CJI: సీజేఐకు 600 మంది లాయర్ల లేఖ - కారణం ఏంటంటే.?

National News: కొందరు స్వార్థమూకలు న్యాయ వ్యవస్థను ప్రభావితం చేసేందుకు యత్నిస్తున్నారని న్యాయవాదులు ఆందోళన వ్యక్తం చేశారు. ఈ క్రమంలో దాదాపు 600 మంది లాయర్స్.. సీజేఐకు లేఖ రాశారు.

సీజేఐకు లాయర్ల లేఖ (Image Source: PTI)

Lawyers Worte A Letter To Cji: దేశంలో న్యాయ వ్యవస్థ సమగ్రతను దెబ్బతీసే ప్రయత్నాలు జరుగుతున్నాయని పలువురు సీనియర్ న్యాయవాదులు ఆందోళన వ్యక్తం చేశారు. ఈ మేరకు భారత ప్రధాన న్యాయమూర్తి (Cji) జస్టిస్ డీవై చంద్రచూడ్ కు లేఖ రాశారు. ప్రముఖ సీనియర్ న్యాయవాది హరీష్ సాల్వే, బార్ కౌన్సిల్ ఆఫ్ ఇండియా ఛైర్మన్ మనన్ కుమార్ మిశ్రా, సీనియర్ న్యాయవాది పింకీ ఆనంద్ సహా మరో 600 మంది న్యాయవాదులు పలు అంశాలను లేఖలో ప్రస్తావించారు. ముఖ్యంగా.. కొన్ని స్వార్థమూకలు రాజకీయ నేతలకు సంబంధించిన కేసుల్లో కోర్టు తీర్పులను ప్రభావితం చేసేందుకు ఒత్తిడి వ్యూహాలను అమలు చేస్తున్నాయని ఆరోపించారు. 

లేఖలో ఏం చెప్పారంటే.?

'పొలిటికల్‌ అజెండాతో స్వార్థ ప్రయోజనాలను ఆశించే కొన్ని గ్రూపులు న్యాయ వ్యవస్థపై ఒత్తిడి తీసుకొచ్చేందుకు యత్నిస్తున్నాయి. న్యాయ పరమైన ప్రక్రియలను ప్రభావితం చేసి, న్యాయస్థానం ప్రతిష్ఠను దెబ్బతీయాలని చూస్తున్నాయి. ఇందు కోసం వారు అనేక మార్గాలను అనుసరిస్తున్నారు. కోర్టులపై ప్రజల్లో విశ్వాసాన్ని తగ్గించేందుకు న్యాయస్థానాల కీలక తీర్పులపై తప్పుడు కథనాలు సృష్టిస్తున్నారు. ఈ మధ్య కొందరు న్యాయవాదులు పగలు రాజకీయ నాయకులను సమర్థించడం, రాత్రి మీడియాతో న్యాయమూర్తులను ప్రభావితం చేయడం వంటి అంశాలు బాధాకరం' అంటూ న్యాయవాదులు లేఖలో పేర్కొన్నారు.

'ఒత్తిడి చేస్తున్నారు'

రాజకీయ నాయకులు కొందరిపై అవినీతి ఆరోపణలు చేయడం.. ఆ తర్వాత వారినే కోర్టుల్లో సమర్థించడం వింతగా ఉందని న్యాయవాదులు పేర్కొన్నారు. కోర్టు నిర్ణయాలు తమకు అనుకూలంగా రాకపోతే వెంటనే బహిరంగ విమర్శలకు దిగుతున్నారని అన్నారు. 'సోషల్‌ మీడియాలో అవాస్తవాలను ప్రచారం చేస్తూ న్యాయమూర్తులపై ఒత్తిడి తీసుకొచ్చే ప్రయత్నాలు చేస్తున్నారు. వ్యక్తిగత, రాజకీయ కారణాలతో కోర్టు ప్రతిష్ఠను దెబ్బతీసే ఇలాంటి ప్రయత్నాలను ఎట్టి పరిస్థితుల్లోనూ అనుమతించకూడదు. ఇలాంటి వాటిపై మౌనంగా ఉంటే.. హాని చేయాలనుకునే వారికి మరింత బలం ఇచ్చినట్లే. న్యాయస్థానాల కోసం నిలబడాల్సిన సమయం ఆసన్నమైంది. దీనిపై కఠిన చర్యలు తీసుకోవాలని సర్వోన్నత న్యాయస్థానాన్ని కోరుతున్నాం'' అని న్యాయవాదులు తమ లేఖలో విజ్ఞప్తి చేశారు. అయితే, ఈ లేఖను ఈ నెల 26న రాసినట్లు సమాచారం.