NTR Call To Fan: నీకు నేనున్నా.. ప్రాణాపాయ స్థితిలో ఉన్న అభిమానికి ఎన్టీఆర్ అభయం, వీడియో వైరల్

జూనియర్ ఎన్టీఆర్ తన పెద్ద మనసు చాటారు. ప్రాణాపాయ స్థితిలో హాస్పిటల్ బెడ్ మీద ఉన్న తన అభిమానితో వీడియో కాల్ మాట్లాడి ధైర్యం చెప్పారు.

తన అభిమానితో మాట్లాడుతున్న ఎన్టీఆర్

సినిమాలతో ఎంతో అభిమానులను సంపాదించుకున్న జూనియర్ ఎన్టీఆర్.. తెరపైనే కాదు, తెర బయట కూడా తాను హీరోనే అనిపించుకున్నారు. ప్రాణాపాయ స్థితిలో ఉన్న తన అభిమానికి వాట్సాప్ కాల్ చేసి.. ‘‘నీకు నేనున్నా తమ్ముడూ’’ అంటూ ధైర్యం చెప్పారు. ఆ వీరభిమాని కన్నీటిని తుడిచేందుకు ప్రయత్నించారు. ఈ వీడియో ఇప్పుడు సోషల్ మీడియాలో వైరల్‌గా చక్కర్లు కొడుతోంది. 

తూర్పు గోదావరి జిల్లా మలికిపురం మండలం.. గూడపల్లి గ్రామానికి చెందిన కొప్పాడి మురళి ఇటీవల రోడ్డు ప్రమాదంలో తీవ్రంగా గాయపడ్డాడు. ఈ ప్రమాదంలో అతడి రెండు కిడ్నీలు పాడైపోయాయి. దీంతో అతడి ఆరోగ్యం క్షీణించి ప్రాణాపాయ స్థితిలో ఉన్నాడు. కనీసం మాట్లాడలేని పరిస్థితిలో ఉన్నాడు. మురళి జూనియర్ ఎన్టీఆర్‌కు వీరాభిమాని. ఈ సందర్భంగా మురళి తన చిరకాల కోరికను పేపరు మీద రాసి డాక్టర్‌కు ఇచ్చాడు. తనకు ఎన్టీఆర్‌తో మాట్లాడాలని ఉందని అందులో పేర్కొన్నాడు. ఈ విషయం తెలుసుకున్న ఎన్టీఆర్ తన అభిమానికి వచ్చిన కష్టాన్ని చూసి చలించిపోయారు. వెంటనే వాట్సాప్ ద్వారా వీడియో కాల్ చేసి అతడి పరిస్థితిని అడిగి తెలుసుకున్నారు. నువ్వు త్వరగా కోలుకుంటావు, త్వరలోనే మనం కలుద్దామని ఎన్టీఆర్.. మురళికి, అతడి కుటుంబ సభ్యులకు ధైర్యం చెప్పారు.

Fan of His fans . @tarak9999🙏 pic.twitter.com/1Mt6rwVpUb

— Yashwanth 🌊 (@YashuTarak_45) October 6, 2021

రోడ్డు ప్రమాదాలపై ఎన్టీఆర్ ఎప్పటికప్పుడు తన అభిమానులను హెచ్చరిస్తూనే ఉంటారు. తన సోదరుడు జానకి రామ్, తండ్రి నందమూరి హరికృష్ణ సైతం రోడ్డు ప్రమాదంలో చనిపోయిన సంగతి తెలిసిందే. అప్పటి నుంచి ఎన్టీఆర్‌, కళ్యాణ్ రామ్‌లు తమ సొంత చిత్రాల్లో రోడ్డు ప్రమాదాల గురించి హెచ్చరిస్తుంటారు. తాజాగా తన అభిమాని కూడా రోడ్డు ప్రమాదంలో తీవ్రంగా గాయపడిన విషయం తెలుసుకుని ఎన్టీఆర్ ఆందోళన చెందినట్లు తెలిసింది. ప్రస్తుతం ఎన్టీఆర్ నటించిన ‘RRR’ చిత్రం విడుదలకు సిద్ధంగా ఉంది. ఆ తర్వాత ఎన్టీఆర్ కొరటాల శివ దర్శకత్వంలో మరో సినిమా చేయనున్నారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి