Online Medical Information : ఆన్లైన్లో మెడిసన్స్, రోగాల గురించి తెలుసుకుంటున్నారా? అలసట కూడా క్యాన్సర్ అనేస్తాది జాగ్రత్త
Hidden Dangers of Online Medical Advice : ఆరోగ్యపరంగా ఏదైనా సమస్య వస్తే దాని లక్షణాలను చాలామంది ఇంటర్నెట్లో వెతికేస్తారు. ఇలా చేయడం వల్ల లాభమా? నష్టమా? నిపుణుల సలహా ఏంటో చూసేద్దాం.
- ఇంటర్నెట్ ద్వారా ఆరోగ్య సమాచారం సులభంగా అందుబాటులోకి వచ్చింది.
- ఆన్లైన్ సమాచారం ఆధారంగా స్వీయ నిర్ధారణ, చికిత్స ప్రమాదకరం.
- ధృవీకరించని చికిత్సలు, తప్పుడు సమాచారం వైద్య సహాయాన్ని ఆలస్యం చేయవచ్చు.
- వ్యక్తిగత వైద్యానికి నిపుణుల సలహా తప్పనిసరి, ఆన్లైన్ విద్యా సాధనంగా వాడండి.
Online Medical Information Benefits and Risks : ఇంటర్నెట్ అందుబాటులోకి వచ్చిన తర్వాత ఆరోగ్యానికి సంబంధించిన సమాచారాన్ని తెలుసుకోవడం చాలా సులభమైపోయింది. మీరు దేని గురించి అయినా తెలుసుకోవాలనుకున్నా లేదా మీకున్న లక్షణాలు ఏంటో ఆన్లైన్లో ఈజీగా తెలుసుకోగలిగే రోజులు వచ్చేశాయి. దీంతో కొన్ని సెకన్లలోనే లక్షణాలు, వ్యాధులు, చికిత్సలు, నివారణ చర్యల గురించి సమాచారం పొందే అవకాశం అందుబాటులోకి వచ్చేసింది. దీంతో ఆరోగ్యపరంగా అవగాహన పెరగడమే కాకుండా.. తమ ఆరోగ్యంపై మరింత శ్రద్ధ పెడుతున్నారు.
అయితే వైద్యుల ప్రకారం ఆన్లైన్లో లభించే వైద్య సమాచారాన్ని.. సరైన వైద్య సలహా లేకుండా అర్థం చేసుకోవడం కొన్నిసార్లు ప్రయోజనాల కంటే ప్రమాదాలనే ఎక్కువగా కలిగించవచ్చు. యశోద హాస్పిటల్స్లో ఆంకాలజీ సర్వీసెస్ డైరెక్టర్, కన్సల్టెంట్ మెడికల్ ఆంకాలజిస్ట్ & హీమాటో ఆంకాలజిస్ట్గా చేస్తోన్న డాక్టర్ జి వంశీ కృష్ణా రెడ్డి మెడిసన్, ట్రీట్మెంట్ గురించిన సమాచారం కోసం ఇంటర్నెట్లో తెలుసుకోవడం, అలాగే ఎంతవరకు వినియోగించడం ప్రమాదమో అనే విషయంపై పలు అంశాలు తెలిపారు.
ఇలా తెలుసుకోవడం మంచిదే..
ప్రస్తుతం గూగుల్లో ఎక్కువమంది వెతికే ఆరోగ్య అంశాల్లో క్యాన్సర్ ఒకటి. లక్షణాలు కనిపించినప్పుడు లేదా క్యాన్సర్ నిర్ధారణ అయిన తర్వాత చాలా మంది రోగులు, వారి కుటుంబ సభ్యులు ముందుగా ఇంటర్నెట్లో దాని గురించి వెతికేస్తున్నారు. అయితే విశ్వసనీయమైన వెబ్సైట్లు, వైద్య సంస్థల సమాచారం ద్వారా క్యాన్సర్ స్క్రీనింగ్, ప్రారంభ హెచ్చరిక సంకేతాలు, అందుబాటులో ఉన్న చికిత్సా విధానాల గురించి అవగాహన తెలుసుకోవచ్చు. అలాగే వైద్యులను అడగాల్సిన ప్రశ్నలను కూడా సిద్ధం చేసుకోవచ్చు. ఈ తరహా అవగాహన మంచిదనే చెప్తున్నారు.
ఈ సమాచారంతో జాగ్రత్త
కానీ.. ఆన్లైన్ సమాచారాన్ని చూసి స్వయంగా వ్యాధిని నిర్ధారించుకోవడం ప్రమాదమని డాక్టర్ జి వంశీ కృష్ణా రెడ్డి చెప్తున్నారు. ఉదాహరణకు బరువు తగ్గడం, ఎక్కువ అలసట, కడుపు ఉబ్బరం, దీర్ఘకాలిక దగ్గు లేదా మలవిసర్జన అలవాట్లలో మార్పులు వంటి లక్షణాలకు అనేక కారణాలు ఉండవచ్చు. కానీ ఇంటర్నెట్లో వెతికినప్పుడు అవి క్యాన్సర్ వంటి తీవ్రమైన వ్యాధుల లక్షణాలుగా చూపిస్తాయి.
ఇలా చూసినప్పుడు బాధితుడిలో అవసరానికి మించి భయం పెరిగిపోతుంది. మరోవైపు కొన్ని వెబ్సైట్లు ఈ లక్షణాలను సాధారణ సమస్యలుగా చూపించి మీకు భరోసా ఇవ్వవచ్చు. ఈ రెండు పరిస్థితులు మంచివి కాదని చెప్తున్నారు. ఇవి సరైన సమయంలో మెడికల్ టెస్ట్లు చేయించుకోవడాన్ని ఆలస్యం చేస్తాయి. ఎందుకంటే వైద్య రంగంలో తప్పుడు సమాచారం ప్రస్తుతం పెద్ద సవాలుగా మారింది.
సోషల్ మీడియాలో వైరల్ అయితే నిజమేనా?
సోషల్ మీడియా, ఇతర ధృవీకరించని వెబ్సైట్లలో శాస్త్రీయ ఆధారాలు లేని చికిత్సలు, అద్భుత ఫలితాలు ఇస్తాయని చెప్పే మందులు, కఠినమైన డైట్లు, సప్లిమెంట్లు, ప్రత్యామ్నాయ వైద్య పద్ధతులు తెగ ప్రచారం అవుతున్నాయి. క్యాన్సర్ చికిత్స విషయంలో ఇలాంటి తప్పుడు సమాచారం మరింత ప్రమాదకరమని హెచ్చరిస్తున్నారు నిపుణులు. ఎందుకంటే కొంతమంది రోగులు.. వైద్యులు సూచించిన చికిత్సలను వాయిదా వేయడం లేదా పూర్తిగా మానేస్తున్నారట. దీనివల్ల ఆరోగ్యం దెబ్బతినే ప్రమాదం పెరుగుతుంది.
ఇంటర్నెట్లో లభించే సమాచారం సాధారణ స్వభావం కలిగి ఉంటుంది. ఏ వెబ్సైట్ లేదా సెర్చ్ ఇంజిన్ లేదా AI సాధనం కూడా ఒక వ్యక్తి పూర్తి వైద్య చరిత్ర, శారీరక పరీక్ష ఫలితాలు, ల్యాబ్ రిపోర్టులు, జన్యుపరమైన అంశాలు, ఇతర ఆరోగ్య పరిస్థితులను పరిగణనలోకి తీసుకోలేవు. ఎందుకంటే ఒకే లక్షణం వేర్వేరు వ్యక్తుల్లో వేర్వేరు కారణాల వల్ల రావచ్చు. అందుకే ప్రతి రోగికి చికిత్స కూడా భిన్నంగా ఉంటుంది.
అందుకే ఆన్లైన్లోని వైద్య సమాచారాన్ని ఉపయోగించుకోవడానికి ఉత్తమ మార్గం దానిని ఒక విద్యా సాధనంగా మాత్రమే చూడాలని నిపుణులు చెప్తున్నారు. దానిని ఆధారంగా చేసుకుని స్వయంగా వ్యాధిని నిర్ధారించుకోవడం లేదా చికిత్స ప్రారంభించడం సరైన పద్ధతి కాదని హెచ్చరిస్తున్నారు. విశ్వసనీయ వైద్య సంస్థలు, ప్రభుత్వ ఆరోగ్య సంస్థలు, అర్హత కలిగిన వైద్యుల ద్వారా మాత్రమే ఆరోగ్య సంబంధిత నిర్ణయాలు తీసుకోవాలి. లేదంటే ఇబ్బందులు పడాల్సి వస్తుంది.
మరిన్ని ఇంట్రెస్టింగ్ హెల్త్ ఆర్టికల్స్, ఇంటి చిట్కాల కోసం దీనిని క్లిక్ చేయండి.
టాప్ హెడ్ లైన్స్
ట్రెండింగ్ వార్తలు
