Covid-19 Vaccine: భారత్ బయోటెక్ నాసల్ టీకాకు DCGI గ్రీన్ సిగ్నల్

Bharat Biotech Nasal Vaccine: భారత్ బయోటెక్ తయారు చేసిన నాసల్ వ్యాక్సిన్‌ అత్యవసర వినియోగానికి డీసీజీఐ గ్రీన్ సిగ్నల్ ఇచ్చింది.

భారత్ బయోటెక్ నాసల్ టీకాకు DCGI గ్రీన్ సిగ్నల్

Bharat Biotech Nasal Vaccine: భారత్‌ బయోటెక్‌ అభివృద్ధి చేసిన చుక్కల మందు కొవిడ్​ టీకా (బీబీవి154/నాసల్‌ వ్యాక్సిన్‌) అత్యవసర వినియోగానికి డీసీజీఐ అనుమతులు ఇచ్చింది. ఈ మేరకు కేంద్ర ఆరోగ్య శాఖ మంత్రి మన్‌సుఖ్​ మాండవీయ తెలిపారు.

" కరోనాపై యుద్ధంలో భారత్ మరో ముందడుగు వేసింది. భారత్ బయోటెక్ అభివృద్ధి చేసిన చుక్కల మందు కొవిడ్​ టీకా (బీబీవి154/నాసల్‌ వ్యాక్సిన్‌) అత్యవసర వినియోగానికి డీసీజీఐ అనుమతులు ఇచ్చింది. 18 ఏళ్లు నిండిన వారికి అత్యవసర పరిస్థితుల్లో ఈ టీకా ఇవ్వొచ్చు.                                           "

-మన్‌సుఖ్ మాండవీయ, కేంద్ర ఆరోగ్య మంత్రి

Big Boost to India's Fight Against COVID-19!

Bharat Biotech's ChAd36-SARS-CoV-S COVID-19 (Chimpanzee Adenovirus Vectored) recombinant nasal vaccine approved by @CDSCO_INDIA_INF for primary immunization against COVID-19 in 18+ age group for restricted use in emergency situation.

— Dr Mansukh Mandaviya (@mansukhmandviya) September 6, 2022

ఇక భయం వద్దు

కరోనా వ్యాక్సిన్ తీసుకోడానికి భయపడే వారికి ముక్కు ద్వారా వేసుకొనే ఈ టీకా ఉపశమనం కలిగించనుంది. దేశీయ వ్యాక్సిన్ ఉత్పత్తిదారు భారత్ బయోటెక్ ముక్కుద్వారా వేసే ఈ కరోనా వ్యాక్సిన్‌‌ను అభివృద్ధి చేసింది. హైదరాబాద్‌లో గల భారత్ బయోటెక్ రూపొందించిన 'కొవాగ్జిన్' కరోనా టీకాను ఇప్పటికే చాలామంది తీసుకున్నారు. ప్రస్తుతం ఈ టీకాను సిరంజీ ద్వారా అందిస్తున్నారు. 

ఒక్కసారి చాలు

భారత్ బయోటెక్ తయారు చేసిన ఈ నాసల్ స్ప్రే వ్యాక్సిన్‌ను ఒక్కసారి తీసుకుంటే చాలని నిపుణులు అంటున్నారు. ఈ నాసల్ స్ప్రే వ్యాక్సిన్‌‌ను 'BBV154'గా పేర్కొంటున్నారు. ప్రస్తుతం సిరంజీ ద్వారా ఇచ్చే వ్యాక్సిన్ కంటే మెరుగ్గా ఈ నాసల్ స్ప్రే పనిచేస్తుందని పరిశోధకులు అంటున్నారు. ఈ వ్యాక్సిన్ తయారీ కోసం ఇప్పటికే సెయింట్‌ లూయిస్‌లోని వాషింగ్టన్‌ యూనివర్సిటీ స్కూల్‌ ఆఫ్‌ మెడిసిన్‌తో భారత్ బయోటెక్ ఒప్పందం కుదుర్చుకుంది.

ఇలా వేసుకోవాలి

ఈ వ్యాక్సిన్‌ను పోలియో చుక్కల తరహాలోనే ముక్కు పుటల్లో వేసుకోవచ్చని పరిశోధకులు తెలిపారు. పైగా దీనివల్ల ఎలాంటి సైడ్ ఎఫెక్టులు లేకుండానే శరీరంలోని రోగ నిరోధక శక్తి పెరుగుతుందట. ముక్కు ద్వారా వేసే ఈ వ్యాక్సిన్‌తో కరోనాను 99.9 శాతం చంపేయవచ్చని ఓ పరిశోధనలో తేలింది. ఈ వ్యాక్సిన్‌ను కేవలం ఇండియాలోనే కాకుండా అమెరికా, కెనడా యూకేల్లో కూడా అందుబాటులోకి తెచ్చేందుకు ప్రయత్నాలు సాగుతున్నాయి.