Herbal Supplements : ‘సహజమైనవి’ అని నమ్మి సప్లిమెంట్లు తీసుకుంటున్నారా? కాలేయం, మూత్రపిండాలకు ప్రమాదమే
Natural Supplements : సహజమైన, మూలికలతో కూడిన సప్లిమెంట్లు సురక్షితం కాకపోవచ్చని.. అవి కాలేయం, మూత్రపిండాలను దెబ్బతీస్తాయని హెచ్చరిస్తున్నారు. వీటిలో నిజమెంతా?
Dietary Supplements Health Risks : సహజమైన సప్లిమెంట్లుగా చెప్పబడే వాటిని వైద్యుల సలహా లేకుంటే తీసుకుంటే కాలేయ-మూత్రపిండాలకు తీవ్రమైన నష్టం జరుగుతుందని చెప్తున్నారు. దీర్ఘకాలిక ఆరోగ్య ప్రమాదాలను ఎదుర్కోవాల్సి వస్తుందని అంటున్నారు. "సహజమైనది" అని లేబుల్ చేసినంత మాత్రానా అది సురక్షితంగా ఉంటుందనుకోవడం కరెక్ట్ కాదని తాజా అధ్యయనం తెలిపింది. ఈ స్టడీలో బయటపడిన విషయాలు ఏంటో.. శాస్త్రవేత్తలు ఏమి సూచిస్తున్నారో చూసేద్దాం.
అధ్యయనంలో షాకింగ్ విషయాలు
సప్లిమెంట్స్ అనేవి ఆరోగ్యాన్ని మెరుగుపరచడానికి లేదా పోషకాహార లోపాలను భర్తీ చేయడానికి చాలామంది తీసుకుంటారు. అయితే ఈ మధ్యకాలంలో సప్లిమెంట్స్ కూడా సహజమైనవి అంటూ మూలికా, ఆహార పదార్ధాలతో తయారు చేసి ప్రమోట్ చేస్తున్నారు. అలా తీసుకునే సప్లిమెంట్స్ కాలేయ, మూత్రపిండాల వ్యాధుల ప్రమాదాలను పెంచుతున్నాయని యునైటెడ్ స్టేట్స్‌లోని నేషనల్ లైబ్రరీ ఆఫ్ మెడిసిన్‌లో ప్రచురితమైన అధ్యయనం తెలిపింది.
మూలికా, ఆహార పదార్ధాలను ఆహార ఉత్పత్తులుగా వర్గీకరిస్తూ ఈ అధ్యయనం హైలైట్ చేశారు. అంటే అవి ఆహారం తీసుకోవడంలో మద్దతు ఇవ్వడానికి ఉద్దేశించినవని తెలిపారు. ఈ తరహా సప్లిమెంట్లు కొన్ని సందర్భాల్లో.. కొన్ని సప్లిమెంట్లు ముఖ్యమైన అవయవాలపై అదనపు ఒత్తిడిని కలిగిస్తాయని ఈ అధ్యయనంలో తేలింది. అలాంటి సహజమైన సప్లిమెంట్లకు ఉదాహరణ ఏంటో చూసేద్దాం.
గ్రీన్ టీ
ఒక కప్పు గ్రీన్ టీ సురక్షితమైనదిగా పరిగణిస్తారు. అయితే హెర్బల్ గ్రీన్ టీలు కథ వేరే అంటున్నారు. క్లినికల్ లివర్ డిసీజ్ జర్నల్ ప్రకారం.. ఈ సప్లిమెంట్లలో అధిక స్థాయిలో కాటెచిన్లు, ముఖ్యంగా ఎపిగాల్లోకాటెచిన్ గాలెట్ (EGCG) ఉంటాయంటున్నారు. అధిక మొత్తంలో EGCG కాలేయ వాపు, తీవ్రమైన కాలేయ సమస్యలతో ముడిపడి ఉందని గుర్తించారు. ఇప్పటికే కాలేయ సంబంధిత సమస్యలు ఉన్న వ్యక్తులలో ఈ ప్రమాదం ఎక్కువగా ఉండవచ్చని చెప్తున్నారు.
ప్రోటీన్ పౌడర్లు
బాడీబిల్డర్లు, ఫిట్‌నెస్ ఔత్సాహికుల వల్ల ప్రోటీన్ సప్లిమెంట్లు బాగా ప్రసిద్ధి చెందాయి. కానీ వైద్య పర్యవేక్షణ లేకుండా వాటిని అధిక మోతాదులో తీసుకోవడం వల్ల సమస్యలు తలెత్తుతాయి. అధిక ప్రోటీన్ శరీరంలో నత్రజని వ్యర్థాలను పెంచి.. మూత్రపిండాలపై ప్రభావం చూపిస్తుంది. దీర్ఘకాలిక మూత్రపిండ వ్యాధి లేదా మూత్రపిండాల పనితీరు తగ్గిన వారిపై ప్రభావం మరింత ఎక్కువగా ఉంటుంది. కండరాల పెరుగుదలకు ప్రోటీన్ అవసరం అయినప్పటికీ.. ఎక్కువ తీసుకోవడం మంచిది కాదు అంటున్నారు.
కొవ్వులో కరిగే విటమిన్లు (A, D, E, K)
నీటిలో కరిగే విటమిన్ల మాదిరిగా కాకుండా.. కొవ్వులో కరిగే విటమిన్లు కణజాలాలలో పేరుకుపోతాయి. విటమిన్లు A, D, E, K కాలేయం, కొవ్వు కణజాలాలలో నిల్వ అవుతాయి. అంటే కాలక్రమేణా అధికంగా తీసుకోవడం పెరుగుతుంది. ముఖ్యంగా విటమిన్ ఎ అధిక మోతాదులో కాలేయంపై ఒత్తిడి తెచ్చి విషప్రక్రియకు దారితీయవచ్చు. విటమిన్ డి అదుపు లేకుండా తీసుకుంటే ఆరోగ్యానికి హాని కలుగుతుంది. ముఖ్యంగా కాలేయం లేదా మూత్రపిండాల వ్యాధులు ఉన్నవారికి ఇబ్బంది కలిగిస్తుంది.
ఐరన్ సప్లిమెంట్స్
శరీరానికి ఐరన్ చాలా అవసరం. కానీ అధికంగా తీసుకోవడం హానికరం. లోపం లేకుండా ఐరన్ సప్లిమెంట్లు తీసుకోవడం వల్ల ఐరన్ ఓవర్‌లోడ్‌ అవుతుంది. స్టాట్‌పెర్ల్స్ జర్నల్ ప్రకారం.. కాలేయంతో సహా శరీర కణజాలాలలో అదనపు ఐరన్ పేరుకుపోయినప్పుడు హిమోక్రోమాటోసిస్ అనే పరిస్థితి ఏర్పడుతుంది. ఇది అవయవ పనితీరును దెబ్బతీస్తుంది. దీర్ఘకాలిక నష్టాన్ని కలిగిస్తుంది.
మూలికా నివారణలు
హెర్బల్ అంటే హానిచేయనిది అని అర్థం కాదు. కొన్ని సాంప్రదాయ నివారణలు కాలేయంపై తీవ్ర ప్రభావం చూపిస్తాయి. కామ్‌ఫ్రేలో తీవ్రమైన కాలేయ నష్టాన్ని కలిగించే సమ్మేళనాలు ఉంటాయి. రుతువిరతి లక్షణాలకు ఉపయోగించే బ్లాక్ కోహోష్, కాలేయ సంబంధిత దుష్ప్రభావాలతో ముడిపడి ఉంది. బరువు తగ్గించే ఉత్పత్తులలోని గార్సినియా క్యాంబోజియా కూడా ఇబ్బంది కలిగిస్తుంది.
ఇవే కాకుండా లికోరైస్ రూట్ కూడా బీపీని పెంచి గుండెపోటు ప్రమాదాన్ని రెట్టింపు చేస్తుంది. అధికంగా తీసుకోవడం వల్ల ఎలక్ట్రోలైట్ సమతుల్యత దెబ్బతింటుందని చెప్తున్నారు. డీటాక్స్, కొవ్వును కాల్చే సప్లిమెంట్లు త్వరిత ఫలితాలను ఇస్తాయి. అయితే దీర్ఘకాలిక సమస్యలను కూడా పెంచుతాయి.
సప్లిమెంట్లు కరెక్ట్గా ఉపయోగిస్తే ఆరోగ్యానికి తోడ్పడతాయి. కానీ అవి ప్రమాద రహితమైనవి కావు. కానీ ఉత్పత్తిపై "సహజమైనది" అనే లేబుల్ చూసి ఎలాంటి వైద్య సూచన లేకుండా తీసుకోవడం ఆరోగ్యానికి ప్రమాదం కలిగిస్తుందని ఆరోగ్య సంరక్షణ నిపుణులు చెప్తున్నారు.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
టాప్ హెడ్ లైన్స్
ట్రెండింగ్ వార్తలు
