Chanakya Niti: వైవాహిక జీవితం - లైంగిక సంబంధాలు.. చాణక్యుడు చెప్పిన ఆసక్తికర అంశాలు

గొప్ప దౌత్యవేత్తగా, రాజనీతికోవిదుడిగా, ఆర్థికవేత్తగా మన్ననలు అందుకున్న చాణక్యుడు… వైవాహిక జీవితం..లైంగిక సంబంధాల గురించి కూడా ఎన్నో ఆసక్తికర విషయాలు చెప్పాడు. అవేంటో చూద్దాం…

వైవాహిక జీవితం-లైంగిక సంబంధాలపై చాణక్యుడు ఏం చెప్పాడంటే...

అర్థశాస్త్రంలో ఎనిమిది రకాల వివాహాల గురించి చెప్పాడు చాణక్యుడు

బ్రాహ్మణ: యుక్త వయస్సు వచ్చిన తన కుమార్తెను తండ్రి తగు వరుడుకి ఇచ్చి వివాహం చేయడం

ప్రజాపత్య: తండ్రి అనుమతి లేకుండా ఓ పురుషుడు - ఓ స్త్రీని వివాహం చేసుకోవడం

ఆర్ష: వివాహం అయిన తర్వాత వరుడు రెండు గోవులను వధువు తండ్రికి ఇచ్చి పెళ్లిని శాస్త్రబద్ధం చేసుకోవడం.

దైవ: దైవపీఠం వద్ద తండ్రి తన కుమార్తెను పురోహితుడిగా వ్యవహరిస్తున్న వ్యక్తికి ఇచ్చేయడం

గాంధర్వ: ప్రేమికులు రహస్యంగా పెళ్లిచేసుకోవడం

అసుర: తండ్రి తన కుమార్తెను ఏదో ఒక ధరకు ఎవరో ఒకరికి ఇచ్చి పెళ్లిచేయడం

రాక్షస: అమ్మాయిని బలవంతంగా ఎత్తుకుపోయి పెళ్లి చేసుకోవడం

పైశాచ: యువతికి మత్తుమందిచ్చి ఆమెకు తెలియకుండా పెళ్లిచేసుకోడం

మొదటి నాలుగు చట్టబద్ధత కల వివాహాలు... మిగిలిన నాలుగూ చట్టబద్ధతలేని వివాహాలు అయినప్పటికీ… ఆ తర్వాత వధువు తల్లిదండ్రులు అంగీకరించాక… అవికూడా చట్టబద్ధమైనవి అవుతాయి.

వివాహ సమయంలో ఇచ్చిన కట్నం వరుడి తండ్రికి చెందుతుంది. తండ్రిలేకపోతే తల్లికి చెందుతుంది. పురుషుడు పునర్వివాహం చేసుకుంటే ఆ కట్నం మొత్తం స్త్రీకే చెందుతుంది. 

పెళ్లి ఎప్పుడు రద్దుచేసుకోవచ్చు

• పెళ్లి విషయంలో ఒప్పందం కుదిరినా… పాణిగ్రహణం కాకపోతే వివాహం రద్దుచేసుకోవచ్చు.
• పాణిగ్రహణం అయిన తర్వాత కూడా… వధువు ఇదివరకే కన్యత్వం కోల్పోయిందని రుజువైనా… వరుడు పురుషత్వం లేనివాడైనా ఆ వివాహం రద్దవుతుంది. ఈ నియమం బ్రాహ్మణ, క్షత్రియ, వైశ్య కులాలవారికే వర్తిస్తుంది.
• శూద్రుల విషయంలో వైవాహిక ఒప్పందం వధూవరుల కలయికకు ముందు ఎప్పుడైనా జరగొచ్చు. కలయిక అయిన తర్వాత రద్దు అయ్యే అవకాశం లేదు.
• ఏ కులంలో అయినా స్త్రీ గర్భవతి అయిన తర్వాత వివాహం రద్దుకి అవకాశం ఉండదు
• స్త్రీకి లైంగికపరమైన లోపం ఉందని తల్లిదండ్రులకు తెలిశాక… రహస్యంగా ఉంచి పెళ్లి చేసినా… వధువుకు-ఆమె తల్లిదండ్రులకు అపరాధ రుసుము విధించి పెళ్లి రద్దుచేస్తారు. పురుషుడి విషయంలో ఇదే జరిగితే అపరాధ రుసుము ఎక్కువ మొత్తంలో వసూలు చేయాల్సి ఉంటుంది
• పెళ్లిచూపుల్లో ఒకరిని చూపించి మరోకరితో పెళ్లి చేయడానికి ప్రయత్నిస్తే అది పెద్దనేరంగా భావించి… వధువు లేదా వరుడు తల్లిదండ్రుల నుంచి పెద్దమొత్తంలో అపరాధ రుసుము వసూలు చేయాల్సి ఉంటుంది. 
  
• కౌటిల్యుడి కాలంలో రజస్వల అయిన బాలికకు మూడేళ్లలోపు పెళ్లి జరిపించడం సంప్రదాయం. అలా చేయకపోతే బాలికతండ్రి శిక్షార్హుడు.
• తమ కులానికి చెందిన పురుషుడితో కూతురికి తండ్రి పెళ్లి చేయాలి. వేరే కులానికి చెందిన యువకుడికి ఇచ్చి పెళ్లిచేస్తే… ఆ సమయంలో వధువుకి ఇచ్చిన నగలన్నీ తండ్రి తిరిగి తీసుకోవచ్చు. కులాంతర వివాహానికి చాణక్యుడు విధించిన శిక్ష ఇది.
• స్త్రీకి 12 ఏళ్లు వచ్చినపుడు… పురుషుడికి 16 ఏళ్లు  ఉండాలి. అప్పుడే వారి వైవాహిక జీవితం మొదలవుతుంది. వేరే కారణాలతో బాలిక తల్లిదండ్రులు కాలయాపన చేస్తే శిక్షార్హులు.
• ఏ కారణం చేతేనైనా పెళ్లిచేయలేకపోతే… కనీసం నిశ్చితార్థమైనా జరిపించాలి. ఆ తర్వాత ఏడు నెలలు దాటేలోగా పెళ్లిచేయకపోతే…వరుడు-వధువు లైంగిక సంబంధం పెట్టుకోవచ్చు. అది నేరంగా పరిగణించరాదు.
• నిశ్చితార్థం అయిన తర్వాత ఏవేవో కారణాలు చూపి వరుడు… వధువుని నిందిస్తే శిక్షార్హుడు. ఆ వివాహం కూడా రద్దు చేసి సదరు వరుడికి శిక్ష విధిస్తారు.
• పెళ్లైనంత మాత్రాన భార్యపై… భర్తకి సర్వాధికారులు ఉండవు. ఆమె అంగీకారం లేకుండా ముట్టుకోరాదు.. అంటూ వైవాహిక జీవితం - లైంగిక సంబంధాల గురించి చాణక్యుడు తన అభిప్రాయాలు పేర్కొన్నాడు.