Latest Telugu Movie Releases: మూవీ లవర్స్‌కు నిజంగా 'వాలెంటైన్స్ డే' - అటు థియేటర్ ఇటు ఓటీటీల్లో ఈ సినిమాలు చూసి ఎంజాయ్ చేసేయండి!

Upcoming Telugu Movies: ఫిబ్రవరి 14న వాలెంటైన్స్ డే సందర్భంగా యూత్ ఫుల్ ఎంటర్‌టైనర్స్‌తో పీరియాడిక్ డ్రామా చిత్రాలు అలరించనున్నాయి. ఒకే రోజు 4 సినిమాలు థియేటర్లలో సందడి చేయనున్నాయి.

వాలెంటైన్స్ డే రోజున సినీ పండుగే

Source : Twitter (X)

Latest Telugu Movies Releases On February Second Week: ఈ వాలెంటైన్స్ డే నిజంగా మూవీ లవర్స్‌కు గుడ్ న్యూస్. మాస్ కా దాస్ విశ్వక్ సేన్ 'లైలా' దగ్గరి నుంచి హాస్య బ్రహ్మ వినోదాత్మక చిత్రం 'బ్రహ్మా ఆనందం'తో పాటు విక్కీ కౌశల్, యంగ్ హీరో సిద్ధు జొన్నలగడ్డ సినిమాలు ప్రేక్షకులను అలరించనున్నాయి. అటు, ఓటీటీల్లోనూ పలు ఆసక్తికర సినిమాలు సందడి చేయనున్నాయి. మరి అవేంటో ఓ లుక్కేసేయండి..

అమ్మాయిగా మాస్ కా దాస్ విశ్వక్ సేన్

మాస్ కా దాస్ విశ్వక్ సేన్ విభిన్న పాత్రలో ఈసారి ప్రేక్షకుల ముందుకు వస్తున్నారు. ఆయన లీడ్ రోల్‌ పోషించిన లేటెస్ట్ మూవీ 'లైలా' (Laila) ప్రేమికుల దినోత్సవం సందర్భంగా ఈ నెల 14న థియేటర్లలోకి రానుంది. ఈ రొమాంటి యాక్షన్ చిత్రంలో విశ్వక్ అమ్మాయి, అబ్బాయిగా నటిస్తున్నారు. ఆకాంక్ష శర్మ హీరోయిన్‌గా నటిస్తున్నారు. రామ్ నారాయణ్ దర్శకత్వం వహిస్తోన్న ఈ సినిమాను సాహు గారపాటి నిర్మిస్తున్నారు. ఇప్పటికే రిలీజైన ట్రైలర్ సినిమాపై హైప్‌ను భారీగా పెంచేశాయి. సినిమా ప్రమోషన్లలో భాగంగా ఆదివారం నిర్వహించిన ప్రీ రిలీజ్ ఈవెంట్‌కు ముఖ్య అతిథిగా మెగాస్టార్ చిరంజీవి హాజరు కావడం మరింత హైలైట్‌గా నిలిచింది.

వినోదాత్మకంగా హాస్య బ్రహ్మ 'బ్రహ్మా ఆనందం'

సీనియర్ హాస్య నటుడు బ్రహ్మానందం ఆయన కుమారుడు రాజా గౌతమ్ తాతా మనవళ్లుగా అలరించబోతోన్న లేటెస్ట్ మూవీ 'బ్రహ్మా ఆనందం' (Brahma Anandam).  ఈ సినిమాకు ఆర్.వి.ఎస్. నిఖిల్ దర్శకత్వం వహించగా ఆయనకు ఇదే తొలి మూవీ. రాహుల్ యాదవ్ నక్కా నిర్మించారు. ప్రియా వడ్లమాని, ఐశ్వర్య హోలక్కల్‌తో పాటు వెన్నెల కిశోర్ కీలక పాత్రలు పోషించారు. వినోదంతో పాటు బలమైన ఎమోషన్స్ నిండిన కథగా చిత్రాన్ని తీర్చిదిద్దినట్లు ప్రచార చిత్రాలను బట్టి తెలుస్తోంది. 'బ్రహ్మానందం లేకుంటే ఈ చిత్రం లేదు. ఆయన్ను దృష్టిలో పెట్టుకునే పట్టుబట్టి మరీ ఈ కథ రాసుకున్నా.' అని దర్శకుడు నిఖిల్ స్పష్టం చేశారు. ఈ సినిమా ఫిబ్రవరి 14న థియేటర్లలో రిలీజ్ కాబోతోంది.

శంభాజీ మహారాజ్ జీవిత కథ ఆధారంగా..

బాలీవుడ్ నటుడు విక్కీ కౌశల్, నేషనల్ క్రష్ రష్మిక జంటగా నటించిన పీరియాడిక్ డ్రామా మూవీ 'ఛావా' (Chava). ఛత్రపతి శివాజీ మహరాజ్ కుమారుడు శంభాజీ మహరాజ్ జీవిత కథ ఆధారంగా లక్ష్మణ్ ఉటేకర్ ఈ సినిమాను తెరకెక్కించారు. శంభాజీ భార్య యేసుబాయిగా రష్మిక నటించారు. భారీ బడ్జెట్‌తో దినేశ్ విజన్ నిర్మించిన ఈ సినిమా ఫిబ్రవరి 14న ప్రేక్షకుల ముందుకు రానుంది. ఇప్పటివరకూ విడుదల చేసిన ప్రచార చిత్రాలు సినిమాపై మరింత అంచనాలను పెంచేశాయి.

అప్పుడు ఓటీటీలో.. ఐదేళ్ల తర్వాత థియేటర్లలో..

టాలీవుడ్ యంగ్ హీరో సిద్ధూ జొన్నలగడ్డ హీరోగా కెరీర్ ప్రారంభించిన సమయంలో నటించిన చిత్రాల్లో ఒకటి 'కృష్ణ అండ్ హిజ్ లీలా' (Krishna And His Leela). సురేశ్ ప్రొడక్షన్ బ్యానర్‌పై రానా దగ్గుబాటి సమర్పణలో పేరేపు రవికాంత్ దర్శకత్వం వహించారు. ఈ సినిమాలో శ్రద్ధా శ్రీనాథ్, సీరత్ కపూర్, షాలినీ హీరోయిన్లుగా నటించారు. విభిన్న ప్రేమకథా చిత్రంగా రూపొందిన ఈ చిత్రం కరోనా కారణంగా 2020లో ఓటీటీలో విడుదలై అలరించింది. ముఖ్యంగా యువతను విశేషంగా ఆకట్టుకుంది. ఇప్పుడు మళ్లీ థియేటర్లలో 'ఇట్స్ కాంప్లికేటెడ్' పేరుతో ప్రేక్షకుల ముందుకు రానుంది. వాలెంటైన్స్ డే సందర్భంగా ఫిబ్రవరి 14న మూవీని రిలీజ్ చేయనున్నారు.

ఈ వారం ఓటీటీల్లోకి వచ్చే సినిమాల లిస్ట్

• నెట్ ఫ్లిక్స్ - ధూమ్ ధామ్ (హిందీ) ఫిబ్రవరి 14, బ్లాక్ హాక్ డౌన్ (ఇంగ్లీష్) ఫిబ్రవరి 10, కాదలిక్క నేరమిల్లై (తమిళ్) ఫిబ్రవరి 11
• సోనీ లివ్ - మార్కో (తెలుగు) ఫిబ్రవరి 14
• డిస్నీ + హాట్ స్టార్ - బాబీ రిషి లవ్ స్టోరీ (హిందీ) ఫిబ్రవరి 11
• జీ5 - ప్యార్ టెస్టింగ్ (హిందీ) ఫిబ్రవరి 14
• ఆహా - డ్యాన్స్ ఐకాన్ 2 (డ్యాన్స్ షో) ఫిబ్రవరి 14