Ganesh Chaturthi 2024 : ఈ 8 ఆలయాలను రెండు రోజుల్లో చుట్టేయవచ్చు.. వినాయకచవితికి ప్లాన్ చేసుకోండి!

Vinayaka Chavithi 2024: పరమేశ్వరుడికి 12 జ్యోతిర్లింగాలు...అమ్మవారికి అష్టాదశ శక్తి పీఠాలు.. శ్రీ మహావిష్ణువుకి 108 దివ్య దేశాలు ఎలా ఉన్నాయో గణేషుడికి ప్రత్యేకమైనవే అష్టవినాయక ఆలయాలు..

Ganesh Chaturthi 2024 (Image Credit: Pixabay)

Source : Pixabay

 Ganesh Chaturthi 2024 : అష్టవినాయక ఆలయాలు.. ఇవన్నీ గణపతి స్వయంభు ఆలయాలు అని చెబుతారు.  ఈ 8 ఆలయాల ప్రత్యేకత దేనికదే. ఎక్కడెక్కడో ఉండి ఉంటాయి..అన్నీ దర్శించుకోవడం సాధ్యం అవుతుందా అనుకోకండి..మొత్తం ఈ 8 ఆలయాలు పూణే చుట్టుపక్కలే ఉన్నాయి. పూణెలో స్టే చేస్తే కేవలం రెండు రోజుల్లో అష్టవినాయక మందిరాలను చుట్టేయవచ్చు. ఈ ఆలయాలు ఎక్కడున్నాయ్? పూణే నుంచి ఎంతెంత దూరంలో ఉన్నాయి? ఏ ఆలయం నుంచి దర్శనం ప్రారంభించాలో ఈ కథనంలో తెలుసుకోండి... 

శ్రీ అష్టవినాయక  మందిరం

ఇది  పూణెకు 80 కిలోమీటర్ల దూరంలో ఉన్న మోరేగావ్ లో ఉన్న అష్ట వినాయకమందిరం...అష్టవినాయకులలో ముఖ్యమైనది. మోరేగావ్ ఒకప్పుడు నెమళ్లకు ప్రసిద్ధి..అందుకే ఈ పేరొచ్చందని చెబుతారు. సింధువు అనే రాక్షసుడిని సంహరించేందుకు వినాయకుడు ఇక్కడ మయూరేశ్వరుడిగా అవతరించాడని పురాణ కథనం. ఇక్కడ విగ్రహానికి ఎడమ వైపు తొండం ఉంటుంది..ఆలయ ప్రవేశ ద్వారం వద్ద ఉన్న నందిని శివుడే నేరుగా ప్రతిష్టించాడని చెబుతారు.  ||ఓం మాయరేశ్వరాయ నమః ||

విఘ్నహరేశ్వర మందిరం

పూణె నాసిక్‌ వెళ్లే దారిలో ఓజార్‌ పట్టణంలో  ఉంటుంది విఘ్నహరేశ్వర మందిరం. వినాయకుడి చేతిలో పరాజయం పాలైన విఘ్నాసురుడు క్షమించమని వేడుకుని తన పేరుతో కొలువవ్వాలని వేడుకున్నాడు. అందుకే విఘ్నహరేశ్వరుడు అని పిలుస్తారు. తలపెట్టిన పనుల్లో ఆటంకాలు తొలగిపోవాలంటే ఈ వినాయకుడిని దర్శించుకోవాలని చెబుతారు.        ||ఓం విఘ్నరాజాయ నమః ||

సిద్ధివినాయక మందిరం  

పూణెకు 111 కిలోమీటర్ల దూరంలో ఉన్న సిద్ధాటెక్ గ్రామంలో ఉంది సిద్ధివినాయక మందిరం. మూడు అడుగుల ఎత్తులో కొలువైన వినాయకుడు ఇక్కడ ఉత్తర దిశగా దర్శనమిస్తాడు. తొండం కుడిచేయివైపు తిరిగి ఉంటుంది. ఈ ఆలయం చుట్టూ ప్రదక్షిణ చేయాలంటే ఐదు కిలోమీటర్లు నడవాల్సిందే.  || ఓం సిద్దివినాయక నమః ||

బల్లాలేశ్వర ఆలయం  

పూణే కు 119 కిలోమీటర్ల దూరంలో ఉన్న పాలి గ్రామంలో కొలువయ్యాడు బల్లాలేశ్వర వినాయకుడు. ఇక్కడ గణనాథుడు రాతి సింహాసనంపై కూర్చుని ఉంటాడు. తొండం ఎడమ చేతివైపు తిరిగి ఉంటుంది. ఆలయం శ్రీ ఆకారంలో ఉంటుంది... || ఓం బల్లలేశ్వరాయ నమః ||

వరద వినాయక మందిరం

పూణె నుంచి 130 కిలోమీటర్ల దూరంలో ఉన్న మహాడ్ లో ఉంది వరద వినాయక మందిరం. ఇక్కడున్న గణపతి విగ్రహం ఓ కొలనులో దొరికిందని చెబుతారు. ఇక్కడ నేరుగా భక్తులే గర్భగుడిలో గణపయ్యకి పూజలు చేయొచ్చు.  || ఓం వరదవినాయకాయ నమః ||

చింతామణి మందిరం

పూణె నుంచి 28 కిలోమీటర్ల దూరంలో  తియూర్ గ్రామంలో ఉంది చితామణి గణపయ్య. తూర్పు ముఖంగా దర్శనమిస్తే లంబోదరుడు..భక్తుల ఏం కోరుకున్నా వెంటనే తీర్చేస్తాడని నమ్మకం.  || ఓం చింతామణి గణపతి నమో నమః ||

గిరిజాత్మజ మందిరం 

పూణెకు 97 కిలోమీటర్ల పరిధి  లేయాంద్రి గ్రామంలో ఉంది గిరిజాత్మజ గణపతి ఆలయం. ఇక్కడ ఏకరాయితో చెక్కిన విగ్రహం దక్షిణదిశగా దర్శనమిస్తుంది. || ఓం గిరిజత్మజాయాయ నమః ||

మహాగణపతి మందిరం 

పూణెకు 52 కిలోమీటర్ల దూరంలో  రంజనగావ్ లో కొలువయ్యాడు మాహాగణపతి. త్రిపురాసుర సంహారానికి ముందు శివుడు ఇక్కడ వినాయకుడిని పూజించాడని పురాణగాథ. ఇక్కడ వినాయకుడు తూర్పుముఖంగా దర్శనమిస్తాడు.  || ఓం మహానగతాయే నమః ||

ఈ ఆలయాలన్నీ దర్శించుకునేందుకు రెండు రోజుల సమయం చాలు. ముందుగా మోరేగావ్ లో ఉన్న అష్టవినాయక మందిరంతో దర్శనాలు ప్రారంభించాలి...