Rahul Dravid: అప్పుడే ఇషాన్ గురించి ఆలోచిస్తాం, తేల్చి చెప్పిన రాహుల్ ద్రవిడ్
Rahul Dravid: కొంతకాలంగా జట్టుకు దూరంగా ఉంటున్న యువ ఆటగాడు ఇషాన్ కిషన్ భవిష్యత్తుపై కోచ్‌ రాహుల్ ద్రవిడ్ స్పందించాడు. మళ్లీ బరిలోకి దిగడం ఎప్పుడో తనే నిర్ణయించుకోవాలని అన్నాడు.
మానసిక కుంగుబాటేనా.?
గత ఏడాదంతా విరామం లేకుండా జట్టుతో ప్రయాణం చేసిన ఇషాన్ కిషన్.. తుది జట్టులో ఆడింది మాత్రం చాలా తక్కువ. ఎవరైనా అందుబాటులో లేకుంటేనే ఇషాన్‌కు ఛాన్స్‌లు వస్తున్నాయి తప్పితే టీమిండియా తుది జట్టులో కిషన్‌కు పెద్ద అవకాశాలు రావడం లేదు. జట్టులో చోటు దక్కకపోవడంతో ఇషాన్‌కు మానసికంగా కుంగుబాటుకు గురవుతున్నాడని, అందుకే అతడు కొన్నాళ్లు ఆట నుంచి విరామం తీసుకునేందుకు దక్షిణాఫ్రికా సిరీస్‌ నుంచి తప్పుకున్నాడని తెలుస్తోంది. ఐపీఎల్ వరకు ఆటకు దూరంగా ఉండాలని ఇషాన్ కిషన్ భావిస్తున్నట్లు తెలుస్తోంది. కాగా ఈ ఏడాది ఇషాన్ కిషన్ రెండు టెస్ట్‌లతో పాటు 17 వన్డేలు, 11 టీ20లు ఆడాడు. మొత్తం 29 ఇన్నింగ్స్‌ల్లో 29.64 సగటుతో 741 పరుగులు చేశాడు. ఇందులో ఏడు అర్ధ శతకాలు ఉన్నాయి.
క్రమశిక్షణా చర్యలంటూ వార్తలు
ఇషాన్ కిషన్‌పై క్రమశిక్షణ చర్యలేం తీసుకోలేదు. సెలక్షన్‌కు ఇషాన్ కిషనే దూరంగా ఉన్నాడు. దక్షిణాఫ్రికా పర్యటన మధ్యలో విరామం కావాలని కోరడంతో ఒప్పుకున్నాం. ఇషాన్ కిషన్ తిరిగి జట్టులోకి రావాలనుకుంటే దేశవాళీ క్రికెట్లో సత్తాచాటి సెలక్షన్‌కు అందుబాటులో ఉండాలి" అని టీమిండియా హెడ్ కోచ్‌ రాహుల్ ద్రవిడ్ ఇప్పటికే స్పష్టం చేశాడు. ఇషాన్ కిషన్ దేశవాళీలో సత్తా చాటి మళ్లీ జట్టులోకి రావాలని ద్రవిడ్ స్పష్టం చేశాడు. అయితే మానసికంగా అల‌సిపోయాన‌ని చెప్పి దుబాయ్‌లో పార్టీలు ఎంజాయ్ చేస్తుండ‌డంపై ఇషాన్ కిషన్‌పై బీసీసీఐ సీరియ‌స్ అయింద‌ని, ఈ క్రమంలోనే అతడిని అఫ్గానిస్తాన్‌తో టీ20 సిరీస్‌కు ఎంపిక చేయలేదని వార్తలు వ‌చ్చాయి. అయితే ఈ వార్తలను ఈ వార్తలను స్వయంగా రాహుల్ ద్రవిడ్ ఖండించాడు.
అలాంటిదేమీ లేదన్న ద్రవిడ్
ఇషాన్ కిషన్, శ్రేయస్‌ అయ్యర్‌లపై క్రమశిక్షణ చర్యలేం తీసుకోలేదని రాహుల్ ద్రవిడ్ స్పష్టం చేశాడు. సెలక్షన్‌కు ఇషాన్ కిషనే దూరంగా ఉన్నాడని... దక్షిణాఫ్రికా పర్యటన మధ్యలో విరామం కావాలని కోరడంతో ఒప్పుకున్నామని ద్రవిడ్ వెల్లడించాడు. ఇషాన్ కిషన్ తిరిగి జట్టులోకి రావాలనుకుంటే దేశవాళీ క్రికెట్లో సత్తాచాటి సెలక్షన్‌కు అందుబాటులో ఉండాలని సూచించాడు. జట్టులో పోటీ కారణంగానే శ్రేయస్‌ను అఫ్గాన్‌తో టీ 20 సిరీస్‌కు ఎంపిక చేయలేదని... దక్షిణాఫ్రికాతో టీ20ల్లోనూ అతనాడలేదని ద్రవిడ్ గుర్తు చేశాడు. జట్టు ప్రయోజనాలను అనుసరించే కూర్పుపై నిర్ణయం తీసుకోవాల్సి ఉంటుందని ద్రవిడ్ తెలిపాడు.
టాప్ హెడ్ లైన్స్
ట్రెండింగ్ వార్తలు
