Don 2 Movie: ‘డాన్ 2’ షూటింగ్‌లో ప్రమాదం - షారుఖ్ ఖాన్ వల్ల మేకర్స్‌కు రూ.2.6 కోట్ల నష్టం

Don 2 Movie: షారుఖ్ ఖాన్ హీరోగా నటించిన ‘డాన్ 2’.. 2011లో విడుదలయ్యి బ్లాక్‌బస్టర్ హిట్‌ను సాధించింది. కానీ ఆ షూటింగ్ సమయంలో జరిగిన ప్రమాదం గురించి అందులో నటించిన అలీ ఖాన్ తాజాగా బయటపెట్టాడు.

Image Credit: Twitter

Shah Rukh Khan Don 2 Movie: ఒక్కొక్కసారి సినిమా షూటింగ్స్‌లో జరిగే ప్రమాదం వల్ల భారీ నష్టం కలగవచ్చు. అలా జరిగిన ప్రమాదాల వల్ల పలువురు స్టార్ హీరోలు గాయాల పాలయ్యారు కూడా. కానీ మూవీ షూటింగ్ అన్న తర్వాత ఇవన్నీ కామన్ అని హీరోలు వాటి గురించి పెద్దగా పట్టించుకోరు. తాజాగా బాలీవుడ్ బాద్‌షా షారుఖ్ ఖాన్ నటించిన ‘డాన్ 2’లో తనతో పాటు కలిసి నటించిన అలీ ఖాన్.. ఆ మూవీ షూటింగ్ సమయంలో జరిగిన ఒక చేదు అనుభవాన్ని గుర్తుచేసుకున్నాడు. షారుఖ్ ఖాన్ వల్ల ఎంత భారీ నష్టం జరిగిందో బయటపెట్టాడు. ఈ విషయాన్ని షారుఖ్ ఖాన్ కూడా ‘డాన్ 2’ మేకింగ్ వీడియోలో స్వయంగా చెప్పుకొచ్చాడు.

బెర్లిన్‌లో షూటింగ్..

ఫర్హాన్ అఖ్తర్ దర్శకత్వంలో ‘డాన్ 2’ అనే మూవీలో నటించాడు షారుఖ్ ఖాన్. ఆ సినిమా షూటింగ్ సమయంలో ఒక కార్ క్రాష్ అవ్వడం వల్ల రూ.2.6 కోట్లు నష్టం కలిగిందని అందులో నటించిన అలీ ఖాన్ బయటపెట్టాడు. అంతే కాకుండా ఆ కార్ క్రాష్ షారుఖ్ ఖాన్ వల్లే జరిగిందని చెప్పుకొచ్చాడు. తనకు షూటింగ్స్‌లో ఎప్పుడూ మేజర్ యాక్సిడెంట్స్ ఏం జరగలేదు అని చెప్తూనే ‘డాన్ 2’ షూటింగ్ సమయంలో ఏం జరిగిందో గుర్తుచేసుకున్నాడు అలీ ఖాన్. ‘‘ఆరోజు సండే. బెర్లిన్‌లో ఒక కార్ చేజ్ సీక్వెన్స్ తెరకెక్కిస్తున్నాం. షారుఖ్ లెఫ్ట్‌లో కూర్చున్నాడు. నేను రైట్‌లో ఉన్నాను. ఫర్హాన్ అఖ్తర్ వెనుక సీట్‌లో కెమెరాకు కనిపించకుండా దాక్కున్నాడు’’ అంటూ ప్రమాదం సమయంలో ఏం జరిగిందో వివరించాడు అలీ ఖాన్.

రిహార్సెల్ సక్సెస్..

‘‘కార్ బానెట్‌పై హెచ్‌ఎమ్ఐ లైట్స్, రెండు పెద్ద కెమెరాలు ఉన్నాయి. ఆ వస్తువుల విలువ అన్నీ కలిపి దాదాపు 3 లక్షల యూరోలు ఉంటుంది. అంటే ఇండియన్ కరెన్సీలో దాదాపు రూ.2.6 కోట్లు. అవన్నీ పెట్టేసరికి కారు బ్యాలెన్స్ తప్పింది’’ అని చెప్పుకొచ్చాడు అలీ ఖాన్. రిహార్సెల్ సమయంలో షారుఖ్ ఖాన్ ఆ సీన్‌ను చాలా బాగా చేశాడు. ఇదే విషయాన్ని షారుఖ్‌కు చెప్పగా.. ‘‘నేను ఇప్పటికీ ఎన్నో కార్లు నడిపాను. కానీ ఎప్పుడూ మేజర్ యాక్సిడెంట్ జరగలేదు’’ అని తనతో అన్నాడని గుర్తుచేసుకున్నాడు. రిహార్సెల్ బాగా వచ్చిందని షూటింగ్ స్టార్ట్ చేయగానే షారుఖ్‌ బ్యాలెన్స్ కోల్పోయి.. వేరే స్టంట్ కారును ఢీకొట్టాడని చెప్పాడు అలీ ఖాన్.

రెప్పపాటులో జరిగిపోయింది..

‘‘షారుఖ్ లెఫ్ట్‌కు తిరగడంలో కొన్ని సెకండ్లు లేట్ అవ్వడంతో ఇంకొక స్టంట్ కారు నేరుగా వచ్చి మమ్మల్ని ఢీకొట్టింది. వెంటనే షారుఖ్.. నావైపు చూసి నేను ఓకేనా కాదా అని అడిగాడు. నేను బాగానే ఉన్నానని చెప్పాను. అందరూ చుట్టూ చేరి అంతా ఓకేనా కాదా అని చూశారు. కానీ ఆ ప్రమాదం వల్ల కెమెరా పరికరాలు అన్నీ డ్యామేజ్ అవ్వడంతో 3 లక్షల యూరోలు నష్టం జరిగింది. అంతా రెప్పపాటులో జరిగిపోయింది’’ అని అలీ ఖాన్ వివరించాడు. ఈ విషయం గురించి ‘డాన్ 2’ మేకింగ్ వీడియోలో మాట్లాడిన షారుఖ్ ఖాన్.. అది కష్టమైన షాట్ కాదని, కానీ తను ఓవర్ కాన్ఫిడెంట్‌గా ఉండడం వల్లే ప్రమాదం జరిగిందని ఓపెన్‌గా చెప్పారు షారుఖ్.