Mansoor Ali Khan: త్రిషాపై కామెంట్స్ - నటుడు మన్సూర్ అలీపై జాతీయ మహిళా కమిషన్ సీరియస్, పోలీసులకు కీలక ఆదేశాలు

Mansoor Ali Khan: నటి త్రిషపై అనుచిత వ్యాఖ్యలు చేసిన నటుడు మన్సూర్ అలీ ఖాన్‌పై జాతీయ మహిళా కమిషన్ సీరియస్ అయ్యింది. అతడిపై కేసు నమోదు చేయాలని తమిళనాడు పోలీసులను ఆదేశించింది.

Photo Credit: Mansoor Ali Khan/Instagram

National Commission for Womens fire On Mansoor Ali Khan: సౌత్ టాప్ హీరోయిన్ త్రిషపై తమిళ నటుడు మన్సూర్ అలీ ఖాన్ చేసిన అభ్యంతరకర వ్యాఖ్యలపై జాతీయ మహిళా కమీషన్ తీవ్ర ఆగ్రహం వ్యక్తం చేసింది. తమిళనాడు పోలీసులకు కీలక ఆదేశాలు జారీ చేసింది. మన్సూర్ వ్యాఖ్యలను సుమోటోగా స్వీకరించి కేసు నమోదు చేయాలని ఆదేశించింది. మన్సూర్ కామెంట్స్ మహిళలపై లైంగిక వేధింపులు ప్రేరేపించేలా ఉన్నాయని అభిప్రాయపడింది. ఆయన వ్యాఖ్యలను  ఏమాత్రం సహించేది లేదని తేల్చి చెప్పింది. ఈ మేరకు ట్విట్టర్ వేదికగా ఓ పోస్టు పెట్టింది.

జాతీయ మహిళా కమిషన్ ఏం చెప్పిందంటే?

“మన్సూర్ వ్యాఖ్యల విషయాన్ని మేం చాలా సీరియస్ గా తీసుకున్నాం. ఐపీసీ సెక్షన్‌ 509Bతో పాటు లైంగిక వేధింపులకు సంబంధించిన మరికొన్ని సెక్షన్ల కింద మన్సూర్‌ అలీఖాన్‌పై కేసు నమోదు చేయాలని తమిళనాడు డీజీపీని ఆదేశించాం. ఇలాంటి వ్యాఖ్యలు సమాజంలో లైంగిక హింసకు కారణం అవుతాయి. ఈ వ్యాఖ్యలను తీవ్రంగా ఖండిస్తున్నాం” అని మహిళా కమిషన్‌ ట్విట్టర్‌లో పేర్కొంది.

The National Commission for Women is deeply concerned about the derogatory remarks made by actor Mansoor Ali Khan towards actress Trisha Krishna. We're taking suo motu in this matter directing the DGP to invoke IPC Section 509 B and other relevant laws.Such remarks normalize…

— NCW (@NCWIndia) November 20, 2023

మన్సూర్ అలీ త్రిష గురించి ఏమన్నారంటే?

తాజాగా ఓ మీడియా చిట్ చాట్ లో మాట్లాడిన మన్సూర్‌ అలీఖాన్‌, ‘లియో’ చిత్రంలో త్రిషతో కలిసి నటించడం పట్ల తీవ్ర వ్యాఖ్యలు చేశారు. ఆమెతో రేపు సీన్ చేయకపోవడం నిరాశ కలిగించిందని చెప్పుకొచ్చారు. “గతంలో నేను చాలా రేప్‌ సీన్లలో నటించాను. ‘లియో’ సినిమాలో అవకాశం వచ్చినప్పుడు త్రిషతో రేప్‌ సీన్‌ ఉంటుందని భావించాను. అలాంటి సీన్ లేకపోవడం బాధగా అనిపించింది. కనీసం లియో కశ్మీర్ సెట్స్ లో త్రిషను చూడకూడా చూడనివ్వలేదు” అంటూ వివాదాస్పద వ్యాఖ్యలు చేశారు. ఆయన మాటలపై నటి త్రిషతో పాటు పలువురు సౌత్ సినీ ప్రముఖులు స్పందిచారు. మన్సూర్ తీరుపై తీవ్ర ఆగ్రహం వ్యక్తం చేశారు.  

మన్సూర్ అలీ వివరణ, మండిపడుతున్న నెటిజన్లు

అటు తన వ్యాఖ్యలపై తప్పుగా ప్రచారం చేశారని మన్సూర్ అలీ ఖాన్ వెల్లడించారు. తన కెరీర్ ను నాశనం చేసేందుకు కొంతమంది కుట్ర చేస్తున్నారని ఆరోపించారు. " నా మాటలు తప్పుగా అర్థం చేసుకున్నారు. నా వ్యాఖ్యలను వక్రీకరించారు. ఎడిట్ చేసి కొన్ని మాటలు తొలగించారు. లియో మూవీలో ఆమె పాత్ర కీలకం. పర్వతాన్ని ఎత్తిన హనుమంతుడితో ఆమెను పోల్చాను. త్రిషాకు నేను ఇచ్చిన కాంప్లిమెంట్స్ చూపించలేదు. నా కెరియర్ ని నాశనం చేసేందుకు కుట్ర చేస్తున్నారు. నేను గతంలో చాలామంది హీరోయిన్స్ తో కలిసి పని చేశాను. ఎవరితోనూ అసభ్యంగా ప్రవర్తించలేదు" అంటూ తన ఇన్ స్టాగ్రామ్ లో రాసుకొచ్చారు మన్సూర్ అలీ ఖాన్. ఆయన వివరణపైనా పలువురు నెటిజన్లు తీవ్ర ఆగ్రహం వ్యక్తం చేస్తున్నారు.