Jr NTR: ఎన్టీఆర్ అరుదైన ఘనత.. ఆ లిస్టులో ఒకే ఒక్క టాలీవుడ్ హీరోగా యంగ్ టైగర్!

‘ఆర్‌ఆర్‌ఆర్‌’ చిత్రంతో గ్లోబల్ స్టార్ గా మారిన ఎన్టీఆర్‌ మరో అరుదైన ఘనత సాధించారు. 2023లో ఆసియాలో టాప్‌ 50లో నిలిచిన నటుల జాబితాలో చోటు సంపాదించారు. 

ఎన్టీఆర్ (Image Credit: X)

యంగ్ టైగర్ జూనియర్ ఎన్టీఆర్ మరో అరుదైన ఘనత సాధించారు. ఈ ఏడాది ఆసియాలో టాప్‌ 50లో నిలిచిన నటుల జాబితాలో చోటు సంపాదించారు. ఏషియన్‌ వీక్లీ మ్యాగజైన్‌ ‘ఈస్టర్న్‌ ఐ 2023’ పేరుతో ప్రకటించిన ఈ లిస్టులో తారక్‌ 25వ స్థానంలో నిలిచారు. ఈ జాబితాలో చోటు దక్కించుకున్న ఏకైక టాలీవుడ్ హీరోగా తారక్ నిలవడం విశేషం.

‘ఆర్‌.ఆర్‌.ఆర్‌’ చిత్రంతో అంతర్జాతీయ స్థాయిలో గుర్తింపు తెచ్చుకున్న ఎన్టీఆర్‌, సరికొత్త గ్లోబల్ స్టార్ గా అవతరించారు. 'నాటు నాటు' పాట ప్రతిష్టాత్మక ఆస్కార్ అవార్డ్ సాధించిన తర్వాత 'అకాడమీ యాక్టర్స్ బ్రాంచ్‌' జాబితాలో చోటు సంపాదించారు. ఈ క్రమంలో ఇప్పుడు ఏషియన్‌ వీక్లీ మ్యాగజైన్‌-2023 టాప్‌ 50 యాక్టర్స్ లిస్టులో చేరిపోయారు. 

ఇకపోతే 'ఈస్టర్న్‌ ఐ 2023' లిస్ట్‌ లో బాలీవుడ్ బాద్‌ షా కింగ్ ఖాన్ షారుక్‌ ఖాన్ మొదటి స్థానంలో నిలిచారు. పాపులర్ హీరోయిన్లు అలియా భట్, ప్రియాంక చోప్రా జోనాస్ 2, 3 స్థానాల్లో నిలవగా.. రణ్‌ బీర్‌ కపూర్‌ 6వ, దళపతి విజయ్ 8వ స్థానంలో ఉన్నారు. 

'దేవర' గ్లింప్స్‌ రెడీ... 
ఎన్టీఆర్ సినిమాల విషయానికొస్తే, ప్రస్తుతం 'దేవర' అనే యాక్షన్ థ్రిల్లర్ లో నటిస్తున్నారు. కొరటాల శివ దర్శకత్వంలో తెరకెక్కుతున్న ఈ సినిమాని రెండు భాగాలుగా ప్లాన్ చేస్తున్నారు. ఫస్ట్ పార్ట్ ని వచ్చే ఏడాది ఏప్రిల్ 5న పాన్ ఇండియా వైడ్ గా రిలీజ్ చేయనున్నారు. ఇందులో బాలీవుడ్ భామ జాన్వీ కపూర్ హీరోయిన్ గా నటిస్తుండగా, సైఫ్ అలీఖాన్ ప్రతినాయకుడి పాత్ర పోషిస్తున్నారు. కోస్టల్ బ్యాక్ డ్రాప్ లో ఒక ఎమోషనల్ యాక్షన్ థ్రిల్లర్ గా ఈ సినిమాను తీర్చిదిద్దుతున్నారు. ఇందులో తారక్ డ్యూయల్ రోల్ చేస్తున్నట్లు తెలుస్తోంది. ఇప్ప‌టికే ఒక పాత్ర‌కి సంబంధించిన ఫ‌స్ట్ లుక్ పోస్ట‌ర్ ను వదిలారు. ఫస్ట్ గ్లింప్స్‌ ను నూతన సంవత్సర కానుకగా విడుదల చేయడానికి సన్నాహాలు చేస్తున్నట్లు సమాచారం. యువసుధ ఆర్ట్స్, ఎన్టీఆర్ ఆర్ట్స్ సంయుక్తంగా నిర్మించే ఈ చిత్రానికి రాక్ స్టార్ అనిరుథ్ సంగీతం సమకూరుస్తున్నారు. 

'వార్ 2' కి సిద్ధం.. 
'దేవర' మూవీ తర్వాత 'వార్ 2' చిత్రంతో తారక్ నేరుగా బాలీవుడ్ లో ఎంట్రీ ఇవ్వడానికి రెడీ అవుతున్నారు. యష్ రాజ్ ఫిల్మ్స్ స్పై యూనివర్స్ లో భాగంగా తెరకెక్కనున్న ఈ స్పై యాక్షన్ థ్రిల్లర్ లో హృతిక్ రోషన్‌ తో కలిసి స్క్రీన్ షేర్ చేసుకోబోతున్నారు. 'బ్రహ్మాస్త్రం' ఫేమ్ అయాన్ ముఖర్జీ దీనికి దర్శకత్వం వహించనున్నారు. ప్రస్తుతం ప్రీ ప్రొడక్షన్ స్టేజ్ లో ఉన్న ఈ సినిమా రెగ్యులర్ షూట్ వచ్చే ఏడాది ప్రారంభం కానుంది. ఈ చిత్రాన్ని 2025 ఆగష్టు 14న ప్రేక్షకుల ముందుకి తీసుకురానున్నారు. ఇక సలార్, KGF చిత్రాల దర్శకుడు ప్రశాంత్ నీల్ తో ఎన్టీఆర్ ఓ హై ఓల్టేజ్ యాక్షన్ థ్రిల్లర్ కమిట్ అయ్యారు.