Poco M4 5G: దేశంలో అత్యంత చవకైన 5జీ ఫోన్ వచ్చేసింది - ధర రూ.11 వేలలోపే - ఫీచర్లు ఎలా ఉన్నాయో చూశారా?

ప్రముఖ స్మార్ట్ ఫోన్ బ్రాండ్ పోకో మనదేశంలో కొత్త 5జీ ఫోన్ లాంచ్ చేసింది. అదే పోకో ఎం4 5జీ.

పోకో ఎం4 5జీ స్మార్ట్ ఫోన్ మనదేశంలో లాంచ్ అయింది. (Image Credits: Poco)

పోకో ఎం4 5జీ స్మార్ట్ ఫోన్ మనదేశంలో శుక్రవారం లాంచ్ అయింది. మీడియాటెక్ డైమెన్సిటీ 700 ప్రాసెసర్‌పై ఈ ఫోన్ పనిచేయనుంది. ఏడు బ్యాండ్ల 5జీని ఇది సపోర్ట్ చేయనుంది. 6 జీబీ వరకు ర్యామ్, టర్బో ర్యామ్ ఫీచర్లను అందించారు. 2 జీబీ స్టోరేజ్‌ను కూడా ర్యామ్‌గా ఉపయోగించుకునే ఆప్షన్ ఇందులో ఉంది.

పోకో ఎం4 5జీ ధర
ఈ స్మార్ట్ ఫోన్ రెండు వేరియంట్లలో కొనుగోలు చేయవచ్చు. వీటిలో 4 జీబీ ర్యామ్ + 64 జీబీ స్టోరేజ్ వేరియంట్ ధర రూ.12,999గా నిర్ణయించారు. 6 జీబీ ర్యామ్ + 128 జీబీ స్టోరేజ్ వేరియంట్ ధర రూ.14,999గా ఉంది. ఎస్‌బీఐ కార్డుల ద్వారా కొనుగోలు చేస్తే ఏకంగా రూ.2,000 తగ్గింపు లభించనుంది. మే 5వ తేదీ నుంచి దీని సేల్ జరగనుంది. కూల్ బ్లూ, పవర్ బ్లాక్, ఎల్లో కలర్ ఆప్షన్లలో ఈ ఫోన్ లాంచ్ అయింది. ఫ్లిప్‌కార్ట్‌లో ఈ ఫోన్ అందుబాటులో ఉంది.

పోకో ఎం4 5జీ స్పెసిఫికేషన్లు
ఆండ్రాయిడ్ 12 ఆధారిత ఎంఐయూఐ 13 ఆపరేటింగ్ సిస్టంపై ఈ ఫోన్ పనిచేయనుంది. 6.58 అంగుళాల ఎల్సీడీ డిస్‌ప్లేను ఈ ఫోన్‌లో అందించారు. స్క్రీన్ రిఫ్రెష్ రేట్ 90 హెర్ట్జ్‌గా ఉంది. కార్నింగ్ గొరిల్లా గ్లాస్ 3 ప్రొటెక్షన్ కూడా అందించారు.

6 జీబీ వరకు ర్యామ్, 128 జీబీ వరకు స్టోరేజ్ ఉన్నాయి. టర్బో ర్యామ్ ఫీచర్ ద్వారా 2 జీబీ స్టోరేజ్‌ను ర్యామ్‌గా ఉపయోగించుకోవచ్చు. మీడియాటెక్ డైమెన్సిటీ 700 ప్రాసెసర్‌పై ఈ ఫోన్ పనిచేయనుంది. దీని మందం 0.89 సెంటీమీటర్లు కాగా... బరువు 200 గ్రాములుగా ఉంది.

ఇక కెమెరాల విషయానికి వస్తే... ఫోన్ వెనకవైపు రెండు కెమెరాలు ఉన్నాయి. వీటిలో ప్రధాన కెమెరా సామర్థ్యం 50 మెగాపిక్సెల్ కాగా, దీంతోపాటు 2 మెగాపిక్సెల్ పొర్‌ట్రెయిట్ సెన్సార్ కూడా ఉన్నాయి. సెల్ఫీలు, వీడియో కాల్స్ కోసం ముందువైపు 8 మెగాపిక్సెల్ కెమెరాను అందించారు.

ఈ ఫోన్ ఏడు 5జీ బ్యాండ్లను సపోర్ట్ చేయనుంది. వైఫై, బ్లూటూత్ వీ5.1, యూఎస్‌బీ టైప్-సీ పోర్టు వంటి కనెక్టివిటీ ఫీచర్లు ఈ స్మార్ట్‌ఫోన్‌లో ఉన్నాయి. దీని బ్యాటరీ సామర్థ్యం 5000 ఎంఏహెచ్ కాగా... 18W ఫాస్ట్ చార్జింగ్‌ను ఇది సపోర్ట్ చేయనుంది. ఫింగర్ ప్రింట్ సెన్సార్‌ను ఫోన్ పక్కభాగంలో అందించారు.