Popular Front Of India: 'పీఎఫ్ఐ'పై బ్యాన్‌ను సవాల్ చేస్తూ పిటిషన్- తిరస్కరించిన కర్ణాటక హైకోర్టు

Popular Front Of India: పాపులర్ ఫ్రంట్ ఆఫ్ ఇండియాపై ఐదేళ్లు బ్యాన్ విధించడాన్ని సవాల్ చేస్తూ దాఖలైన పిటిషన్‌ను కర్ణాటక హైకోర్టు కొట్టివేసింది.

కర్ణాటక హైకోర్టు

Popular Front Of India: పాపులర్ ఫ్రంట్ ఆఫ్ ఇండియా (పీఎఫ్‌ఐ) సహా దాని అనుబంధ సంస్థలపై కేంద్ర హోం మంత్రిత్వ శాఖ ఐదేళ్ల పాటు బ్యాన్ విధిస్తున్నట్లు ఇటీవల ప్రకటించింది. ఈ నిర్ణయాన్ని సవాల్ చేస్తూ పీఎఫ్‌ఐపై బ్యాన్‌ను ఎత్తివేయాలని దాఖలైన పిటిషన్‌ను కర్ణాటక హైకోర్టు కొట్టివేసింది.  పీఎఫ్‌ఐ కార్యకర్త నసీర్ పాషా ఈ పిటిషన్ దాఖలు చేశారు.

" UAP చట్టంలోని సెక్షన్ 3 (1) కింద తన అధికారాన్ని వినియోగించి భారత ప్రభుత్వం (28-09-2022 తేదీ)న ఈ నోటిఫికేషన్‌ను ఆమోదించింది, ఈ నోటిఫికేషన్ UAPA ట్రిబ్యునల్ నిర్ధరణకు లోబడి ఉంటుంది, కనుక దీన్ని కోర్టు ముందు ప్రశ్నించడానికి వీలు లేదు.                                                "

- కర్ణాటక హైకోర్టు

ఈ మేరకు జస్టిస్ ఎం నాగ ప్రసన్న నేతృత్వంలోని సింగిల్ జడ్జి ధర్మాసనం ఈ పిటిషన్‌ను తిరస్కరించింది. అంతకుముందు పిటిషనర్ తరపున సీనియర్ న్యాయవాది జయకుమార్ ఎస్ పాటిల్ వాదిస్తూ కేంద్ర ప్రభుత్వం విధించిన ఈ బ్యాన్‌ను ప్రశ్నించారు.

" చట్ట వ్యతిరేక కార్యకలాపాల నివారణ చట్టం,1967లోని సెక్షన్ 3లోని సబ్ సెక్షన్ 3లోని నిబంధన ప్రకారం నిషేధాన్ని తక్షణమే అమలు చేయడానికి దానిని సమర్థించే కారణాలను చూపించాలి. కానీ అలాంటివి ఏమీ చూపించలేదు.                         "

-    పిటిషనర్ తరఫు న్యాయవాది 

కేంద్ర ప్రభుత్వం 

కేంద్ర ప్రభుత్వం తరఫున సొలిసిటర్ జనరల్ తుషార్ మెహతా వాదనలు వినిపించారు. పీఎఫ్ఐ దేశ విద్రోహ చర్యలకు పాల్పడుతుందని, ఉగ్రవాద సంస్థలతో సంబంధాలున్నాయని, అనేక దుశ్చర్యలకు ఆ సంస్థలు పాల్పడ్డాయని ఆయన అన్నారు. దేశ ప్రజలను భయభ్రాంతులకు గురి చేస్తున్నారని కోర్టుకు తెలిపారు. ఇరువురి వాదనలు విన్న కోర్టు పిటిషన్‌ను తిరస్కరిస్తూ తన తీర్పును వెలువరించింది.

పాపులర్ ఫ్రంట్ ఆఫ్ ఇండియాకు స్టూడెంట్ ఇస్లామిక్ మూవ్మెంట్ ఆఫ్ ఇండియా(సిమి), జమాత్ - ఉల్ - ముజాహిద్దీన్ బంగ్లాదేశ్ (జేఎంబీ), ఇతర ఉగ్రవాద సంస్థలతో సంబంధాలు ఉన్నాయని తెలియడంతో, ఇవన్నీ నిషేధిత సంస్థలని, పీఎఫ్ఐ స్థాపించిన వారిలో సిమి సభ్యులు ఉన్నారని కేంద్ర హోం శాఖ నిషేధాన్ని విధించింది.