Sankranthiki Vasthunam: తెలుగులోనూ తమిళ రూల్స్ తప్పవన్న దిల్ రాజు, జస్ట్ మిస్! ప్రాణాలు పోయేవన్న అనిల్ రావిపూడి!

Cinema News | కేరళ, తమిళనాడులో సినిమా రివ్యూల విషయంలో తీసుకున్న నిర్ణయాల సక్సెస్ అవుతాయని దిల్ రాజు ఆశాభావం వ్యక్తం చేశారు. అక్కడి మాదిరిగానే తెలుగులోనూ ఇంప్లిమెంట్ అయ్యే అవకాశం ఉందన్నారు.

‘సంక్రాంతికి వస్తున్నాం’ రిలీజ్ డేట్ ప్రెస్ మీట్

Source : Social Media

Sankranthiki Vasthunam Release Date Press Meet: సంక్రాంతికి తెలుగు సినిమా పరిశ్రమలో బాక్సాఫీస్ దగ్గర పెద్ద సినిమాల పోటీ గట్టిగా ఉంటుంది. ఈసారి కూడా పలు పెద్ద చిత్రాలు పొంగల్ బరిలో దిగుతున్నాయి. గ్లోబల్ స్టార్ రామ్ చరణ్ ‘గేమ్ ఛేంజర్’, నటసింహం నందమూరి బాలకృష్ణ ‘డాకు మహారాజ్’, విక్టరీ వెంకటేష్ ‘సంక్రాంతికి వస్తున్నాం’ సినిమాతో ప్రేక్షకుల ముందుకు రాబోతున్నారు. ఇప్పటికే రామ్ చరణ్, బాలయ్య సినిమాల రిలీజ్ డేట్స్ ఫిక్స్ కాగా, తాజాగా వెంకీ సినిమా రిలీజ్ డేట్ ప్రకటించారు. సంక్రాంతి కానుకగా ఈ సినిమాను జనవరి 14న విడుదల చేయబోతున్నట్లు మేకర్స్ తెలిపారు. రిలీజ్ డేట్ అనౌన్స్ సందర్భంగా ఏర్పాటు చేసిన ప్రెస్ మీట్ లో చిత్రబృందం పాల్గొన్నది.

తెలుగు రాష్ట్రాల్లో తమిళనాడు తరహా రూల్స్

ఇక ఈ ప్రెస్ మీట్ లో మాట్లాడిని నిర్మాత దిల్ రాజు సినిమా రివ్యూల గురించి కీలక విషయాలు వెల్లడించారు. కేరళ, తమిళనాడులో తీసుకున్న నిర్ణయాలను తెలుగులోనూ ఇంప్లిమెంట్ అవుతాయన్నారు. “సినిమా రివ్యూల విషయంలో కేరళలో ఆల్రెడీ నిర్ణయం తీసుకున్నారు. ఇవాళ తమిళనాడులోనూ కొత్త రూల్స్ అమల్లోకి తీసుకొచ్చారు. నాక్కూడా ఈ రూల్స్ పంపించారు. అక్కడ తప్పకుండా సక్సెస్ అవుతాయి. ఆటోమేటిక్ గా మన రాష్ట్రంలోనూ ఇంప్లిమెంట్ అయ్యే అవకాశం ఉంది. అయితే, ఈ నిర్ణయం నేను ఒక్కడిని తీసుకునేది కాదు. ఫిల్మ్ ఛాంబర్ ద్వారా జరుగుతుంది. ఎగ్జిబిటర్స్ కూడా దానికి ప్రిపేర్ అయినట్లు తెలుస్తున్నది. త్వరలోనే ఛాంబర్ ద్వారా రివ్యూల విషయంలో కీలక నిర్ణయం వస్తుంది” అని దిల్ రాజు వెల్లడించారు.    

జస్ట్ మిస్.. ప్రాణాలు పోయేవన్న అనిల్ రావిపూడి

ఇక ఈ ప్రెస్ మీట్ లో దర్శకుడు అనిల్ రావిపూడి షూటింగ్ స్పాట్ లో జరిగిన రియల్ ఇన్సిడెంట్ గురించి చెప్పారు.  షూటింగ్ సమయంలో కాస్త లేట్ అయి ఉంటే నటుడు వీటివీ గణేష్ ప్రాణాలు పోయేవని చెప్పారు. “షూటింగ్ స్పాట్ లో గణేష్ గారు “ఇది రియల్ గన్ తెలుసా?” అని అడిగారు. నరేష్ గారి దగ్గర రియల్ గన్ ఉందని మాకు తెలీదు. ఈయన ఆ గన్ తీసుకొచ్చి నాకు ఇచ్చారు. అది చాలా చిన్నగా ఉంది. నేను మాములు గన్ అనుకోని గణేష్ గారి వైపు  పాయింట్ చేసి పెట్టా. నరేష్ గారు అరుస్తూ వచ్చి గన్ లాక్కున్నారు. ఓపెన్ చేసి రియల్ బులెట్స్ చూపించారు. అది ఫెదర్ టచ్ అంట.. టచ్ చేస్తే బుల్లెట్ వెళ్తుందట. కాస్త లేట్ అయితే గణేష్ గారి ప్రాణాలు పోయేవి” అని చెప్పుకొచ్చారు. 

‘సంక్రాంతికి వస్తున్నాం’ సినిమా గురించి..

‘సంక్రాంతికి వస్తున్నాం’ సినిమాలో వెంకటేష్ హీరోగా నటిస్తుండగా, అనిల్ రావిపూడి దర్శకత్వం వహిస్తున్నారు.   మీనాక్షి చౌదరి,  ఐశ్వర్య రాజేష్ హీరోయిన్లుగా నటిస్తున్నారు. క్రైమ్, కామెడీ నేపథ్యంలో ఈ సినిమా తెరకెక్కుతుంది. ప్రస్తుతం శరవేగంగా షూటింగ్ జరుపుకుంటున్నది. ఈ సినిమాను శ్రీ వెంకటేశ్వర క్రియేషన్స్ బ్యానర్  పై దిల్ రాజు నిర్మిస్తున్నారు. ఇక ఇప్పటికే  అనిల్ రావిపూడి వెంకటేష్ కాంబినేషన్ లో ‘ఎఫ్2’, ‘ఎఫ్3’ సినిమాలు వచ్చి మంచి హిట్ అందుకున్నాయి.  ఈ సినిమాతో హ్యాట్రిక్ కొట్టాలని భావిస్తున్నారు.