UK Political Crisis: యూకే ప్రధానికి దెబ్బ మీద దెబ్బ- మరో ఆరుగురు మంత్రులు రాజీనామా!

UK Political Crisis: బ్రిటన్ సర్కార్ సంక్షోభం దిశగా సాగుతోంది. ఇప్పటివరకు 8 మంది మంత్రులు తమ పదవులకు రాజీనామా చేశారు.

(Image Source: PTI)

UK Political Crisis: బ్రిటన్​ ప్రధాని బోరిస్ జాన్సన్​కు షాక్ మీద షాక్ తగులుతోంది. ఆర్థిక మంత్రి రిషి సునాక్​, ఆరోగ్య మంత్రి సాజిద్ జావిద్​ మంగళవారం రాజీనామా చేయగా.. తాజాగా మరో ఆరుగురు మంత్రులు రిజైన్ చేశారు. దీంతో మొత్తం రాజీనామా చేసిన వారి సంఖ్య 8కి చేరింది.

మొదట శిశు, కుటుంబ సంక్షేమ శాఖ మంత్రి విల్​ క్విన్స్​, రవాణాశాఖ మంత్రి లారా ట్రాట్​ రాజీనామా చేశారు. తర్వాత కొద్ది సేపటికే మరో నలుగురు మంత్రులు తమ పదవులకు రాజీనామా సమర్పించారు.

ఆరోపణలు ఎదుర్కొంటున్న వ్యక్తిని ఉన్నత పదవిలో కూర్చోబెట్టారని వీరు​ విమర్శించారు. దీంతో తమకు రాజీనామా తప్ప మరో మార్గం లేదని లేఖలో తెలిపారు.

ఇదే కారణమా?

పార్టీ గేట్‌ మొదలుకుని పలు ఆరోపణలు, సమస్యలతో జాన్సన్ ప్రభుత్వం ఉక్కిరిబిక్కిరి అవుతోంది. ఇలాంటి సమయంలో ఇద్దరు సీనియర్ మంత్రులు రాజీనామా చేయడం వల్ల ప్రభుత్వం కుప్పకూలే ప్రమాదం ఉందని జాన్సన్ సర్కార్ భయపడుతోంది. ప్రధాని నాయకత్వంపై నమ్మకం కోల్పోయామంటూ ఆయనకు రాసిన రాజీనామా లేఖల్లో మంత్రులిద్దరూ పేర్కొన్నారు.

 

" కొంతకాలంగా ప్రధాని జాన్సన్‌ పనితీరు దారుణంగా ఉంది. ప్రభుత్వం సజావుగా, సమర్థంగా పని చేయాలని ప్రజలు ఆశిస్తారు. ఆ ప్రమాణాలు లోపించాయి అందుకే తప్పుకుంటున్నా. చాలా సందర్భాల్లో మీ వైఖరిని వ్యక్తిగతంగా ప్రశ్నించినా ప్రజాప్రయోజనాల దృష్ట్యా అందరి ముందూ మాత్రం సమర్థించాను. కానీ మౌలికంగా మనిద్దరివీ వేర్వేరు దారులు. ఇలా కలిసి కొనసాగలేమన్న నిర్ధారణకు వచ్చా.                                                                           "

- రిషి సునక్

జాన్సన్‌ నేతృత్వంలో పరిస్థితులు మెరుగు పడే అవకాశాలు ఏ మాత్రమూ లేవని అందుకే రాజీనామా చేస్తున్నట్లు సాజిద్ చెప్పారు.

పార్టీ కొంపముంచిందా?

కరోనా ఉద్ధృతంగా ఉన్న రోజుల్లో అధికార నివాసంలో మందు పార్టీ చేసుకున్నారన్న ఆరోపణలపై జాన్సన్‌ ఇప్పటికే ఇబ్బందికర పరిస్థితులను ఎదుర్కోవాల్సి వచ్చింది. దీనిపై ఆయన ప్రజలకు క్షమాపణలు కూడా చెప్పారు. ఆ తర్వాత పార్టీలో కూడా ఆయనకు మద్దతు తగ్గిపోతూ వచ్చింది.