మనదేశంలో ప్రారంభం అయింది.

Source : Realme

Realme C67 5G Flipkart Sale: రియల్‌మీ సీ67 5జీ స్మార్ట్ ఫోన్ సేల్ మనదేశంలో ప్రారంభం అయింది. రియల్‌మీ సీ-సిరీస్‌లో లాంచ్ అయిన మొట్టమొదటి 5జీ స్మార్ట్ ఫోన్ ఇదే. రియల్‌మీ సీ67 33W వైర్డ్ ఫాస్ట్ ఛార్జింగ్‌ను సపోర్ట్‌తో లాంచ్ అయింది. 6ఎన్ఎం మీడియాటెక్ డైమెన్సిటీ ప్రాసెసర్‌పై ఈ స్మార్ట్ ఫోన్ పని చేయనుంది. ఫోన్ వెనకవైపు ఏఐ ఆధారిత డ్యూయల్ కెమెరా సెటప్‌ను చూడవచ్చు. ఈ స్మార్ట్ ఫోన్‌కు సంబంధించిన 4జీ వెర్షన్ కూడా త్వరలో లాంచ్ కానుందని సమాచారం.

రియల్‌మీ సీ67 5జీ ధర, ఆఫర్లు
రియల్‌మీ సీ67 5జీ రెండు వేరియంట్లలో అందుబాటులో ఉంది. ఇందులో ప్రారంభ వేరియంట్ అయిన 4 జీబీ ర్యామ్ + 128 జీబీ స్టోరేజ్ వేరియంట్ ధర రూ.13,999గా ఉంది. ఇక టాప్ ఎండ్ వేరియంట్ అయిన 6 జీబీ ర్యామ్ + 128 జీబీ స్టోరేజ్ వేరియంట్ ధర రూ.14,999గా నిర్ణయించారు. డార్క్ పర్పుల్, సన్నీ ఒయాసిస్ కలర్ ఆప్షన్లలో రియల్‌మీ సీ67 5జీని కొనుగోలు చేయవచ్చు. రియల్‌మీ, ఫ్లిప్‌కార్ట్‌ల్లో ఈ ఫోన్ అందుబాటులో ఉంది. అలాగే దేశవ్యాప్తంగా రిటైల్ స్టోర్లలో కూడా ఈ ఫోన్ కొనుక్కోవచ్చు. డిసెంబర్ 20వ తేదీ లోపు ఈ 5జీ ఫోన్‌ను కొనుగోలు చేస్తే రూ.2,000, ఆ తర్వాత కొనుగోలు చేస్తే రూ.1,500 వరకు ఆఫర్లు లభించనున్నాయి. అయితే ఇది కేవలం ఆన్‌లైన్‌లో కొన్నవారికి మాత్రమే అందుబాటులో ఉండనుంది.

రియల్‌మీ సీ67 5జీ స్పెసిఫికేషన్లు ఇలా...
ఇందులో 6.72 అంగుళాల ఫుల్ హెచ్‌డీ+ డిస్‌ప్లే అందించారు. ఈ ఫోన్ స్క్రీన్ రిఫ్రెష్ రేట్ 120 హెర్ట్జ్ కాగా, పీక్ బ్రైట్‌నెస్ లెవల్ 680 నిట్స్‌గా ఉంది. సన్నీ ఒయాసిస్ డిజైన్‌ను ఫోన్ వెనకవైపు అందించడం విశేషం. ఈ డిజైన్ కారణంగా సన్‌లైట్‌లో రియల్‌మీ సీ67 5జీ బ్యాక్ ప్యానెల్ షైన్ అవుతుంది. మీడియాటెక్ డైమెన్సిటీ 6100 ప్లస్ ప్రాసెసర్‌పై ఈ ఫోన్ రన్ కానుంది. 6 జీబీ వరకు ర్యామ్, 128 జీబీ వరకు స్టోరేజ్ కూడా ఇందులో ఉన్నాయి. ర్యామ్‌ను వర్చువల్‌గా మరో 6 జీబీ పెంచుకునే అవకాశం ఉంది. అలాగే స్టోరేజ్‌ను మైక్రో ఎస్‌డీ కార్డు ద్వారా 2 టీబీ వరకు పెంచుకోవచ్చు.

ఆండ్రాయిడ్ 13 ఆధారిత రియల్‌మీ యూఐ 4.0 ఓఎస్‌పై రియల్‌మీ సీ67 5జీ పని చేయనుంది. ఈ స్మార్ట్ ఫోన్‌లో మినీ క్యాప్సూల్ ఫీచర్ కూడా అందించారు. ఐఫోన్ 14 ప్రో, 15 సిరీస్‌లో కనిపించే డైనమిక్ ఐల్యాండ్ తరహాలో ఈ క్యాప్సూల్ పని చేస్తుంది.

ఇక కెమెరాల విషయానికి వస్తే ఇందులో వెనకవైపు రెండు కెమెరాలు అందించారు. ప్రధాన కెమెరా సామర్థ్యం 50 మెగాపిక్సెల్ కాగా, 2 మెగాపిక్సెల్ పొర్‌ట్రెయిట్ లెన్స్ కూడా అందుబాటులో ఉంది. ముందువైపు సెల్ఫీలు, వీడియో కాల్స్ కోసం 8 మెగాపిక్సెల్ సెన్సార్ అందించారు.

రియల్‌మీ సీ67 5జీ బ్యాటరీ సామర్థ్యం 5000 ఎంఏహెచ్ కాగా, 33W వైర్డ్ ఫాస్ట్ ఛార్జింగ్‌ను కూడా సపోర్ట్ చేయనుంది. కేవలం 29 నిమిషాల్లోనే 0 నుంచి 50 శాతం ఛార్జింగ్ ఎక్కుతుందని కంపెనీ ప్రకటించింది. ఈ స్మార్ట్ ఫోన్ మందం 0.79 సెంటీమీటర్లుగా ఉంది. ఐపీ54 రేటింగ్ డస్ట్, స్ప్లాష్ రెసిస్టెన్స్ ఫీచర్లు కూడా అందించారు. ప్రైవసీ, సెక్యూరిటీ కోసం ఫింగర్ ప్రింట్ సెన్సార్‌ను ఫోన్ పక్కభాగంలో చూడవచ్చు.