CWC Meeting: పార్టీ మీకు చాలా ఇచ్చింది- ఇది తిరిగి ఇవ్వాల్సిన టైమ్: సోనియా సందేశం

CWC Meeting: కాంగ్రెస్ నేతలకు పార్టీ అధినేత్రి సోనియా గాంధీ కీలక సందేశం ఇచ్చారు. పార్టీకి రుణం తీర్చుకోవాల్సిన సమయం వచ్చిందన్నారు.

పార్టీ మీకు చాలా ఇచ్చింది- ఇది తిరిగి ఇవ్వాల్సిన టైమ్: సోనియా సందేశం

CWC Meeting: 

పార్టీ వేదికలపై ఆత్మవిమర్శ జరగాల్సిన అవసరం ఉందని పార్టీ నేతలకు కాంగ్రెస్ అధినేత్రి సోనియా గాంధీ సూచించారు. ఆత్మవిమర్శ అనేది ఆత్మవిశ్వాసం, నైతికత దెబ్బతిసేలా ఉండకూడదన్నారు. సోమవారం జరిగిన కాంగ్రెస్ వర్కింగ్ కమిటీ (సీడబ్ల్యూసీ) సమావేశంలో ఆమె ఈ వ్యాఖ్యలు చేశారు.

कांग्रेस अध्यक्षा श्रीमती सोनिया गांधी जी की अध्यक्षता में कांग्रेस कार्यसमिति की बैठक। pic.twitter.com/htvVNjftGF

— Congress (@INCIndia) May 9, 2022

" కాంగ్రెస్‌ పార్టీ వల్ల ప్రతీ ఒక్కరికీ మేలు జరిగింది. ఇప్పుడు పార్టీకి ఆ రుణాన్ని పూర్తి స్థాయిలో చెల్లించుకునే అవకాశం, సమయం వచ్చింది. ప్రతి ఒక్కరూ తాము చేస్తున్న పనుల గురించి, పార్టీ గురించి ఆత్మపరిశీలన చేసుకోవాలి. పార్టీ కోసం ప్రతీ ఒక్కరూ కష్టపడాలి. అయితే ఆత్మవిమర్శ అనేది మన ఆత్మవిశ్వాసం, నైతికతను దెబ్బతీశేలా ఉండకూడదు. నిరాశాజనక వాతావరణాన్ని సృష్టించేలా ఉండకూడదు.                                             "

-  సోనియా గాంధీ, కాంగ్రెస్ అధినేత్రి

మేథోమధనం

రాజస్థాన్‌లోని ఉదయ్‌పూర్‌లో మే 13 - 15 మధ్య కాంగ్రెస్ పార్టీ మేథోమధన సదస్సు జరగనుంది. ఈ సమావేశంలో 400 మంది కాంగ్రెస్ ప్రతినిధులు పాల్గొంటారు. భాగస్వాముల్లో అత్యధికులు పార్టీలో ఒకటి లేదా అంతకంటే ఎక్కువ పదవులు నిర్వహిస్తున్న లేదా గతంలో నిర్వహించినవారు ఉంటారు. అంతేకాకుండా గతంలో కేంద్ర ప్రభుత్వంలో భాగస్వాములుగా ఉన్నవారు కూడా సమావేశానికి వస్తారు. 

కసరత్తు

ఈ సదస్సు విధివిధానాలు, అజెండాపై సోమవారం దిల్లీలోని ఏఐసీసీ ప్రధాన కార్యాలయంలో జరిగిన సీడబ్ల్యూసీ భేటీలో చర్చించారు. ఈ సమావేశంలో పార్టీ అధ్యక్షురాలు సోనియా గాంధీ, అగ్రనేతలు రాహుల్ గాంధీతోపాటు సీడబ్ల్యూసీ నేతలు పాల్గొన్నారు. ఈ సమావేశంలో పార్టీ నేతలను ఉద్దేశించి సోనియా గాంధీ ఈ వ్యాఖ్యలు చేశారు. 

పార్టీని మళ్లీ గెలుపు బాట పట్టించేలా నేతలు, కార్యకర్తలు సమన్వయంతో పనిచేయాలని సోనియా గాంధీ అన్నారు. పార్టీ నుంచి లబ్ధి పొందిన ప్రతి ఒక్క నాయకుడు తిరిగి రుణం తీర్చుకోవాలని సోనియా పిలుపునిచ్చారు.