సమంతకు వచ్చిన ఆ వ్యాధి అంత భయంకరమైనదా? ఇది వచ్చాక ఎన్నాళ్లు బతికే అవకాశం ఉంది?

సమంత మయోసైటిస్ వ్యాధితో బాధపడుతున్న సంగతి తెలిసిందే. ఆ వ్యాధి ఎంత భయంకరమైనదో మాత్రం చాలా మందికి తెలియదు.

(Image credit: Instagram)

రక్తాన్ని చిమ్మే గాయం కంటికి కనిపిస్తుంది,  అలాంటి గాయాలే ఎక్కువగా బాధిస్తాయనుకుంటాం కానీ కంటికి కనిపించని మయోసైటిస్‌లాంటి రోగాలు జీవితంపైనే విరక్తి తెప్పిస్తాయి. ఇప్పుడు సమంతను వేధిస్తున్న ఆరోగ్య సమస్య ఇదే. ఈ వ్యాధి బారిన పడినట్టు ప్రకటించాక తొలిసారి సమంత అభిమానుల ముందుకు వచ్చింది. తన బాధను కన్నీళ్లతో వివరించింది.నేను చావలేదు, ఇంకా బతికే ఉన్నాను అంటూ ఎమోషనల్ అయింది. కానీ ఆ వ్యాధి మాత్రం తనను చాలా బాధపెడుతోందని చెప్పింది. సమంత మాటలు విన్నాక మయోసైటిస్ అంత ప్రమాదకరమైనదా అనే సందేహం అందరిలో కలిగింది.  ఈ వ్యాధి గురంచి కొన్ని వివరాలు ఇవిగో...

మయోసైటిస్ వచ్చాక ఎన్నాళ్లు జీవిస్తారు?
సాధారణంగా మయోసైటిస్ అంత త్వరగా తగ్గదు. ఇది వచ్చాక మింగడం, శ్వాస తీసుకోవడం కష్టంగా మారుతుంది. దీని వల్ల నిమోనియా వంటి తీవ్రమైన అనారోగ్యాలు కూడా వచ్చే అవకాశం ఉంది. కానీ అర్థంతరంగా చనిపోవడం వంటివి జరగవు. కాకపోతే ఇతర అనారోగ్యసమస్యలు కూడా వేధిస్తుంటాయి. ఈ సమస్య ఉన్పప్పటికీ 95 శాతం మంది చాలా ఏళ్లు బతికిన సందర్భాలు ఉన్నాయి. కాబట్టి ప్రాణం తీసేంత చరిత్ర ఈ వ్యాధికి లేదు. 

ఏం తినకూడదు?
ఈ వ్యాధి ఉన్నవారు చక్కెర, గోధుమపిండితో చేసిన ఆహారాలు దూరం పెట్టాలి. బ్రెడ్, పాస్తా, నూడుల్స్ వంటివి మానేయాలి. ఫ్యాక్డ్ ఫుడ్‌కు దూరంగా ఉండాలి. అధిక ఫ్రక్జోజ ఉండే ఆహారాలు, కార్న్ సిరప్, జంక్ ఫుడ్ వంటివి తినకూడదు. కేవలం కూరగాయలు, తాజా పండ్లు వంటివే తినాలి. వైద్యుల సూచన మేరకు గుడ్లు, చికెన్, మటన్ వంటివి తినవచ్చు. 

ఒత్తిడి మయోసైటిస్‌కు కారణమవుతుందా?
మయోసైటిస్ అనే వ్యాధి ఆటో ఇమ్యూన్ వ్యాధి. అంటే శరీరంలోని రోగనిరోధక వ్యవస్థ, తన సొంత శరీరంపైనే దాడి చేస్తుంది. అలాంటప్పుడు ఒత్తిడికి గురవుతుంటే శరీరంలోని రోగనిరోధక వ్యవస్థ మరింతగా క్షీణించి మయోసైటిస్ లక్షణాలను పెంచుతుంది. ఒత్తిడి వల్ల ఈ వ్యాధి వస్తుందని చెప్పలేం కానీ, ఈ వ్యాధి వచ్చాక మాత్రం అధిక ఒత్తిడికి గురవ్వకూడదు. 

చికిత్స చేయకపోతే ఏమి జరుగుతుంది?
చికిత్స చేయకుండా వదిలేస్తే మయోసైటిస్‌ ముదిరిపోతుంది. కండరాలు తీవ్రంగా నష్టపోతాయి. కండర కణాలు నశిస్తాయి. కీళ్లు, ఊపిరితిత్తుల వంటి ఇతర అవయవాలతో సంబంధం కలిగి ఉండి వాటిని దెబ్బతీస్తాయి. కండరాలు వాపుతో పాటూ, చర్మంపై దద్దుర్లు, మంట వస్తాయి. పరిస్థితి క్షీణిస్తే కనీసం అడుగు తీసి అడుగు వేయలేరు. చేతులతో ఏ బరువూ ఎత్తలేరు. 

మయోసైటిస్ పూర్తిగా నయం కాదా?
ప్రస్తుతానికి మయోసైటిస్‌కు చికిత్స లేదు. అందుకే పూర్తిగా నయం అవుతుందని చెప్పలేం. కానీ దానివల్ల కలిగే మంట, నొప్పి, కండరాల బలహీనతను తగ్గించే మందులు అందుబాటులో ఉన్నాయి. వైద్యుల సూచన మేరకు మంచి ఆహారాన్ని తింటే శక్తి వంతంగా మారొచ్చు. కానీ ఈ వ్యాధితో జీవితాంతం పోరాడాల్సిందే. చికిత్సలో భాగంగా యాంటీ ఇన్ఫ్లమేటరీ మందులను అందిస్తారు. వ్యాయామం కూడా సూచిస్తారు. 

మయోసైటిస్ అరుదైన వ్యాధా?
మయోసిటిస్ అనేది అరుదైన కండరాల వ్యాధనే చెప్పాలి. అమెరికాలో 50,000 నుంచి 75,000 మంది ఈ వ్యాధితో బాధపడుతున్నట్టు అంచనా. మనదేశంలో కూడా ఎంతో మంది ఈ వ్యాధితో బాధపడుతున్నారు. అరుదైన వ్యాధి అని ఎప్పుడు పిలుస్తారంటే ఆ వ్యాధి బారిన పడిన వారి సంఖ్య రెండు లక్షల కన్నా తక్కువగా ఉన్నప్పుడు.