NEET 2024: నీట్ ఎలా నిర్వహించాలో సలహాలు ఇవ్వండి, విద్యార్థుల తల్లిదండ్రులను కోరిన కేంద్రం

NEET Row : నెట్ పేపర్ లీక్ వ్యవహారం దేశ వ్యాప్తంగా సంచలనంగా మారింది. ఎన్‌టీఏ లో భారీ మార్పులకు కేంద్ర ప్రభుత్వం సిద్ధమైంది. సంస్కరణల కోసం విద్యార్థులు, తల్లిదండ్రుల నుండి సూచనలను కోరింది.

నీట్ ఎలా నిర్వహించాలో సలహాలు ఇవ్వండి, విద్యార్థుల తల్లిదండ్రులను కోరిన కేంద్రం

NEET 2024 :  నీట్, యూజీసీ నెట్ పేపర్ లీక్ వ్యవహారంపై దేశ వ్యాప్తంగా వివాదం కొనసాగుతున్న సంగతి తెలిసిందే. ఈ నేపథ్యంలో పరీక్ష నిర్వహణ సంస్థ నేషనల్ టెస్టింగ్ ఏజెన్సీ (ఎన్‌టీఏ)లో భారీ మార్పులకు కేంద్ర ప్రభుత్వం సిద్ధమైంది. ప్రభుత్వం నియమించిన కమిటీ ఎన్టీఏ సంస్కరణల కోసం విద్యార్థులు, తల్లిదండ్రుల నుండి సూచనలను కోరింది. ఎన్టీఏ నిర్వహించే పరీక్షల్లో పారదర్శకత తీసుకురావడానికి ప్రభుత్వం ఇటీవల ఈ ఉన్నత స్థాయి కమిటీని ఏర్పాటు చేసింది. ఎన్‌టీఏ నిర్వహించే పరీక్షలను పారదర్శకంగా, అక్రమాలకు తావు లేకుండా నిర్వహించేందుకు సూచనలు చేయడం ఈ కమిటీ లక్ష్యం.

ప్రత్యేక కమిటీ

నీట్, యూజీసీ నెట్ పేపర్ లీక్ వివాదం కారణంగా ఎన్టీఏ పనితీరుపై అనుమానాలున్నాయి.  ఎన్టీఏను రద్దు చేయాలనే డిమాండ్ ఉంది. ఇస్రో మాజీ చైర్మన్ డాక్టర్ కె. రాధాకృష్ణన్ నేతృత్వంలోని కమిటీ innovateindia.mygov.in/examination-reforms-nta వెబ్‌సైట్ ద్వారా ప్రజల నుండి సూచనలు, అభిప్రాయాలను స్వీకరిస్తుంది. జూలై 7 వరకు ఎవరైనా తమ అభిప్రాయాన్ని తెలియజేయవచ్చు.  పరీక్షా ప్రక్రియను మెరుగుపరచడం, డేటా సెక్యూరిటీ ప్రోటోకాల్‌లను మెరుగుపరచడం, నేషనల్ టెస్టింగ్ ఏజెన్సీ (NTA) నిర్మాణం, పనితీరును మెరుగుపరచడం కోసం ప్యానెల్ సిఫార్సులు చేస్తుంది. రెండు నెలల్లో కమిటీ తన నివేదికను సమర్పించనుంది. కొత్త సెషన్‌లో సూచనలను అమలు చేయాలని భావిస్తున్నారు. ఈ కమిటీ పరీక్షల క్యాలెండర్‌ను కూడా సమీక్షించి సూచనలు ఇస్తుంది.

పార్లమెంట్ లో రగడ
మెడికల్ ప్రవేశ పరీక్ష 'నీట్-యుజి'లో అవకతవకలు జరిగాయన్న ఆరోపణలపై చర్చ జరపాలని డిమాండ్ చేస్తూ శుక్రవారం విపక్ష సభ్యులు లోక్‌సభలో గందరగోళం సృష్టించారు. దీని కారణంగా సభ తర్వాత రోజుకి వాయిదా పడింది. రాష్ట్రపతి ప్రసంగంపై ధన్యవాద తీర్మానంపై చర్చించే ముందు నీట్ అంశంపై సభలో చర్చించాలని సభలో ప్రతిపక్ష నేత రాహుల్ గాంధీ పట్టుబట్టారు. అయితే రాష్ట్రపతి ప్రసంగం తర్వాత ధన్యవాద తీర్మానాన్ని తీసుకురావాలని పార్లమెంటరీ వ్యవహారాల మంత్రి కిరెన్ రిజిజు అన్నారు. రాష్ట్రపతి ప్రసంగానికి ధన్యవాద తీర్మానంపై చర్చ సందర్భంగా వాయిదా తీర్మానానికి నోటీసు ఇవ్వరాదని ఇప్పటికే నిర్ణయించినట్లు లోక్‌సభ స్పీకర్ ఓం బిర్లా తెలిపారు. సభను అనుమతించాలని విపక్ష సభ్యులకు విజ్ఞప్తి చేసిన ఆయన, ప్రసంగంపై చర్చ సందర్భంగా నీట్‌తో పాటు ఇతర అన్ని అంశాలను లేవనెత్తవచ్చని చెప్పారు. ఒక సారి వాయిదా అనంతరం మధ్యాహ్నం 12 గంటలకు సభ ప్రారంభమైనప్పుడు, తృణమూల్ కాంగ్రెస్ ఎంపీ నూరుల్ ఇస్లాం  ప్రమాణ స్వీకారం చేశారు. అనారోగ్య కారణాల వల్ల ముందుగా ప్రమాణ స్వీకారం చేయలేకపోయారు. దీని తర్వాత, 'నేషనల్ ఎలిజిబిలిటీ కమ్ ఎంట్రన్స్ టెస్ట్-గ్రాడ్యుయేట్' (నీట్-యుజి)లో అవకతవకలు జరిగాయని ఆరోపించిన అంశంపై చర్చించాలని ప్రతిపక్ష సభ్యులు డిమాండ్ చేశారు.