YSRCP Plenary Vijayamma : వైఎస్ఆర్‌సీపీలో కొత్త టెన్షన్ - ప్లీనరీకి గౌరవాధ్యక్షురాలు హాజరవుతారా ?

వైఎస్ఆర్‌సీపీ ప్లీనరీకి గౌరవాధ్యక్షురాలు హాజరవుతారా ? చివరి క్షణంలో అనివార్య కారణాలతో రాలేకపోతారా ?

వైఎస్ఆర్‌సీపీలో కొత్త టెన్షన్ - ప్లీనరీకి గౌరవాధ్యక్షురాలు హాజరవుతారా ?

YSRCP Plenary Vijayamma :    వైఎస్ఆర్‌సీపీ ప్లీనరీ ఈ నెల 7, 8 తేదీల్లో జరగనుంది. ఇందుకు సంబంధించిన ఏర్పాట్లను ఆ పార్టీ నేతలు భారీగా చేస్తున్నారు. నాగార్జున యూనివర్శిటీ ఎదురుగా ఉన్న విశాలమైన మైదానంలో ఈ కార్యక్రమం జరుగుతుంది. రెండు రోజుల పాటు నిర్వహించే ప్లీనరీలో ఈ సారి ఆ పార్టీ గౌరవాధ్యక్షురాలు వైఎస్ విజయలక్ష్మి పాల్గొంటారా లేదా అన్న సందేహం వైఎస్ఆర్‌సీపీ పార్టీ నేతల్లోనే కాదు  ఇతర రాజకీయ పార్టీల్లోనూ వ్యక్తమవుతోంది. దీనికి కారణం ఉంది. కొంత కాలంగా వైఎస్ విజయలక్ష్మి వైఎస్ఆర్‌సీపీ కార్యక్రమాల్లో పాల్గొనడం లేదు. వైఎస్ఆర్ తెలంగాణ పార్టీ కార్యక్రమాల్లో కనిపిస్తున్నారు. 

వైఎస్ఆర్‌టీపీ కార్యక్రమాల్లో పాల్గొంటున్న వైఎస్ విజయలక్ష్మి 

తెలంగాణలో కుమార్తె షర్మిల రాజకీయ పార్టీ ప్రారంభిండంతో ఆమె కుమార్తెకు సహాయంగా ఉంటున్నారు. కొన్ని సందర్భాల్లో ప్రత్యక్షంగా కూడా వైఎస్ఆర్ తెలంగాణ పార్టీ కార్యక్రమాల్లో పాల్గొన్నారు. దీక్షల్లోనూ కూర్చున్నారు. అయితే వైఎస్ఆర్‌సీపీ ప్రోగ్రామ్స్‌లో మాత్రం కనిపించడం లేదు. అదే సమయంలో కుమారుడు సీఎం జగన్‌తో విభేదాలు వచ్చాయన్న ప్రచారం జోరుగా సాగుతోంది. ఇలాంటి సమయంలో ప్లీనరీకి గౌరవాధ్యక్షురాలు రాకపోతే ఇబ్బందికరమని ఆ పార్టీ వర్గాలు భావిస్తున్నాయి. ఇదే అంశంపై మీడియా ప్రతినిధులు వైఎస్ఆర్‌సీపీ అగ్రనేతల నుంచి క్లారిటీ తీసుకున్నారు. 

ఖచ్చితంగా వస్తారని సజ్జల, విజయసాయిరెడ్డి ప్రకటన 

ప్లీనరీ వేదికను పరిశీలించిన సమయంలో సజ్జల రామకృష్ణారెడ్డి, విజయసాయిరెడ్డిలను మీడియా ప్రతినిధులు ఈ అంశంపై ప్రశ్నించారు. ఈ సందర్భంగా వారు మీడియా ప్రతినిధులపై అసహనం వ్యక్తం చేశారు. తమ పార్టీ గౌరవాధ్యక్షురాలు తమ పార్టీ ప్లీనరీకి ఎందుకు రారని .. అలా ఎందుకు అనుకుంటున్నారని తిరిగి ప్రశ్నించారు. ఖచ్చితంగా వస్తారని వారు తేల్చి చెప్పారు. దీంతో వైఎస్ఆర్‌సీపీ తరపు నుంచి మాత్రం క్లారిటీ వచ్చినట్లయింది. అయితే చివరి క్షణంలో అనారోగ్యం కారణంగా రాలేకపోయారన్న కారణం చెప్పడానికీ చాన్స్ ఉందని రాజకీయ వర్గాలు విశ్లేషిస్తున్నాయి. 

షర్మిల కుమార్తె కాన్వొకేషన్‌కు అమెరికాకు వెళ్లిన విజయమ్మ.. మరి ప్యారిస్‌కు కూడా వెళ్లారా?

ప్రస్తుతం సీఎం జగన్ పారిస్‌లో ఉన్నారు. కుమార్తె గ్రాడ్యూయేషన్ పూర్తయిన సందర్భంగా యూనివర్శిటీ నిర్వహిస్తున్న కాన్వొకేషన్‌లో పాల్గొనేందుకు వెళ్లారు. గత నెలలో షర్మిల కుమార్తె అమెరికాలో ఇలా గ్రాడ్యూయేషన్ పూర్తి చేశారు. ఆ కాన్వొకేషన్‌కు షర్మిలతో పాటు విజయమ్మ కూడా వెళ్లారు. ఇప్పుడు మరో మనవరాలు..జగన్ కుమార్తె కాన్వొకేషన్‌కు విజయమ్మ వెళ్లారో లేదో స్పష్టత లేదు.