Telusa Manasa Song : 'వాల్తేరు వీరయ్య' దర్శకుడు బాబీ చేతుల మీదుగా 'మనసు మనసుతో'

పార్వతీశం, జశ్విక జంటగా శ్రీ బాలాజీ పిక్చర్స్ నిర్మించిన సినిమా 'తెలుసా మనసా'. ఇందులో తొలి పాటను సంక్రాంతి హిట్ 'వాల్తేరు వీరయ్య' దర్శకుడు బాబీ విడుదల చేశారు.

'తెలుసా మనసా' సినిమాలో జశ్విక, పార్వతీశం 

'కేరింత' ఫేమ్ పార్వతీశం (Parvateesam) కథానాయకుడిగా శ్రీబాలాజీ పిక్చర్స్ సంస్థ రూపొందిస్తున్న సినిమా 'తెలుసా మనసా' (Telusa Manasa Movie).  ఈ చిత్రంలో జశ్విక కథానాయిక. దీనికి వైభ‌వ్ ద‌ర్శ‌కుడు. వ‌ర్షా ముందాడ‌, మాధ‌వి నిర్మాతలు. పల్లెటూరి నేపథ్యంలో సరికొత్త కథ, కథనాలతో న్యూ ఏజ్ ప్రేమ కథగా తెరకెక్కించారు. కొన్ని రోజుల క్రితం ప్రముఖ అగ్ర నిర్మాత 'దిల్' రాజు (Dil Raju) చేసినిమా ఫస్ట్ లుక్ విడుదల చేశారు. ఈ రోజు సినిమాలో తొలి పాట 'మనసు మనసుతో' విడుదల చేశారు. 

మంచి విజయం సాధించాలి!
'తెలుసా మనసా' సినిమాలో 'మనసు మనసుతో...' అంటూ సాగే తొలి గీతానికి వనమాలి సాహిత్యం అందించారు. గోపీసుందర్ సంగీతం అందించగా... శ్రీకృష్ణ ఆలపించారు. సంక్రాంతికి 'వాల్తేరు వీరయ్య' సినిమాతో భారీ విజయం అందుకున్న దర్శకుడు బాబీ కొల్లి (కెఎస్ రవీంద్ర) ఈ పాటను ట్విట్టర్ ద్వారా విడుదల చేశారు. సినిమా మంచి విజయం సాధించాలని ఆకాంక్షించారు.  

Here's #ManasuManasutho song from #TelusaManasa.

▶️ https://t.co/iuxXvzyOKW

Best wishes to @vaibhavwriter, @GopiSundarOffl & the entire team. ❤️ #SriBalajiPictures @parvateesam_u @Jashvika2000 @ActorAliReza #RohiniHattangadi @tipsmusicsouth @beyondmediapres pic.twitter.com/JNkGRxNoCF

— Bobby (@dirbobby) February 14, 2023

బెలూన్స్ అమ్ముకునే అబ్బాయిగా హీరో!
'తెలుసా మనసా' సినిమాలో ఒక పల్లెటూరిలో బెలూన్స్ (బుడగలు) అమ్ముకునే ఓ యువ‌కుడు మల్లి బాబుగా హీరో పార్వ‌తీశం కనిపించనున్నారు. ఆ ఊరిలో ప‌ని చేసే హెల్త్ అసిస్టెంట్ సుజాత పాత్ర హీరోయిన్ జ‌శ్విక‌ది. ఇద్ద‌రి మనసుల్లోనూ ఒకరు అంటే మరొకరికి ప్రేమ ఉంటుంది. కానీ, ఎప్పుడూ వారిద్ద‌రూ ఆ ప్రేమ‌ను వ్య‌క్తం చేసుకోరు. సుజాతకు ప్రపోజ్ చేయాలని ప‌లు సంద‌ర్భాల్లో మల్లి బాబు ట్రై చేస్తాడు. అయితే, చెప్ప‌లేక‌పోతాడు. ఓ సందర్భం తర్వాత అనూహ్యంగా మ‌ల్లి బాబు క‌ల‌లు కూలిపోతాయి. సుజాత‌కు దూరం కావాల్సి వ‌స్తుంది. మళ్ళీ వారిద్ద‌రూ క‌లుసుకున్నారా? లేదా? అనేది సినిమా కథ. 

ఫస్ట్ లుక్‌లో బామ్మ కూడా!
'తెలుసా మనసా' ఫస్ట్ లుక్ చూస్తే... హీరో హీరోయిన్లతో పాటు ఓ బాబు, బామ్మ రోల్ చేసిన రోహిణి హ‌ట్టంగ‌డి కూడా ఉంటారు. ఆమె మంచంపై కూర్చుని ఉంటారు. ఆ లుక్‌లో హీరో పార్వతీశం ఏదో ఆలోచిస్తూ ఉన్నారు. ఆయన ఎందుకు అలా దిగాలుగా కూర్చుని ఉన్నారు? అనేది సినిమా చూస్తే గానీ తెలియదు. ప్రస్తుతం సినిమా చిత్రీకరణ శరవేగంగా జరుగుతుందని, త్వరలో మరిన్ని వివరాలు వెల్లడిస్తామని చిత్ర  బృందం పేర్కొంది. కొత్త దర్శకుడు చక్కగా చిత్రాన్ని తెరకెక్కిస్తున్నారని తెలిపారు.

మ‌హేష్ అచంట‌, అలీ రెజా, లావ‌ణ్య‌, మాస్ట‌ర్ అద్వితేజ్‌, వెంకీ, శివ‌, శోభ‌న్ త‌దిత‌రులు ఈ సినిమాలో ఇతర తారాగణం. జాతీయ పురస్కారం అందుకున్న సంగీత దర్శకుడు గోపీ సుంద‌ర్ 'తెలుసా మనసా' చిత్రానికి స్వరాలు, నేపథ్య సంగీతం అందిస్తున్నారు. ఇంకా ఈ చిత్రానికి ఛాయాగ్రహణం : ప్ర‌సాద్ ఈద‌ర, కూర్పు : పాపారావ్, పాట‌లు :  వ‌న‌మాలి, కాస‌ర్ల శ్యామ్‌, శ్రేష్ట‌, గాయనీ గాయకులు : రాహుల్ సిప్లిగంజ్‌, శ్రీరామ‌చంద్ర‌, ర‌మ్య బెహ్ర‌, శ్రీకృష్ణ‌, మాళ‌విక‌, సుధాంశు, సహ నిర్మాత : గిరిధ‌ర్‌, స‌మ‌ర్ప‌ణ‌ :  నైనీష్య‌, సాత్విక్‌, నిర్మాత‌లు: వ‌ర్షా ముందాడ‌, మాధ‌వి, కథ - కథనం - మాటలు - దర్శకత్వం :  వైభ‌వ్‌.