స్విగ్గీ జొమాటోల్లో ఆర్డర్లు ఆపండి, అమ్మ చేతి వంటని పిల్లలకు రుచి చూపించండి - కేరళ హైకోర్టు

Kerala High Court: ఆన్‌లైన్‌లో ఫుడ్ ఆర్డర్లు ఆపి పిల్లలకు అమ్మ చేతి వంట రుచి చూపించాలని కేరళ హైకోర్టు వ్యాఖ్యానించింది.

ఆన్‌లైన్‌లో ఫుడ్ ఆర్డర్లు ఆపి పిల్లలకు అమ్మ చేతి వంట రుచి చూపించాలని కేరళ హైకోర్టు వ్యాఖ్యానించింది.

Kerala High Court: 

కేరళ హైకోర్టు ఆసక్తికర వ్యాఖ్యలు..

ఓ కేసు విచారణలో కేరళ హైకోర్టు ఆసక్తికర వ్యాఖ్యలు చేసింది. పిల్లలకు అమ్మ చేతి వంటే తినిపించాలని, ఆన్‌లైన్‌లో ఆర్డర్‌లు చేసుకునే అలవాటు మానుకోవాలని సూచించింది. పోర్నోగ్రఫీకి సంబంధించిన కేసు విచారణలో ఈ సూచనలు చేసింది. తల్లిదండ్రులు స్విగ్గీ, జొమాటోలో ఆర్డర్లు పెట్టడం ఆపేసి పిల్లలకు తమ చేతి వంట రుచి చూపించాలని చెప్పింది. రోడ్డు పక్కనే ఓ వ్యక్తి అసభ్యకర వీడియోలు చూస్తుండగా పోలీసులు అతడిని గమనించి అదుపులోకి తీసుకున్నారు. దీనిపై విచారణ జరిపిన కోర్టు అలాంటి వీడియోలు ప్రైవేట్‌గా చూస్తే తప్పేం కాదని తేల్చి చెప్పింది. ఇదే క్రమంలో పిల్లలకు మొబైల్ ఫోన్స్ అలవాటు కాకుండా తల్లిదండ్రులు జాగ్రత్తలు తీసుకోవాలని సూచించింది. వాళ్లు బయట ఆడుకునేలా చూడాలని, అమ్మ చేతి కమ్మనైన వంట రుచి చూసేలా అలవాటు చేయాలని తెలిపింది. జస్టిస్ పీవీ కున్హికృష్ణన్ ఈ వ్యాఖ్యలు చేశారు. 

"స్విగ్గీ, జొమాటోలో ఆర్డర్లు పెట్టుకుని ఆ రెస్టారెంట్ ఫుడ్‌ కొనుక్కోవడం మానేయండి. చక్కగా పిల్లలు అమ్మచేతి వంటను ఆస్వాదించే అవకాశం ఇవ్వండి. వాళ్లకు నచ్చినవి చేసి పెట్టండి. వాళ్లు ఇంట్లోనే కూర్చోకుండా  బయటకు వెళ్లి ఆడుకునేలా ప్రోత్సహించండి. అలా ఆడుకుని అలిసిపోయి ఇంటికి రాగానే అమ్మ చేతి వంట కమ్మనైన పరిమళాన్ని వాళ్లను ఆస్వాదించనివ్వండి. పిల్లలకు మొబైల్ ఫోన్స్ ఇచ్చే విషయంలోనూ జాగ్రత్తలు పాటించండి. మైనర్‌లకు ఫోన్‌లు దూరంగా ఉంచండి"

- జస్టిస్ పీవీ కున్హి కృష్ణన్, కేరళ హైకోర్టు 

ఫోర్న్‌ వీడియోలు, ఫొటోలు చూడటం అసభ్యకరం.. అదో నేరం. అందరూ ఇదే అభిప్రాయపడుతున్నారు. కానీ కేరళ కోర్టు మాత్రం ఇలాంటి కేసులో కీలక తీర్పు ఇచ్చింది. అశ్లీల ఫోటోలు, వీడియోలను ఇతరులకు చూపించకుండా... ఒంటరిగా చూడటం చట్టం ప్రకారం నేరం కాదని పేర్కొంది. అది ప్రతి వ్యక్తి వ్యక్తిగత ఎంపిక అని చెప్పింది కేరళ  హైకోర్టు. అది నేరం అని చెప్పడం సరికాదని... ఒక వ్యక్తి గోప్యతలోకి చొరబడి.. అతని వ్యక్తిగత ప్రాధాన్యతల్లో జోక్యం చేసుకోవడమే అని చెప్పింది ధర్మాసనం. 33ఏళ్ల తరుణ్‌పై  నమోదైన కేసును రద్దు చేసింది కేరళ హైకోర్టు. అశ్లీల వీడియోలు, ఫొటోలను బహిరంగంగా ప్రదర్శించడం, సర్క్యులేట్‌ చేయడం, పంపించడం నేరమని తెలిపింది. ఫోర్న్‌ వీడియోలు, ఫొటోలను ఒంటరిగా చూడటం తప్పుకాదని... ఏ కోర్టు దానిని నేరంగా పరిగణించదని తెలిపింది కోర్టు. నిందితుడు ఈ వీడియోను బహిరంగంగా ఎవరికీ  చూపించినట్లు ఎలాంటి ఆరోపణ లేవని ధర్మాసనం పేర్కొంది. ఒక వ్యక్తి తన వ్యక్తిగత సమయంలో అశ్లీల ఫోటోలు, వీడియోలను చూడటం IPC సెక్షన్ 292 ప్రకారం నేరం  కాదని.. తెలిపింది. ఏదైనా అసభ్యకరమైన వీడియో కానీ ఫొటో కానీ బహిరంగంగా ప్రదర్శించడం.. షేర్‌ చేయడం వంటివి చేస్తేనే సెక్షన్ 292 ప్రకారం నేరం అవుతుందని  తెలిపింది కేరళ హైకోర్టు.