Telangana Finances: బకాయిల సుడిగుండంలో తెలంగాణ: రూ. 65 వేల కోట్ల పెండింగ్ బిల్లులు - రేవంత్ ప్రభుత్వానికి ఆర్థిక సవాల్!

Revanth Reddy Government: తెలంగాణలో తీవ్రమవుతున్న ఆర్థిక సంక్షోభం. కాంట్రాక్టర్ల బకాయిలు రూ. 51,000 కోట్లు, ఉద్యోగుల పెండింగ్ డిఏ , బెనిఫిట్స్ రూ. 14,000 కోట్లు దాటాయి. ఈ సమస్యను ఎలా అధిగమిస్తారు?

బకాయిల సుడిగుండంలో తెలంగాణ: రూ. 65 వేల కోట్ల పెండింగ్ బిల్లులు - రేవంత్ ప్రభుత్వానికి ఆర్థిక సవాల్!

Source : Social Media

Telangana Debt Crisis:   తెలంగాణలో ముఖ్యమంత్రి రేవంత్ రెడ్డి నేతృత్వంలోని కాంగ్రెస్ ప్రభుత్వం తీవ్ర ఆర్థిక సంక్షోభాన్ని ఎదుర్కొంటోంది. డిసెంబర్ 2023లో బాధ్యతలు చేపట్టిన నాటికి గత ప్రభుత్వం నుంచి వారసత్వంగా లభించిన రూ. 40,000 కోట్ల మేర పాత బిల్లులను క్లియర్ చేయడం కొత్త ప్రభుత్వానికి పెద్ద బాధ్యతగా మారింది. అందులోంచి ప్రాథమికంగా దాదాపు రూ. 8,000 కోట్ల బకాయిలను ప్రభుత్వం చెల్లించినప్పటికీ, నిరంతరం సమకూరుతున్న కొత్త బిల్లులు, పరిపాలనా వ్యయాల కారణంగా పెండింగ్ బిల్లుల భారం తగ్గే బదులు రెట్టింపైంది. ప్రస్తుతం కాంట్రాక్టర్లు, మాజీ సర్పంచులు, సరఫరాదారుల బకాయిలే ఏకంగా రూ. 51,000 కోట్లు దాటిపోవడం రాష్ట్ర ఆర్థిక ఆరోగ్య పరిస్థితికి అద్దం పడుతోంది.

బిల్లుల మంజూరు చాలా పెద్ద సమస్య 

రోడ్లు, నీటిపారుదల, ఇతర మౌలిక వసతుల పనులు చేపట్టిన కాంట్రాక్టర్లతో పాటు గ్రామాల్లో అభివృద్ధి పనులు పూర్తి చేసిన మాజీ సర్పంచులు బిల్లులు రాక తీవ్ర ఇబ్బందులు పడుతున్నారు. ప్రభుత్వ చెల్లింపులు నిలిచిపోవడంతో బ్యాంకుల నుంచి తెచ్చిన అప్పులకు వడ్డీలు కట్టలేక కాంట్రాక్టింగ్ రంగానికి చెందిన చిన్న, మధ్యతరహా వ్యాపారులు సంక్షోభంలో కూరుకుపోయారు. ఇదివరకు చేపట్టిన పనులకే నిధులు విడుదల కాకపోవడంతో నూతన అభివృద్ధి పనుల నిమిత్తం టెండర్లు పిలిచేందుకు లేదా కాంట్రాక్టర్లు ముందుకు వచ్చేందుకు వెనుకంజ వేస్తున్నారు. ఇది రాష్ట్రవ్యాప్తంగా అభివృద్ధి కార్యక్రమాల వేగాన్ని తీవ్రంగా మందగించేలా చేస్తోంది.

బకాయిల కోసం ఉద్యోగుల ఎదురుచూపులు

ఈ వరుస బకాయిలకు తోడు ప్రభుత్వ ఉద్యోగులు, పెన్షనర్ల చెల్లింపుల సమస్య మరీ జటిలంగా మారింది. ఆగస్టు 2026 నాటికి ఉద్యోగులు, రిటైర్డ్ సిబ్బందికి చెల్లించాల్సిన మొత్తం బకాయిలు రూ. 14,000 కోట్లకు చేరుకున్నాయి. విధుల్లో ఉన్న సిబ్బందికి చెందిన డీఏ బకాయిలు, సరెండర్ లీవ్ గ్రాంట్లు రూ. 6,200 కోట్ల మేర పేరుకుపోగా, రిటైర్డ్ ఉద్యోగుల జీపీఎఫ్  , పెన్షన్ ప్రయోజనాల బకాయిలు ఏకంగా రూ. 8,000 కోట్లు దాటాయి. ప్రభుత్వం అధికారంలోకి వచ్చిన తర్వాత రూ. 4,575 కోట్ల బకాయిలను విడుదల చేసినట్లు చెబుతున్నప్పటికీ, ఈ ఒక్క ఏడాదిలోనే సుమారు 9,000 మంది ఉద్యోగులు విధి నిర్వహణ నుంచి పదవీ విరమణ పొందడంతో గ్రాట్యుటీ, పెన్షన్ ఎన్‌క్యాష్‌మెంట్ భారం కొత్తగా వచ్చి చేరింది.

పెరుగుతున్న ఖర్చులు

మరోవైపు కాంట్రాక్ట్, ఔట్‌సోర్సింగ్ మరియు తాత్కాలిక ప్రాతిపదికన సేవలందిస్తున్న ఉద్యోగులకు అందాల్సిన వేతనాల్లో కూడా రూ. 2,000 కోట్ల మేర బకాయిలు ఉండటం క్షేత్రస్థాయి పాలనపై ప్రభావం చూపుతోంది.  దీంతో పాటు జులై 2023 నుంచి పెండింగ్‌లో ఉన్న 6 కరువు భత్యం వాయిదాలలో ప్రభుత్వం ఇటీవల 2 వాయిదాలకు ఆమోదం తెలిపినప్పటికీ, ఇంకా మరో 4 డీఏ వాయిదాలు బకాయిల రూపంలోనే వేచి చూస్తున్నాయి. రాష్ట్ర బడ్జెట్‌లో  పెన్షన్లు, జీతాల వ్యయం  విపరీతంగా పెరగడమే ఈ సంక్షోభానికి ప్రధాన కారణం. 2023-24 నాటికి రాష్ట్ర మొత్తం బడ్జెట్‌లో జీతాలు, పెన్షన్ల వాటా 17.81 శాతంగా ఉండగా, 2026-27 ఆర్థిక సంవత్సరానికి అది 19.47 శాతానికి పెరిగింది. పన్నుల ఆదాయం, కేంద్ర నిధుల రాక అంచనాల కంటే తగ్గడం, దానికి తోడు రుణాల అసలు, వడ్డీ చెల్లింపులు గరిష్ఠ స్థాయికి చేరడం వల్ల ఖజానాపై విపరీతమైన ఒత్తిడి పెరుగుతోంది. మూలధన వ్యయానికి నిధులు సరిపోక పాత అప్పులు తీర్చడానికే కొత్తగా రుణాలు సేకరించాల్సిన పరిస్థితి ఉత్పన్నమవుతోంది.

 ఒకవైపు సంక్షేమ పథకాల అమలు, మరోవైపు పేరుకుపోయిన రూ. 65,000 కోట్లకు పైగా సర్వీస్, డెవలప్‌మెంట్ బకాయిలను సమతుల్యం చేసుకోవడం రేవంత్ రెడ్డి ప్రభుత్వానికి అత్యంత సంక్లిష్టమైన సవాలుగా మారింది. పన్నుయేతర ఆదాయాన్ని పెంచుకోవడం, ప్రాధాన్యతా ప్రాజెక్టులను సవరిస్తూ క్రమశిక్షణతో కూడిన ఆర్థిక నిర్వహణను పాటించకపోతే.. ఈ  బకాయిల సుడిగుండం  రాష్ట్ర యంత్రాంగాన్ని మరింత ప్రతిష్టంభనలోకి నెట్టే ప్రమాదం ఉందని ఆర్థిక విశ్లేషకులు హెచ్చరిస్తున్నారు. 

 

మరిన్ని చదవండి

బీజేపీ ఆఫీసు నుంచి వచ్చే లిస్ట్ ప్రకారమే ఓట్లు తొలగింపు: ప్రకాష్ రాజ్ ఆరోపణలు

ఖైరతాబాద్ ఉపఎన్నిక రేసు ఆగినట్లేనా? 6 నెలల్లోపు ఎన్నిక ఉండదా?