Viduthalai Part 1 in Telugu : తమిళ హిట్‌ను తెలుగుకు తీసుకొస్తున్న అల్లు అరవింద్

తమిళ కమెడియన్ సూరి కథానాయకుడిగా జాతీయ పురస్కార గ్రహీత వెట్రిమారన్ తెరకెక్కించిన సినిమా 'విడుతలై'. ఈ సినిమాను తెలుగులో ప్రముఖ నిర్మాత అల్లు అరవింద్ విడుదల చేస్తున్నారు.

వెట్రిమారన్, అల్లు అరవింద్, ఎల్రెడ్ కుమార్ 

జాతీయ పురస్కార గ్రహీత, ప్రముఖ తమిళ దర్శకుడు వెట్రిమారన్ (Vetrimaaran) రూపొందించిన సినిమా 'విడుతలై'. ఇందులో తమిళ చిత్రాల ద్వారా తెలుగు ప్రేక్షకులకు కూడా సుపరిచితుడైన హాస్య నటుడు సూరి (Tamil Comedian Soori) కథానాయకుడిగా నటించారు. ప్రత్యేకమైన ప్రధాన పాత్రలో మక్కల్ సెల్వన్ విజయ్ సేతుపతి (Vijay Sethupathi) నటించారు. తమిళనాడులో గత నెలలో (మార్చి 31న) విడుదల అయ్యింది. ఇప్పుడీ సినిమా త్వరలో తెలుగు ప్రేక్షకుల ముందుకు రానుంది. 

అల్లు అరవింద్ చేతికి 'విడుతలై'
ప్రముఖ నిర్మాత అల్లు అరవింద్ (Allu Aravind)కి చెందిన గీతా ఫిల్మ్ డిస్ట్రిబ్యూషన్ ద్వారా 'విడుతలై' తెలుగు రాష్ట్రాల్లో విడుదల కానుంది. దర్శకుడు వెట్రిమారన్, నిర్మాత ఎల్రెడ్ కుమార్ ఇటీవల గీతా ఆర్ట్స్ ఆఫీసుకు వచ్చారు. అల్లు అరవింద్‌ను కలిశారు. తమ సినిమాను తెలుగులో విడుదల చేయమని కోరడంతో ఆయన ఓకే అని చెప్పారని తెలిసింది. 

మంచి సినిమాలను ప్రోత్సహించడంలో అల్లు అరవింద్ ఎప్పుడూ ఓ అడుగు ముందు ఉంటారు. ట్రెండ్ ఫాలో అవ్వడమే కాదు, ట్రెండీ సినిమాలు కూడా తీసుకుంటారు. న్యూ ఏజ్ కాన్సెప్ట్ ఓరియెంటెడ్ సినిమాలు ప్రొడ్యూస్ చేయడం కోసం జీఏ2 పిక్చర్స్ స్టార్ట్ చేశారు. ఇతర భాషల్లో విడుదలైన మంచి సినిమాలను తెలుగు ప్రేక్షకులకు అందించడం కోసం డిస్ట్రిబ్యూషన్ స్టార్ట్ చేశారు. కన్నడ బ్లాక్ బస్టర్ 'కాంతార'ను తెలుగులో విడుదల చేశారు. ఇప్పుడు 'విడుతలై'ను తీసుకు వస్తున్నారు.

విడుతలై... పోలీస్ ప్రొసీజర్ క్రైమ్ థ్రిల్లర్!
పీరియాడిక్ పోలీస్ ప్రొసీజర్ క్రైమ్ థ్రిల్లర్ (Viduthalai Part 1 Genre)గా 'విడుతలై పార్ట్ 1'ను వెట్రిమారన్ తెరకెక్కించారు. రెండు భాగాలుగా సినిమా రూపొందింది. ఒకేసారి షూటింగ్ మొత్తం కంప్లీట్ చేశారు. తమిళనాట థియేటర్లలో విడుదల అయిన ఈ సినిమాకు ప్రశంసలతో పాటు బాక్సాఫీస్ కలెక్షన్లు భారీగా వస్తున్నాయి.

'విడుతలై'లో ధనుష్ పాట...
తెలుగులో ఎవరు పాడతారో?
'విదుతలై పార్ట్ 1'లో ఓ పాటను ప్రముఖ తమిళ కథానాయకుడు ధనుష్ పాడారు. ఇళయరాజా సంగీతంలో 'ఓన్ దొణక్కి నాందా' అంటూ ఆయన పాడిన పాట హృద్యంగా సాగుతుంది. తమిళ ప్రేక్షకుల నుంచి ఆ పాటకు విపరీతమైన స్పందన లభించింది. ఆ సాంగ్ మేకింగ్ వీడియో చూస్తే... ఇళయరాజా దగ్గర ఉండి మరీ ధనుష్ చేత పాడించారు. తెలుగులో ఆ పాటను ఎవరు పాడతారో చూడాలి. 

వెట్రిమారన్ దర్శకుడిగా పరిచయమైన 'పొల్లదావన్'లో ధనుష్ హీరోగా నటించారు. ఆ తర్వాత 'ఆడుకాలమ్', 'వడా చెన్నై', 'అసురన్' సినిమాలు చేశారు. 'కాక ముట్టై' సినిమాను సంయుక్తంగా ప్రొడ్యూస్ చేశారు. ఇద్దరి మధ్య మంచి రిలేషన్ ఉంది. అందువల్ల, ధనుష్ పాట పాడారు.

విజయ్ సేతుపతి, సూరితో పాటు భవాని శ్రీ, ప్రకాశ్ రాజ్ రాజ్, గౌతమ్ వాసుదేవ్ మీనన్ (Gautham Vasudev Menon), రాజీవ్ మీనన్, చేతన్ తదితరులు ఈ సినిమాలో నటించారు. ఈ చిత్రానికి ఇసైజ్ఞాని ఇళయరాజా సంగీతం అందించారు. వెల్ రాజ్ సినిమాటోగ్రఫీ బాధ్యతలు నిర్వర్తించారు.