SRH Vs DC: స్వల్ప లక్ష్యం ముందు చతికిలబడ్డ సన్‌రైజర్స్ - ఢిల్లీకి వరుసగా రెండో విజయం!

ఐపీఎల్ 2023లో ఢిల్లీ క్యాపిటల్స్‌‌తో జరుగుతున్న మ్యాచ్‌లో సన్‌రైజర్స్ హైదరాబాద్‌ ఏడు పరుగుల తేడాతో ఓటమి పాలైంది.

మ్యాచ్‌లో అక్షర్ పటేల్

Source : PTI

Delhi Capitals vs Sunrisers Hyderabad: ఐపీఎల్‌ 2023 సీజన్ 34వ మ్యాచ్‌లో ఢిల్లీ క్యాపిటల్స్‌ చేతిలో సన్‌రైజర్స్ హైదరాబాద్ ఓటమి పాలైంది. ఈ మ్యాచ్‌లో మొదట బ్యాటింగ్ చేసిన ఢిల్లీ క్యాపిటల్స్ 20 ఓవర్లలో 9 వికెట్ల నష్టానికి 144 పరుగులు చేసింది. అనంతరం సన్‌రైజర్స్ హైదరాబాద్ 20 ఓవర్లలో ఆరు వికెట్ల నష్టానికి 137 పరుగులకు పరిమితం అయింది. దీంతో ఢిల్లీకి టోర్నీలో వరుసగా రెండో విజయం దక్కింది. సన్‌రైజర్స్‌కు మాత్రం వరుసగా మూడో ఓటమి.

సన్‌రైజర్స్ బ్యాటర్లలో మయాంక్ అగర్వాల్ (49: 39 బంతుల్లో, ఏడు ఫోర్లు) టాప్ స్కోరర్‌గా నిలిచాడు. హెన్రిచ్ క్లాసెన్ (31: 19 బంతుల్లో, మూడు ఫోర్లు, ఒక సిక్సర్), వాషింగ్టన్ సుందర్ (24 నాటౌట్: 15 బంతుల్లో, మూడు ఫోర్లు) చివర్లో పోరాడారు. హ్యారీ బ్రూక్ (7: 14 బంతుల్లో), రాహుల్ త్రిపాఠి (15: 21 బంతుల్లో), ఎయిడెన్ మార్క్రమ్ (3: 5 బంతుల్లో), అభిషేక్ శర్మ (5: 5 బంతుల్లో) దారుణంగా విఫలం అయ్యారు. ఢిల్లీ బ్యాటర్లలో మనీష్ పాండే (34: 27 బంతుల్లో, రెండు ఫోర్లు), అక్షర్ పటేల్ (34: 34 బంతుల్లో, నాలుగు ఫోర్లు) టాప్ స్కోరర్లుగా నిలిచారు. హైదరాబాద్ బౌలర్లలో వాషింగ్టన్ సుందర్ మూడు వికెట్లు పడగొట్టాడు.

ఈ మ్యాచ్‌లో టాస్ గెలిచిన ఢిల్లీ క్యాపిటల్స్ మొదట బ్యాటింగ్ ఎంచుకుంది. అయితే మొదటి ఓవర్లోనే ఫిల్ సాల్ట్‌ను (0: 1 బంతి) అవుట్ చేసి భువనేశ్వర్ కుమార్ సన్‌రైజర్స్‌కు మొదటి వికెట్ అందించాడు. వన్‌డౌన్‌లో వచ్చిన మిషెల్ మార్ష్ (25: 15 బంతుల్లో, ఐదు ఫోర్లు) వేగంగా ఆడటంతో స్కోరు పరుగులు పెట్టింది. తనకు డేవిడ్ వార్నర్ (21: 20 బంతుల్లో, రెండు ఫోర్లు, ఒక సిక్సర్) చక్కటి సహకారం అందిచాడు. కానీ స్వల్ప వ్యవధిలోనే వీరిద్దరూ అవుటయ్యారు. దీంతో 57 పరుగులకే ఢిల్లీ మూడు వికెట్లు కోల్పోయింది.

అమన్ హకీమ్ ఖాన్ (4: 2 బంతుల్లో, ఒక ఫోర్), సర్ఫరాజ్ ఖాన్ (10: 9 బంతుల్లో, ఒక సిక్సర్) కూడా ఎక్కువ సేపు క్రీజులో నిలబడలేదు. దీంతో 62 పరుగులకే ఢిల్లీ సగం జట్టును కోల్పోయింది. ఈ దశలో మనీష్ పాండే (34: 27 బంతుల్లో, రెండు ఫోర్లు), అక్షర్ పటేల్ (34: 34 బంతుల్లో, నాలుగు ఫోర్లు) ఢిల్లీ క్యాపిటల్స్‌ను ఆదుకున్నారు. వీరు ఆరో వికెట్‌కు 69 పరుగులు జోడించారు. కానీ బంతులు మాత్రం బాగా వృథా అయ్యాయి. దీనికి తోడు వీరిద్దరూ మూడు పరుగుల తేడాలోనే అవుటయ్యారు. ఆ తర్వాత వచ్చిన వారు వేగంగా ఆడలేకపోయారు. దీంతో ఢిల్లీ క్యాపిటల్స్ 20 ఓవర్లలో తొమ్మిది వికెట్ల నష్టానికి 144 పరుగులకే పరిమితం అయింది. సన్‌రైజర్స్ హైదరాబాద్ బౌలర్లలో వాషింగ్టన్ సుందర్ మూడు వికెట్లు పడగొట్టాడు. భువనేశ్వర్ కుమార్‌కు రెండు వికెట్లు దక్కాయి. టి నటరాజన్ ఒక వికెట్ తీసుకున్నాడు.

ఢిల్లీ క్యాపిటల్స్ తుది జట్టు
డేవిడ్ వార్నర్ (కెప్టెన్), ఫిలిప్ సాల్ట్ (వికెట్ కీపర్), మిచెల్ మార్ష్, మనీష్ పాండే, సర్ఫరాజ్ ఖాన్, అక్షర్ పటేల్, అమన్ హకీమ్ ఖాన్, రిపాల్ పటేల్, అన్రిచ్ నోర్ట్జే, కుల్దీప్ యాదవ్, ఇషాంత్ శర్మ

ఢిల్లీ క్యాపిటల్స్ ఇంపాక్ట్ ప్లేయర్ సబ్స్
ముఖేష్ కుమార్, లలిత్ యాదవ్, ప్రవీణ్ దూబే, చేతన్ సకారియా, యష్ ధుల్

సన్‌రైజర్స్ హైదరాబాద్ తుది జట్టు
అభిషేక్ శర్మ, హ్యారీ బ్రూక్, ఎయిడెన్ మార్క్రమ్ (కెప్టెన్), మయాంక్ అగర్వాల్, హెన్రిచ్ క్లాసెన్ (వికెట్ కీపర్), మార్కో జాన్సెన్, వాషింగ్టన్ సుందర్, మయాంక్ మార్కండే, భువనేశ్వర్ కుమార్, టి నటరాజన్, ఉమ్రాన్ మాలిక్

సన్‌రైజర్స్ హైదరాబాద్ ఇంపాక్ట్ ప్లేయర్ సబ్స్
నితీష్ రెడ్డి, వివ్రాంత్ శర్మ, గ్లెన్ ఫిలిప్స్, మయాంక్ డాగర్, రాహుల్ త్రిపాఠి