Eco Friendly Battery: భారత శాస్త్రవేత్తల అద్భుత ఆవిష్కరణ.. పర్యావణ అనుకూల స్మార్ట్ బ్యాటరీ తయారీ, మడత పెట్టవచ్చు

Flexible safe Battery: ఫ్లెక్సిబుల్ అల్యూమినియం-అయాన్ బ్యాటరీని ఎలాగైనా వంచవచ్చు. దాని సరళమైన నిర్మాణం కారణంగా కాగితంలా మడత పెట్టవచ్చు. ఎలాంటి పరిస్థితుల్లోనైనా ఇది సురక్షితమని నిపుణులు తెలిపారు.

పర్యావణ అనుకూల స్మార్ట్ బ్యాటరీ తయారీ

Source : PIB

భారత శాస్త్రవేత్తలు ఒక కొత్త బ్యాటరీ టెక్నాలజీని అభివృద్ధి చేశారు. ఇది బ్యాటరీని కాగితాన్ని మడవగలిగేంత సరళంగా, ఎటువంటి టెన్షన్ లేకుండా తాకినా మిమ్మల్ని సురక్షితంగా ఉంచుతుంది. సాధారణంగా ఉపయోగించే లిథియం-అయాన్ బ్యాటరీలు, వేడెక్కడం, పేలుడుకు గురయ్యే అవకాశాలు ఉంటాయి.

కొత్త బ్యాటరీ టెక్నాలజీ అభివృద్ధి

భారత ప్రభుత్వ సైన్స్ అండ్ టెక్నాలజీ విభాగం (DST) కింద పనిచేసే స్వయంప్రతిపత్తి కలిగిన సంస్థ అయిన సెంటర్ ఫర్ నానో అండ్ సాఫ్ట్ మ్యాటర్ సైన్సెస్ (CeNS) బెంగళూరులోని రీసెర్చర్లు, ఇండియన్ ఇన్‌స్టిట్యూట్ ఆఫ్ సైన్స్ (IISc)లోని సెంటర్ ఫర్ నానో సైన్స్ అండ్ ఇంజనీరింగ్ (CeNSE) సహకారంతో ఫోన్లు, ల్యాప్‌టాప్‌లు, ఎలక్ట్రిక్ వాహనాలు, ఇతర పరికరాల్లో సాధారణంగా ఉపయోగించే లిథియం-అయాన్ బ్యాటరీలకు ప్రత్యామ్నాయంగా ఉపయోగపడే ఒక కొత్త బ్యాటరీ టెక్నాలజీని అభివృద్ధి చేశారు.

చౌక, సురక్షితమైన బ్యాటరీ

ఈ కొత్త బ్యాటరీ భూమిపై అత్యంత సమృద్ధిగా దొరికే అల్యూమినియం, నీటి ఆధారిత సొల్యూషన్‌ను ఉపయోగిస్తుంది. ఈ కాంబినేషన్ మిమ్మల్ని సురక్షితంగా ఉంచుతుంది. చౌకగా లభించడంతో పాటు పర్యావరణానికి మేలు చేస్తుంది. తద్వారా ఇది బ్యాటరీ పేలుళ్లు, పర్యావరణ ప్రమాదాల నుండి రక్షిస్తుంది. భవిష్యత్తులో అధిక విద్యుత్ అవసరాన్ని కూడా తగ్గిస్తుంది.

అల్యూమినియం శక్తిని సమర్ధవంతంగా స్టోరేజీ చేసి ఈ బ్యాటరీ విడుదల చేయగలదు. కనుక దీనికి గొప్ప సామర్థ్యం ఉన్నప్పటికీ, దాని సంక్లిష్టమైన రసాయన శాస్త్రం కారణంగా శాస్త్రవేత్తలు దానిని ఉపయోగించడంలో సమస్యలను ఎదుర్కొన్నారు. బెంగళూరు శాస్త్రవేత్తలు సూక్ష్మదర్శిని స్థాయిలో పదార్థాలను సర్దుబాటు చేయడం ద్వారా ఈ సమస్యకు చెక్ పెట్టారు. వారు అల్యూమినియం అయాన్లతో ముందే నింపిన కాపర్ హెక్సాసినోఫెరేట్ (CuHCFe) అనే ప్రత్యేక పదార్థం నుండి ఒక కాథోడ్ ను రూపొందించారు. వారు దీనిని మాలిబ్డినం ట్రైయాక్సైడ్ (MoO₃) నుంచి తయారు చేసి యానోడ్ తో జత చేయడం ద్వారా పవర్‌ఫుల్ బ్యాటరీని తయారుచేశారు. ఇది ప్రభావవంతంగా ఉండటమే కాకుండా విరిగిపోకుండా ఉంటుంది. సరళమైన నిర్మాణం కారణంగా దీన్ని ఈజీగా వంచవచ్చు. పేపర్ తరహాలో మడత కూడా పెట్టవచ్చు.

ఈ బ్యాటరీని కాగితంలా మడతబెట్టవచ్చు

ఈ వినూత్న బ్యాటరీ శక్తిని సమర్థవంతంగా నిల్వ చేస్తుంది. 150 ఛార్జ్-డిశ్చార్జ్ సైకిల్ తర్వాత దాని శక్తిలో 96.77%ని మెయింటైన్ చేస్తుంది. రోజువారీ ఉపయోగంలో బ్యాటరీ లైఫ్‌ తగ్గింపును పరిమితం చేస్తుంది. ఈ కొత్త బ్యాటరీ వంచినా, సగానికి మడిచినా కూడా బాగానే పనిచేస్తుంది. దీనిని ప్రదర్శించడానికి, శాస్త్రవేత్తలు బ్యాటరీని పలు కోణాల్లో వంచినప్పటికీ, నిరంతరం LCD డిస్‌ప్లేను ప్రదర్శించింది. భవిష్యత్తులో దుస్తుల్లో ధరించగలిగే పరికరాలను తయారు చేయడానికి సహాయపడుతుంది.

శాస్త్రవేత్తలు ఎలక్ట్రాన్ మైక్రోస్కోప్‌లు, స్పెక్ట్రోస్కోపిక్ పద్ధతులతో సహా అధునాతన మైక్రోస్కోపిక్ సాధనాలను ఉపయోగించి బ్యాటరీ భాగాల పనితీరును పూర్తి స్థాయిలో పరిశీలించారు. బ్యాటరీ సామర్థ్యం, ​​మన్నికను నిర్ధారించడానికి దానిని బాగా పరీక్షించారు. ఈ ఆవిష్కరణ రోజువారీ అనువర్తనాలకు మంచి ప్రభావాన్ని చూపనుంది. సౌకర్యవంతమైన స్మార్ట్‌ఫోన్‌లు, సురక్షితమైన ఎలక్ట్రిక్ వాహనాలు, దుస్తులలో ఈ చిన్న బ్యాటరీని ఫిక్స్ చేసే అవకాశాలున్నాయి. సమృద్ధిగా లభించే,  పర్యావరణ అనుకూలం అయిన అల్యూమినియం వాడకం స్థిరమైన లక్ష్యాలను సపోర్ట్ చేస్తుంది. 

మల్టీవాలెంట్ అయాన్ బ్యాటరీ టెక్నాలజీలో కొత్త బ్యాటరీ గణనీయమైన పురోగతిని తేనుంది. నిపుణులు రూపొందించిన ఈ స్మార్ట్, చిన్న బ్యాటరీలు త్వరలో మన రోజువారీ జీవితంలో కీలకపాత్ర పోషించనుందని భావిస్తున్నారు. ప్రపంచ పర్యావరణ లక్ష్యాలకు అనుగుణంగా సురక్షితమైన, స్థిరమైన, నెక్ట్స్ జనరేషన్ ఎనర్జీ నిల్వలకు పరిష్కార మార్గం అవుతుందని చెప్పవచ్చు.