తర్వాతి సినిమాకు రెడీ అయిన లెజెండ్ శరవణన్ - కొత్త లుక్ చూశారా?

తమిళ హీరో, లెజెండ్ స్టోర్స్ యజమాని శరవణన్ తర్వాతి సినిమాకు రెడీ అయ్యారు.

లెజెండ్ శరవణన్

తమిళ నాట శరవణ స్టోర్స్ అంటే తెలియని వారు ఉండరు. అవి చాలా ఫేమస్ అన్న మాట. వాటి అధినేత శరవణన్ 2022లో సినిమాల్లో కూడా అరంగేట్రం చేశాడు. ‘ది లెజెండ్’ అనే సినిమాతో వెండితెరకు విచ్చేశాడు.

కానీ ఆ సినిమాకు విపరీతమైన నెగిటివ్ ఫీడ్‌బ్యాక్ వచ్చింది. క్రిటిక్స్ ఈ సినిమాను ఏకి పడేశారు. బాక్సాఫీస్ దగ్గర కూడా ఈ సినిమా ఆశించిన వసూళ్లు రాబట్టడంలో విఫలం అయింది.

జేడీ, జెర్రీ ద్వయం ఈ సినిమాకు దర్శకత్వం వహించారు. సినిమాటోగ్రాఫర్ వేల్‌రాజ్, ఎడిటర్ రూబెన్, మ్యూజిక్ డైరెక్టర్ హారిస్ జయరాజ్ వంటి హేమాహేమీలు ఈ సినిమాకు పని చేశారు.

ఊర్వశి రౌతేలా, ప్రభు, వివేక్, యోగిబాబు, సుమన్, నాజర్, విజయ్ కుమార్, తంబి రామయ్య, రోబో శంకర్ వంటి స్ట్రాంగ్ సపోర్టింగ్ క్యాస్ట్ కూడా ఈ సినిమాలో నటించారు. కానీ ఈ సినిమాను కాపాడలేకపోయారు.

లెజెండ్ వచ్చిన ఏడాదిన్నర తర్వాత శరవణన్ కొత్త సినిమాకు రెడీ అయ్యారు. ఈ విషయాన్ని ఆయన తన సోషల్ మీడియా ఖాతాల ద్వారా అధికారికంగా కూడా ప్రకటించారు. కొత్త లుక్‌లో కొన్ని ఫొటోలు కూడా షేర్ చేశారు.

ఈ ఫొటోల్లో ఆయన ఎక్కడో మంచు కొండల్లో ఉండటం చూడవచ్చు. కొత్త సినిమా గురించిన వివరాలను త్వరలో అధికారికంగా ప్రకటిస్తామని తెలిపారు. ఇది ఆయన ఫ్యాన్స్‌కు కచ్చితంగా గుడ్ న్యూసే.