Raghava Lawrence: దాచుకున్న డబ్బుకు చెదలు - రాఘవ లారెన్స్ గొప్ప మనసు

Lawrence: లారెన్స్ మరోసారి తన గొప్ప మనసు చాటుకున్నారు. ఓ పేదింటి వారు దాచుకున్న డబ్బులకు చెదలు పట్టి పాడైపోగా.. వారికి ఆ మొత్తం ఆర్థిక సాయం అందించారు.

పేద కుటుంబానికి రాఘవ లారెన్స్ ఆర్థిక సాయం

Source : https://x.com/offl_lawrence/

Raghava Lawrence Helped To Poor Family: రాఘవ లారెన్స్.. ఈ పేరు వినగానే మనకు మంచి డ్యాన్సర్, యాక్టర్‌తో పాటు సమాజ సేవకుడు కూడా గుర్తొస్తారు. తన ఫౌండేషన్ ద్వారా ఎంతో మందికి ఆయన సాయం చేస్తుంటారు. అనాథ, పేద విద్యార్థులకు అండగా ఉండడమే కాకుండా రైతులకు, దివ్యాంగులకు సైతం భరోసా కల్పిస్తున్నారు. 

తాజాగా ఓ పేద కుటుంబానికి సాయం అందించి మరోసారి తన గొప్ప మనసు చాటుకున్నారు లారెన్స్. దీనికి సంబంధించిన వీడియోను సోషల్ మీడియా వేదికగా షేర్ చేయగా వైరల్ అవుతోంది. ఆయన్ను ప్రశంసిస్తూ నెటిజన్లు కామెంట్స్ చేస్తున్నారు.

అసలేం జరిగిందంటే?

తమిళనాడులో శివగంగై తిరుప్పువనానికి చెందిన కుమార్, అతని భార్య ముత్తుకరుప్పి రోజు కూలీలుగా పని చేస్తున్నారు. వీరికి ముగ్గురు పిల్లలు. కూలి పనితో సంపాదించిన డబ్బును డబ్బాలో పొదుపు చేసే వారు. అలా కొన్ని రోజుల పాటు సంపాదించిన డబ్బును హుండీలో వేసి ఇంట్లో గొయ్యి తవ్వి పాతిపెట్టారు. పిల్లల చెవి పోగుల వేడుకల కోసం పొదుపు చేసిన డబ్బును కొద్ది రోజుల క్రితం లెక్కించగా రూ.లక్ష ఉన్నట్లు తేలింది. మళ్లీ కొంత పొదుపు చేయాలని భావించి హుండీని తిరిగి పాతిపెట్టారు.

డబ్బును తినేసిన చెదలు

ఇటీవల హుండీని తీసి చూడగా ఆ డబ్బును చెదలు తినేశాయి. దాదాపు రూ.500 నోట్లన్నీ పాడైపోయాయి. దీంతో కష్టపడి సంపాదించుకున్న నగదు చెదల పాలైందని ఆ కుటుంబీకులు కన్నీరు మున్నీరుగా విలపించారు. ఈ విషయాన్ని వార్తా ఛానళ్లు, సామాజిక మాధ్యమాల ద్వారా తెలుసుకున్న లారెన్స్ ఆ కుటుంబానికి అండగా నిలిచారు. వారి ఇంటికి సడెన్‌గా కారులో వెళ్లి పోగొట్టుకున్న మొత్తం రూ.లక్ష అందజేశారు. దీంతో ఆ కుటుంబీకులు లారెన్స్‌కు కన్నీటితో కృతజ్ఞతలు తెలిపారు.

మీడియాకు థ్యాంక్స్

కూలి చేసుకునే కుటుంబం చెదలతో దాచుకున్న డబ్బును కోల్పోవడం బాధాకరమని.. అందుకే ఆర్థిక సాయం చేశానని లారెన్స్ అన్నారు. 'కూలి చేసుకునే కుటుంబం కష్టపడి సంపాదించిన డబ్బులు చెదలు తినేసిన వార్త నా దృష్టికి వచ్చింది. వారి వేదన నా హృదయాన్ని కలిచివేసింది. వాళ్లు కోల్పోయిన మొత్తాన్ని తిరిగి అందించడం నాకు చాలా ఆనందంగా ఉంది. ఈ విషయాన్ని నా వరకూ తీసుకొచ్చిన మీడియా, ప్రజలకు ధన్యవాదాలు.' అంటూ సోషల్ మీడియాలో పోస్ట్ పెట్టారు.

Hi Everyone, I came across the news that a coolie family lost 1lakh of their many years of savings due to termites. My heart sank thinking about what they must’ve gone through. So, I’m happy to contribute the lost money for them. Thanks to the media and people involved in… pic.twitter.com/Rmhv3VNBNV

— Raghava Lawrence (@offl_Lawrence) May 8, 2025