Money Plant: మనీ ప్లాంట్, తులసి మొక్కలతో జాగ్రత్త - ఈ పొరపాట్ల వల్ల కష్టాలు, నష్టాలు వేధిస్తాయ్!

అదృష్టాన్ని తెచ్చే మొక్కలుగా కొన్ని మొక్కలను పవిత్రంగా చూసుకోవడం ఆనవాయితి. అలాంటి మొక్కల్లో మనీప్లాంట్, తులసి మొదటి స్థానంలో ఉంటాయి. వాటి విషయంలో ఎలాంటి నియమాలు పాటించాలో తెలుసుకుందాం.

Representational Image/Pixabay and Pexels

కొన్ని మొక్కలు ఇంట్లో పెంచుకోవడాన్ని అదృష్టంగా భావిస్తారు. ఇంకొన్ని మొక్కలను పవిత్రమైనవిగా భావిస్తారు. అలాంటి మొక్కల్లో మనీ ప్లాంట్, తులసి మొక్కలు ముందుంటాయి. వీటి విషయంలో కొన్ని జాగ్రత్తలు, మరికొన్ని నియమాలు ఉన్నాయి. ఈ మొక్కలు ఇంట్లో సరైన దిశలో ఉండాలి. తప్పు దిశలో ఉంటే ప్రతికూల ప్రభావాలు ఉండవచ్చని పండితులు హెచ్చరిస్తున్నారు. నియమానుసారం ఈ మొక్కలను పెంచుకుంటే ఇబ్బంది లేకుండా ఉంటుంది. మరి అవేమిటో తెలుసుకుందాం.

మనీ ప్లాంట్

• వాస్తును అనుసరించి మనీ ప్లాంట్ ఎప్పుడూ కూడా ఈశాన్య దిక్కున పెట్టుకోకూడదు. మనీ ప్లాంట్ ఆగ్నేయ దిక్కున పెట్టుకోవడం మంచిది. అందువల్ల ఇంట్లో సుఖశాంతులు వస్తాయి.
• పచ్చని మనీ ప్లాంట్ ఐశ్వర్యానికి చిహ్నం. ఇంట్లో ఎండిపోయిన మనీప్లాంట్ మొక్కను ఉంచుకోకూడదు. ఒక వేళ మనీప్లాంట్ లో ఎండిపోయిన ఆకులు ఉంటే వెంటనే తీసెయ్యాలి.
• మనీ ప్లాంట్ తీగ ఎప్పుడూ కూడాపైకి ఎగబాకేలాగా ఉండాలి. కింది వైపు రాకూడదు. ఒక వేళ కిందకు వస్తుంటే వాటిని పైకి కట్టాలి.
• మనీ ప్లాంట్ ఎప్పుడూ కూడా ఇంటికి బయట పెట్టకూడదు. మనీప్లాంట్ ఇంట్లోనే ఉండాలి. ప్లాస్టిక్ కుండిలో కూడా పెట్ట కూడదు. గాజు బాటిల్ లో పెట్టుకోవడం మంచిది.
• మనీ ప్లాంట్ ను పడక గదిలో కూడా పెంచుకోవచ్చు. దానివల్ల నిద్రలేమి, ఆందోళనలు తగ్గుముఖం పడతాయి. పడకగదిలో ఒకమూల పెంచుకోవచ్చు. అయితే అది ఆరోగ్యంగా పెరిగేలా జాగ్రత్తలు తీసుకోవాలి.
• ఇంట్లో పెంచుకుంటున్న మనీ ప్లాంట్ ను ఎవరికీ ఇవ్వకూడదు. అలా చేస్తే మీకు దక్కాల్సిన పుణ్యఫలాలు దూరమవుతాయని శాస్త్రం చెబుతోంది.

తులసి మొక్క

ఇంట్లో తులసి మొక్క ఉంటే ప్రసరించే గాలి శుద్ధవుతుంది. గాలిలోని హానికారక రసాయనాలను శోషిస్తుంది. ఇంట్లోకి నెగెటివ్ ఎనర్జీ రాకుండా నిరోధిస్తుంది. తులసి మొక్కను పెంచడం వల్ల ఇంట్లో పాజిటివ్ ఎనర్జీ పెరుగుతుంది. ఇంట్లో వారికి అనారోగ్య సమస్యలు రాకుండా తులసి కాపాడుతుంది. ఇంట్లోకి సౌభాగ్యం తెస్తుంది. ధనవృద్ధికి దోహదం చేస్తుంది. కుటుంబ ఆర్థిక స్థితి మెరుగు పడడానికి తులసి మొక్క తప్పకుండా పెంచుకోవాలి. కుటుంబ సభ్యుల రక్షణకు కూడా తులసి మొక్క పెంచడం మంచి ఉపాయం. ఎందుకంటే తులసి దిష్టి నుంచి కూడా ఇంటిని కాపాడుతుంది. తులసి మొక్క ఉన్న ఇంటిలో కుటుంబ సభ్యుల మధ్య ప్రేమానురాగాలు వెల్లివిరుస్తాయి.

వాస్తును అనుసరించి తులసి మొక్కను ఇంటిలో సరైన స్థానంలో ఉంచాలి. అప్పుడే తులసి వల్ల కలగాల్సిన అన్ని లాభాలు కలుగుతాయి. తులసి మొక్కను తూర్పు దిక్కున పెట్టుకోవడం అన్నింటికంటే శ్రేష్టంగా చెబుతారు. అక్కడ పెట్టే అవకాశం లేకపోతే ఉత్తరం లేదా ఈశాన్యంలో బాల్కనీ లేదా కిటికిలో పెట్టుకోవచ్చు. మొక్కకి సరిపడేంత వెలుతురు కూడా ఉండే విధంగా జాగ్రత్త పడాలి. పూజ గదిలో కుండిలో ఏర్పాటు చేసుకుని వెలుతురు తగిలేలా జాగ్రత్త పడితే సరిసోతుంది. ప్రతి రోజూ సంధ్యా సమయంలో తులసి మొక్క దగ్గర దీపం వెలిగించాలి. ఎందుకంటే తులసిని లక్ష్మీ దేవి భౌతిక రూపంగా భావించి కొలుస్తుంటారు.