Double Ismart Trailer: ‘డబుల్ ఇస్మార్ట్’ ట్రైలర్ విడుదల - ఈసారి యాక్షన్, రొమాన్స్ అంతా డబుల్

Double Ismart Trailer: ‘ఇస్మార్ట్ శంకర్’ మూవీ ఓ రేంజ్‌లో సెన్సేషన్ క్రియేట్ చేసింది. ఇప్పుడు దానికి సీక్వెల్‌గా ‘డబుల్ ఇస్మార్ట్’ సిద్ధమయ్యింది. తాజాగా ఈ మూవీ ట్రైలర్ విడుదలయ్యింది.

డబుల్ ఇస్మార్ట్ పోస్టర్ (Image Credit: Puri Connects/Twitter)

Source : Puri Connects/Twitter

Double Ismart Trailer Is Out Now: ఒక సూపర్ హిట్ సినిమాకు సీక్వెల్ అంటే భారీ అంచనాల మధ్య విడుదల అవుతుంది. అలాగే ‘డబుల్ ఇస్మార్ట్’పై కూడా ప్రేక్షకుల్లో భారీ అంచనాలే ఉన్నాయి. అప్పటివరకు చాక్లెట్ బాయ్ ఇమేజ్‌తో ఉన్న రామ్‌ను పూర్తిగా మార్చేసిన సినిమా ‘ఇస్మార్ట్ శంకర్’. ఇప్పుడు అదే సినిమాకు ‘డబుల్ ఇస్మార్ట్’ అనే సీక్వెల్‌తో సిద్ధమయ్యాడు దర్శకుడు పూరీ జగన్నాధ్. ఇప్పటికే ఈ మూవీ నుండి విడుదలయిన గ్లింప్స్, టీజర్, ట్రైలర్‌కు మంచి రెస్పాన్స్ లభించింది. ఇక తాజాగా ఈ సీక్వెల్‌కు సంబంధించిన ట్రైలర్ కూడా ప్రేక్షకుల ముందుకు వచ్చింది. ఇందులో రామ్ మ్యాడ్‌నెస్ డబుల్ రేంజ్‌లో ఉందని ప్రేక్షకులు అంటున్నారు.

కావ్యను చూసి ఫిదా..

‘‘నేనెవరో తెలుసా’’ అంటూ మాస్ స్టైల్‌లో రామ్ చెప్పే డైలాగ్‌తో ‘డబుల్ ఇస్మార్ట్’ ట్రైలర్ మొదలవుతుంది. ఇక ‘ఇస్మార్ట్ శంకర్’ కథకు ఇది కొనసాగింపు కాబట్టి తన తలకు యూఎస్‌బీ కేబుల్ అలాగే ఉంటుంది. దానిని కూడా ట్రైలర్‌లో ప్రత్యేకంగా చూపించారు. ఇందులో నీ పేరేంటి అని రామ్‌ను అడగగా.. ‘‘ఉస్తాద్ ఇస్మార్ట్ శంకర్ అలియాస్ డబుల్ ఇస్మార్ట్’’ అని చెప్తాడు. అలా సంజయ్ దత్ కంటపడతాడు. తనకు టార్గెట్ అవుతాడు. అప్పుడే హీరోయిన్‌గా కావ్య థాపర్ ఎంట్రీ ఇస్తుంది. చూసిన వెంటనే కావ్య అందానికి ఫ్లాట్ అవుతాడు రామ్. ‘‘వెళ్లి దిష్టి తీయించుకో. లేకపోతే శంకర్ దిష్టి తగులుతుంది’’ అంటూ మాస్ స్టైల్‌లో తన ప్రేమను చెప్తాడు.

వింత గెటప్‌లో అలీ..

‘డబుల్ ఇస్మార్ట్’లో రామ్, కావ్య థాపర్ మధ్య కెమిస్ట్రీ ఒక రేంజ్‌లో ఉండబోతుందని ట్రైలర్ చూస్తే అర్థమవుతోంది. ‘‘మీ వదినేమో కుతుబ్ మినార్. మనమేమో చార్మినార్.. రెండూ గుద్దుకుంటే ఎట్లుంటది రా’’ అంటూ తన ఫ్రెండ్ అయిన గెటప్ శ్రీనుతో తన లవ్ గురించి చెప్తాడు రామ్. అలా రామ్, కావ్య మధ్య ప్రేమ మొదలవుతుంది. అప్పుడే ‘డబుల్ ఇస్మార్ట్’ ట్రైలర్‌లో అలీ ఎంట్రీ. పూరీ జగన్నాధ్ సినిమాల్లో అలీ గెటప్స్ చాలా డిఫరెంట్‌గా ఉంటాయి. అదే విధంగా ‘డబుల్ ఇస్మార్ట్‌’లో కూడా కోతిలాగా కనిపించే మనిషిగా కామెడీ క్రియేట్ చేశాడు అలీ. పైగా ఎవరికీ అర్థం కాని భాషలో మాట్లాడుతూ కన్‌ఫ్యూజ్ చేశాడు. 

మళ్లీ మెమొరీ ట్రాన్స్‌ఫర్..

అసలు చావే లేని మనిషిగా బ్రతకాలని అనుకుంటాడు సంజయ్ దత్. దానికోసం రామ్‌ను ఎంపిక చేసుకుంటాడు. ఒకరి బ్రెయిన్‌లోని మెమొరీ మరొకరి బ్రెయిన్‌లోకి ట్రాన్స్‌ఫర్ అవుతుంది. ఆ తర్వాత ‘డబుల్ ఇస్మార్ట్’ ట్రైలర్ అంతా యాక్షన్‌తో నిండిపోయింది. ఈసారి రామ్ వర్సెస్ సంజయ్ దత్ మధ్య జరిగే యాక్షన్ మాస్ ఫ్యాన్స్‌కు డబుల్ ట్రీట్ ఇవ్వనుందని ట్రైలర్‌తోనే తెలిసేలా చేశాడు పూరీ జగన్నాధ్. పైగా ‘ఇస్మార్ట్ శంకర్’లాగానే ఈ సీక్వెల్‌లో కూడా మాస్ స్టైల్‌లో, హైదరాబాదీ యాసలో రామ్ చెప్పే డైలాగులు ఫ్యాన్స్‌ను ఆకట్టుకోనున్నాయని తెలుస్తోంది. మొత్తానికి ఆగస్ట్ 15న రామ్ ఫ్యాన్స్ కోసం ‘డబుల్ ఇస్మార్ట్’ యాక్షన్ ఎంటర్‌టైనర్‌ను సిద్ధం చేశారు మేకర్స్.