Raa Raja Movie: స్క్రీన్ మీద ఎవ్వరూ కనిపించరు... 'రా రాజా' డిఫరెంట్ ఎక్స్‌పీరిమెంట్ - దర్శక నిర్మాత శివప్రసాద్ ఇంటర్వ్యూ

B Shiva Prasad Interview: మార్చి 7, 2025న థియేటర్లలోకి వస్తున్న తెలుగు సినిమాల్లో 'రా రాజా' ఒకటి. దీని స్పెషాలిటీ ఏమిటంటే... స్క్రీన్ మీద ఆర్టిస్టుల ముఖాలు కనిపించవు.

'రా రాజా' దర్శక నిర్మాత శివప్రసాద్ ఇంటర్వ్యూ

''ఇప్పుడు ప్రేక్షకుల అభిరుచి మారింది. హీరో హీరోయిన్ల పేర్లు, మొహాలు చూసి థియేటర్లకు రావడం లేదు. కథ నచ్చితే, కంటెంట్ బాగుంటే సినిమా ఏదైనా చూస్తున్నారు. కంటెంట్ బేస్డ్ సినిమా తీయాలని 'రా రాజా' చేశా'' అని దర్శక నిర్మాత బి శివ ప్రసాద్ అన్నారు. శ్రీమతి పద్మ సమర్పణలో శ్రీ పద్మిణి సినిమాస్ పతాకంపై స్వీయ దర్శక నిర్మాణంలో తెరకెక్కించారు. మార్చి 7 (శుక్రవారం) థియేటర్లలో విడుదల అవుతోంది. ఈ నేపథ్యంలో మీడియాతో శివప్రసాద్ మాట్లాడుతూ... ''మా సినిమాలో ఆర్టిస్టులు ఎవరూ కనిపించకపోయినా అన్ని రకాల భావోద్వేగాలు ఉంటాయి. లవ్, కామెడీ, హారర్... ప్రతిదీ ఆడియన్స్ ఫీల్ అవుతారు. అందరినీ ఎంగేజ్ చేసేలా సినిమా ఉంటుంది'' అని చెప్పారు. 

'మాతృ' సినిమాతో నిర్మాతగా ప్రయాణం ప్రారంభించిన తనకు, ఆ సినిమా చేసే సమయంలో 'రా రాజా' ఆలోచన వచ్చిందని, కథ రెడీ చేశాక సెట్స్ మీదకు తీసుకు వెళ్లానని, దర్శక నిర్మాతగా ప్రాజెక్ట్ చేశానని బి శివ ప్రసాద్ చెప్పారు. ఇంకా ఆయన మాట్లాడుతూ... ''ఈ సినిమాకు టెక్నికల్ టీం ప్లస్ పాయింట్. కెమెరామెన్ రాహుల్ శ్రీ వాత్సవ్ బాగా చేశారు. దర్శకుడికి ఏం కావాలో తెలుసుకుని ఆయన పని చేస్తారు'' అని చెప్పారు.