Telangana Graduate MLC Polls : ఎమ్మెల్సీ రేసులో హస్తానికి మిత్రపక్షాల షాక్ - టీజేఎస్-కమ్యూనిస్టుల ఉమ్మడి అభ్యర్థి సిద్ధం?
MLC Elections 2026: ఉమ్మడి ఖమ్మం-వరంగల్-నల్గొండ గ్రాడ్యుయేట్ ఎమ్మెల్సీ పోరులో కాంగ్రెస్‌కు ఊహించని షాక్ తగిలే సూచనలు కనిపిస్తున్నాయి. కోదండరాం, వామపక్షాలు అభ్యర్థిని నిలబెట్టాలనుకుంటున్నాయి.
Prof Kodandaram TJS MLC Candidate: తెలంగాణలో రాబోయే రెండు గ్రాడ్యుయేట్ ఎమ్మెల్సీ స్థానాలను క్లీన్ స్వీప్ చేయాలని భావిస్తున్న అధికార కాంగ్రెస్ పార్టీకి ప్రారంభంలోనే ఊహించని రాజకీయ సంకటం ఎదురైంది. అసెంబ్లీ ఎన్నికల్లో కలిసి నడిచిన మిత్రపక్షాలను పక్కనబెట్టి, ఏకపక్షంగా అభ్యర్థుల ఖరారు వైపు అడుగులు వేయడం గాంధీభవన్‌ను రాజకీయ ఉక్కపోతలోకి నెట్టింది. ముఖ్యంగా, ఉద్యమాలకు , ఉద్యోగ-ఉపాధ్యాయ సంఘాలకు పెట్టని కోటగా ఉన్న ఉమ్మడి ఖమ్మం–వరంగల్–నల్గొండ పట్టభద్రుల స్థానంపై ప్రొఫెసర్ కోదండరాం నేతృత్వంలోని తెలంగాణ జనా సమితి మొదటినుంచీ భారీ ఆశలు పెట్టుకుంది. అయితే, కాంగ్రెస్ పెద్దలు ఈ ఆకాంక్షలను కాదని ఏకపక్షంగా వ్యవహరించడంపై టీజేఎస్‌తో పాటు క్షేత్రస్థాయిలో బలమైన ఓటు బ్యాంకు కలిగిన సీపీఐ, సీపీఎంలు తీవ్ర అభ్యంతరం వ్యక్తం చేస్తున్నాయి.
అభ్యర్థిని నిలిపితే కాంగ్రెస్‌కు సమస్యే
ఖమ్మం, నల్గొండ, వరంగల్ జిల్లాల్లో వామపక్షాలకు, విద్యావంతుల వర్గానికి దశాబ్దాల నుంచి స్పష్టమైన ఓటు బ్యాంకు , ఆర్గనైజేషనల్ స్ట్రక్చర్ ఉన్నాయి. అసెంబ్లీ సమరంలో కాంగ్రెస్‌తో జతకట్టి అధికార పీఠాన్ని అందించడంలో కీలక పాత్ర పోషించిన తమ ఉనికిని, కనీస సంప్రదింపులు కూడా లేకుండా పక్కన పెట్టడాన్ని కమ్యూనిస్టు పార్టీలు తీవ్ర ధిక్కార వైఖరిగా పరిగణిస్తున్నాయి. దీంతో, కాంగ్రెస్ పార్టీకి తమ రాజకీయ బలాన్ని రుచి చూపించేందుకు టీజేఎస్ , సీపీఐ, సీపీఎంలు సంయుక్తంగా మూడో అభ్యర్థిని బరిలోకి దించే దిశగా వేగంగా పావులు కదుపుతున్నాయి. ఈ ఐక్య వేదిక రూపుదిద్దుకుంటే, అది కచ్చితంగా హస్తం పార్టీ విజయ అవకాశాలను దెబ్బతీసే పెద్ద అస్త్రంగా మారనుంది.
కాంగ్రెస్ ఓట్లకు గండి
పట్టభద్రుల నియోజకవర్గాల్లో సాధారణ ఎన్నికల లాగా కేవలం పార్టీ గుర్తులతో ఓట్లు పడవు. ప్రాధాన్యత ఓటింగ్ విధానం ఇక్కడ గెలుపోటములను శాసిస్తుంది. ఈ తరహా పోరులో ఉద్యోగ, ఉపాధ్యాయ, నిరుద్యోగ సంఘాల మద్దతు ఉన్న టీజేఎస్-వామపక్షాల ఉమ్మడి అభ్యర్థి బరిలో నిలబడితే, కాంగ్రెస్‌కు పడే మొదటి ప్రాధాన్యత ఓట్లలో భారీగా కోత పడటం ఖాయం. గ్రాడ్యుయేట్ స్థానాల్లో సైద్ధాంతిక స్పష్టత కలిగిన లెఫ్ట్ , ఐక్య పోరాటాల బ్యాక్‌గ్రౌండ్ ఉన్న ఓటర్లు అధికంగా ఉంటారు. ఈ ఓటు బ్యాంకు కాంగ్రెస్ హ్యాండ్‌బుక్ నుంచి చేజారి ఉమ్మడి అభ్యర్థి వైపు మళ్లితే, అది రేవంత్ రెడ్డి సర్కార్ ఆశించిన క్లీన్ స్వీప్ రికార్డుకు గండి కొడుతుంది.
బహుముఖ పోటీలో ప్రతి ఓటు కీలకమే
మరోవైపు, ప్రతిపక్ష బిఆర్ఎస్ , దూకుడుగా ఉన్న కల్వకుంట్ల కవిత తెలంగాణ రక్షణ సే , అలాగే జాతీయ పార్టీ అయిన బీజేపీ కూడా ఈ పట్టభద్రుల స్థానంలో గట్టి పోటీని ఇచ్చేందుకు కసరత్తు చేస్తున్నాయి. ఈ బహుముఖ పోటీ వాతావరణంలో కాంగ్రెస్ తన మిత్రపక్షాలను కోల్పోయి ఒంటరిగా బరిలోకి దిగడం అంటే.. ప్రతిపక్షాలకు రాజకీయ మైలేజ్ ఇవ్వడమే అవుతుంది. బిఆర్ఎస్, బీజేపీలు ఉమ్మడి ఖమ్మం-నల్గొండ-వరంగల్‌లో ఉన్న ద్వితీయ ప్రాధాన్యత ఓట్లను తమ వైపు తిప్పుకునేందుకు శ్రమిస్తుండగా, మిత్రపక్షాల తిరుగుబాటు కాంగ్రెస్ వ్యూహకర్తలను తీవ్రమైన ఆత్మరక్షణలో పడేసింది. గాంధీభవన్‌లో ఇప్పటికే ఈ పరిణామంపై అత్యవసర అంతర్గత చర్చలు మొదలైనట్లు సమాచారం.
చర్చలు జరుపుతున్న మహేష్ గౌడ్
పరిస్థితి చేయిదాటిపోక ముందే ప్రొఫెసర్ కోదండరామ్‌తో పాటు సీపీఐ, సీపీఎం అగ్రనేతలతో చర్చలు జరిపి, కాంప్రమైజ్ ఫార్ములాను కుదర్చాలని కాంగ్రెస్ సీనియర్లు రేవంత్ రెడ్డి , పీసీసీ నాయకత్వానికి విజ్ఞప్తి చేస్తున్నారు. స్థానిక సంస్థలు, ఎమ్మెల్సీ సమరాల్లో మిత్రపక్షాలను కలుపుకుని పోకపోతే రాబోయే రోజుల్లో పార్లమెంట్, క్షేత్రస్థాయి రాజకీయాల్లో ఇబ్బందులు తప్పవనే హెచ్చరికలు వినిపిస్తున్నాయి. టీజేఎస్ , కమ్యూనిస్టుల ఉమ్మడి అభ్యర్థి ప్రచారం ఉమ్మడి ఖమ్మం-వరంగల్-నల్గొండ పట్టభద్రుల సమరంలో సరికొత్త సమీకరణాలకు తెరలేపింది. కాంగ్రెస్ పార్టీ తన పెద్దరికాన్ని ప్రదర్శించి అసంతృప్త మిత్రులను ప్రసన్నం చేసుకుంటుందా లేక తమ ఒంటరి ప్రయాణంతో ఎమ్మెల్సీ రిజల్ట్‌లో సంచలన మలుపులను ఆహ్వానిస్తుందా అనేది రానున్న రోజుల్లో జరగబోయే పొలిటికల్ చర్చలపై ఆధారపడి ఉంది.
టాప్ హెడ్ లైన్స్
ట్రెండింగ్ వార్తలు
