Andhra Style Tomato Pappu : ఆంధ్రా స్టైల్ టమాటా పప్పు రెసిపీ.. రుచి పెంచే టిప్స్ ఇవే

Andhra Tomato Dal Recipe : ఆంధ్రా స్టైల్ టమాటా పప్పును ఇంట్లోనే రుచిగా తయారు చేసుకోవాలనుకుంటున్నారా? మరి దీనికి కావాల్సిన పదార్థాలు, తయారీ విధానం, పప్పు రుచి పెంచే వంట చిట్కాలు ఏంటో చూసేద్దాం.

ఆంధ్రా స్టైల్ టమోటా పప్పు రెసిపీ

Source : Gemini AI

Show Quick Read

Key points generated by AI, verified by newsroom

• కందిపప్పును నానబెట్టి, పసుపు, పండిన టమాటాలతో ఉడికించండి.
• ఉడికిన టమాటాలు మెదిపి, పులుపును బట్టి చింతపండు కలపాలి.
• వెల్లుల్లి, ఆవాలు, జీలకర్రతో తాలింపు వేసి పప్పులో కలపాలి.
• కొత్తిమీర, నెయ్యితో కలిపి వేడి అన్నంలో వడ్డిస్తే రుచి.

Tomato Pappu Recipe : ఆంధ్రా భోజనం అనగానే చాలామందికి ముందుగా గుర్తొచ్చే వంటకాల్లో టమాటా పప్పు కూడా ఒకటి. వేడివేడి అన్నంలో టమాటా పప్పు, కొద్దిగా నెయ్యి వేసుకుని తింటే ఆ రుచే వేరు. అయితే ఇంట్లో చేసేటప్పుడు హోటల్‌లో లేదా పల్లెటూళ్లలో చేసే పప్పులా రుచి రావడం లేదా? కొన్ని చిన్న చిట్కాలు పాటిస్తే టమాటా పప్పును మరింత రుచిగా తయారు చేసుకోవచ్చు. దీనికి కావాల్సిన పదార్థాలు ఏంటో.. ఎలా వండుకోవాలో ఇప్పుడు చూసేద్దాం.

టమాటా పప్పు తయారీకి కావాల్సిన పదార్థాలు

కందిపప్పు - 1 కప్పు

టమాటాలు - 4

పచ్చిమిర్చి - 2

ఉల్లిపాయ - 1 

పసుపు - పావు టీస్పూన్

చింతపండు - టమాటాల పులుపును బట్టి తీసుకోవాలి.

వెల్లుల్లి రెబ్బలు - 6

ఎండుమిర్చి - 2

ఆవాలు - అర టీస్పూన్

జీలకర్ర - అర టీస్పూన్

కరివేపాకు - 2 రెమ్మలు

ఇంగువ - చిటికెడు

నూనె - 2 టేబుల్ స్పూన్లు

ఉప్పు - తగినంత

కొత్తిమీర - కొద్దిగా

టమాటా పప్పు తయారీ విధానం

టమాటా పప్పు రుచిగా రావాలంటే పప్పు మెత్తగా ఉడకడం చాలా ముఖ్యం. కాబట్టి కందిపప్పును కడిగి 15 నుంచి 20 నిమిషాలు నానబెడితే.. త్వరగా మెత్తగా ఉడుకుతుంది. కుక్కర్‌లో పసుపు, తగినంత నీరు వేసి పప్పు మెత్తగా ఉడికించండి. టమాటాలే ఈ పప్పుకు ప్రధాన రుచిని ఇస్తాయి. కాబట్టి బాగా పండిన, రసంతో ఉండే టమాటాలను తీసుకోండి. టమాటాలను ముక్కలుగా కోసి పప్పుతో కలిపి ఉడికించవచ్చు. ఇలా చేస్తే టమాటాల రసం పప్పులోకి బాగా చేరుతుంది.

టమాటాలు పూర్తిగా మెత్తబడి, తొక్క విడిపోయేంత వరకు ఉడికిస్తే పప్పులో వాటి రుచి బాగా కలుస్తుంది. టమాటా ముక్కలు గట్టిగా ఉండకుండా గరిటెతో కొద్దిగా మెదపండి. దీనివల్ల పప్పుకు మంచి చిక్కదనం వస్తుంది. ఆంధ్రా స్టైల్ టమాటా పప్పులో పులుపు ముఖ్యమైన రుచి. అయితే టమాటాలే ఎక్కువ పుల్లగా ఉంటే చింతపండు అవసరం ఉండకపోవచ్చు. టమాటాలు తక్కువ పుల్లగా ఉంటే కొద్దిగా చింతపండు రసం కలపండి. ఒకేసారి ఎక్కువ వేయకుండా రుచి చూసుకుంటూ కలపడం మంచిది.

టమాటా పప్పుకు వెల్లుల్లి మంచి సువాసన, రుచిని ఇస్తుంది. కాబట్టి తాళింపు వేసేప్పుడు వెల్లుల్లిని మంచిగా వేపుకోవాలి. చిన్న కడాయిలో నూనె వేడి చేసి ఆవాలు, జీలకర్ర, ఎండుమిర్చి, వెల్లుల్లి, కరివేపాకు, ఇంగువ వేసి వేయించండి. వెల్లుల్లి కొద్దిగా బంగారు రంగులోకి వచ్చాక తాలింపును పప్పులో కలపండి. వెల్లుల్లి మాడిపోకుండా చూసుకోండి. పచ్చిమిర్చి పప్పుకు తాజా ఘాటు ఇస్తే, ఎండుమిర్చి తాలింపులో మంచి సువాసనను అందిస్తుంది. మీకు కారం ఎంత కావాలో చూసుకుని దానికి తగ్గట్లు ఇవి వేసుకోవాలి. 

పప్పులో ఈ తాళింపు వేసేసి.. చివర్లో కొద్దిగా కొత్తిమీర వేయండి. అంతే నోరూరించే టమాటా పప్పు రెడీ. వేడివేడి అన్నంలో వడ్డించేటప్పుడు ఒక చిన్న చెంచా నెయ్యి కలిపితే రుచి మరింత బాగుంటుంది. వడియాలు, లేదా ఆవకాయతో కలిపి తింటే ఏ రుచి అయినా తలవంచాల్సిందే అన్న ఫీల్ వస్తుంది. 

మరిన్ని చదవండి

శనగపప్పు పచ్చి కొబ్బరి కూర రెసిపీ.. ఇలా సింపుల్‌గా, టేస్టీగా చేసుకోండి

ఆనియన్ సమోసా రెసిపీ.. ఇంట్లోనే క్రిస్పీగా, టేస్టీగా ఇలా చేసుకోండి